သျှမ်းပြည် မူဆယ်ခရိုင် မူဆယ်မြို့အတွင်း ပြည်သူ့ကာကွယ်ရေးတပ်ဖွဲ့ PDF အသစ်ကို ထပ်မံ ဖွဲ့စည်းလိုက်ကြောင်း စုံစမ်းသိရှိရသည်။
ယခင်က မူဆယ်မြို့အတွင်း သွားလာလှုပ်ရှားခဲ့ဖူးသည့် ပြည်သူ့လုံခြုံရေး နှင့် ကာကွယ်ရေးတပ်ဖွဲ့ PSDA တပ်ဖွဲ့ကို ဖျက်သိမ်းလိုက်ပြီး လက်ရှိ မူဆယ်ဗျူဟာကို အသစ်ထပ်မံ ဖွဲ့စည်းလိုက်ကြောင်း သိရသည်။
အဆိုပါ PSDA ကို ဖေဖော်ဝါရီ ၁၉ ရက်က တရားဝင်ဖျက်သိမ်းလိုက်ကြောင်း မူဆယ်ဗျူဟာက ထုတ်ပြန်ထားသည်။
“ PSDA ကို တရားဝင် ဖျက်သိမ်းလိုက်ပြီ။ ကျနော်တို့ အခု မူဆယ်ဗျူဟာကို ၂၀၂၂ ဒီဇင်ဘာ ၁၈ ရက်နေ့က ဖွဲ့စည်းလိုက်တာပါ” ဟု မူဆယ်ဗျူဟာ က တာဝန်ရှိသူ ကိုဒိုးက ပြောသည်။
ပြီးခဲ့သည့် နိုဝင်ဘာ ၂၃ ရက်နေ့တွင် ည ၈ နာရီခွဲဝန်းကျင် PSDA တပ်ဖွဲ့မှ နုတ်ထွက်လာခဲ့သည့် တပ်ဖွဲ့ဝင် ၁၄ ဦးကို PSDA ၏ ခေါင်းဆောင် ရွှေလီက ဦးဆောင်ပြီး မူဆယ်မြို့ နေအိမ်တစ်နေရာတွင် လာရောက်ပစ်ခတ်ခဲ့ပြီး ၆ ဦး သေဆုံးကာ ၄ ဦး ဖမ်းဆီးခံရပြီး ၄ ဦး လွတ်မြောက်လာခဲ့သည်။
အဆိုပါ လာရောက်ပစ်ခတ်ခဲ့သည် PSDA ၏ တာဝန်ရှိ ခေါင်းဆောင် ကိုရွှေလီ တို့ကို နိုဝင်ဘာ ၃၀ ရက်နေ့တွင် NUG MOD နှင့် EROs တို့က ထိန်းသိမ်းဖမ်းဆီးနိုင်ခဲ့ပြီး အမှုစစ်ဆေးခဲ့ကြောင်း သိရသည်။
အမှုစစ်ဆေးရာ ၂ လကြာမြင့်ခဲ့ပြီး တာဝန်ရှိ ခေါင်းဆောင်ပိုင်းများကို ထောင်ဒဏ် အနှစ် ၂၀ နှင့် အလုပ်ကြမ်း ချမှတ်လိုက်ပြီး နောက်လိုက်သူများကို နယ်နှင်ဒဏ်ပေးလိုက်ကြောင်း ကိုဒိုးက ပြောသည်။
“ အမိန့်ကတော့ အထက်ပိုင်းဖြစ်တဲ့ ရွှေလီ တာဝန်ကြီးတဲ့သူတွေကိုတော့ အလုပ်ကြမ်း နဲ့ ထောင်ဒဏ် အနှစ် ၂၀ ချမှတ်လိုက်တယ်။ ပစ်ခတ်မှုမှာ ပါဝင်ခဲ့တဲ့ ၆ ယောက်ကိုတော့ အလုပ်ကြမ်း နဲ့ ထောင်ဒဏ် ၅ နှစ်ချလိုက်တယ်။ ကျန်တာက အမှုမှာပါဝင်ပြီး ပစ်ခတ်မှုမှာ မပါတဲ့သူတွေ ၁၅ ယောက်ကတော့ နယ်နှင်ဒဏ်ပေးလိုက်တယ်” ဟု ၎င်းက ပြောသည်။
အဆိုပါ ကျူးလွန်သူများကို သီးသန့်အတွက် ထောင်တစ်နေရာတွင် ချမှတ်ထားကြောင်း၊ အမှုစစ်ဆေးသူများသည် NUG နှင့် EROs ရပ်မိရပ်ဖိများကလည်း ပါဝင်ထားကြောင်း သိရသည်။
