သျှမ်းပြည် ကျောက်မဲခရိုင် ကျောက်မဲမြို့နယ်အတွင်း စစ်ကောင်စီ နှင့် တအာင်း (ပလောင်) အမျိုးသား လွတ်မြောက်ရေး တပ်မတော် TNLA တို့ တိုက်ပွဲကြောင့် နေအိမ်တစ်လုံး ထိခိုက်ပျက်စီးရကြောင်း သတင်း သိရသည်။

ပြီးခဲ့သည့် ဖေဖော်ဝါရီလ ၂၀ ရက်တွင် ကျောက်မဲမြို့နယ် နမ့်ခုံကျေးရွာ နှင့် ပန်ဝိုးကြီးကျေးရွာ အနီးတဝိုက်၌ စစ်ကောင်စီ နှင့် TNLA တို့ ထိတွေ့တိုက်ပွဲဖြစ်ပွားရာ စစ်ကောင်စီတပ်မှ လေကြောင်းတိုက်ခိုက်မှုပါ ပြုလုပ်သည့် အတွက် ပန်ဝိုးကြီးရွာမှ နေအိမ်တစ်လုံး လက်နက်ကြီး ထိမှန် ပျက်စီးခဲ့ကြောင်း ဒေသခံများက သျှမ်းသံတော်ဆင့် ကို ပြောသည်။

“မြေပြင်မှာ သေနတ် နဲ့ အချင်းချင်း ချနေတုန်းမှာတော့ ရွာသားတွေကလည်း ဘုန်းကြီးကျောင်းကို ထွက်ပြေးတာရှိတယ်၊ လေယာဥ် နဲ့ ဗုံးလာကြဲလိုက်တဲ့ အချိန်မှာတော့ လူမရှိတဲ့ အိမ်တစ်လုံးကို ထိပြီး ပျက်စီးသွားရတယ်၊ လူရှိရင်တော့ လူပါ ထိခိုက်မှာအမှန်ပဲ” ဟု ပန်ဝိုးကြီးမှ ဒေသခံအမျိုးသား တစ်ဦးက ပြောသည်။

အဆိုပါ တိုက်ပွဲတွင် ဖေဖော်ဝါရီလ ၂၀ ရက် နံနက်ပိုင်း ၇ နာရီဝန်းကျင်မှ ၁၀ နာရီဝန်းကျင်အထိ နမ့်ခုံ ကျေးရွာ အနီးရှိ TNLA တပ်စခန်းနေရာကို စစ်ကောင်စီ စကခ (၁၆) နှင့် ခလရ (၆၈) တို့က မြေပြင် ထိုးစစ်ဆင်ပြီး လေကြောင်းဖြင့်ပါ တိုက်ခိုက်မှု ပြုလုပ်ခဲ့ကြောင်း PSLF/TNLA တာဝန်ရှိသူ တစ်ဦးက သျှမ်းသံတော်ဆင့်ကို ပြော သည်။

“စကခ (၁၆) နဲ့ ခလရ (၆) အင်အား ၆၀ လောက်နဲ့ TNLA ကို ထိုးစစ်ဆင် တိုက်ခိုက်တယ်၊ မနက် ၇ နာရီ လောက်ကနေ ၉ နာရီ ၄၅ အထိ တိုက်ပွဲက ပြင်းထန်ခဲ့တယ်၊ ဒီကြားထဲမှာ တိုက်လေယာဥ် တစ်စီး နဲ့ လာပြီးတော့ ထိုးစစ် ဆင်တာရှိတယ်၊ မြေပြင်တိုက်ပွဲက သူတို့လူ အထိနာတော့ လေယာဥ် နဲ့ လာတိုက်ပြီး ကယ်ထုတ်တယ်” ဟု အမည်မဖော်လိုသူ PSLF/TNLA မှ တာဝန်ရှိသူ တစ်ဦးက သျှမ်းသံတော်ဆင့်ကို ပြောသည်။

လက်ရှိအချိန်တွင် တိုက်ပွဲများ ငြိမ်သက်သွားသော်လည်း မြေပြင်ရှိ နှစ်ဖက်တပ်ဖွဲ့များမှ စစ်ရေးအင်အား ထပ်မံဖြည့်တင်းမှု နှင့် စစ်ရေးတင်းမာမှုများ ရှိနေသေးသည့် အကြောင်းလည်း သိရသည်။

ယင်းတိုက်ပွဲတွင် စစ်ကောင်စီဘက်မှ ၁၅ ဦး သေဆုံးခဲ့သည့်အပြင် ၅ ဦးထက်မနည်း ဒဏ်ရာရခဲ့သည့် အကြောင်းလည်း သိရသည်။

TNLA တပ်ဖွဲ့သည် တစ်နိုင်ငံလုံး အပစ်ရပ် သဘောတူ စာချုပ် လက်မှတ်ရေးထိုးထားခြင်း မရှိသည့်အပြင် စစ်ကောင်စီက ဖိတ်ခေါ်သည့် ငြိမ်းချမ်းရေး ဆွေးနွေးပွဲကိုလည်း တက်ရောက်ခြင်း မရှိသည့် တပ်ဖွဲ့ဖြစ်သည်။

ပြီးခဲ့သည့် ဖေဖော်ဝါရီလ ၁၀ ရက်တွင်လည်း နောင်ချိုမြို့အတွင်းရှိ MDF – PDF ကို စစ်ကောင်စီဘက်မှ လေကြောင်း တိုက်ခိုက်မှု အပါအဝင် လက်နက်ကြီး လက်နက်ငယ်များဖြင့် ထိုးစစ်ဆင်တိုက်ခိုက်မှုကြောင့် လုံခန်ရွာမှ သာသနာအဆောက်အအုံများ နေအိမ် အများအပြားက ထိိခုက်ပျက်စီးရသည်။

အာဏာသိမ်း စစ်ကောင်စီ တပ်ဖွဲ့သည် ၂၀၂၃ ခုနှစ် ဇန်နဝါရီလ ၁ ရက်မှ စပြီး ဒီဇင်ဘာ (၃၁) ရက်ထိ တစ်နှစ်ကြာ အပစ်ရပ် ကြေညာထားသော်လည်း စစ်ကောင်စီတပ်၏ တိုင်းရင်းသား ဒေသများထံ တိုက်လေယာဥ်ဖြင့် ထိုးစစ်ဆင်မှု နှင့် စစ်မြေပြင် ထိတွေ့တိုက်ပွဲများ ဆက်လက် ဖြစ်ပွားနေဆဲ ဖြစ်သည်။