သျှမ်းပြည် ကျောက်မဲခရိုင် သီပေါမြို့ မြို့မဈေးရှိ ရီရှင်းရွှေဆိုင် ဓားပြတိုက်ခံရပြီး၊ ရွှေ ၆ ပိသာကျော် ပါသွားကြောင်း စုံစမ်းသိရှိရသည်။
ယမန်နေ့ ဖေဖော်ဝါရီ ၂၁ ရက် ညနေပိုင်း ၄ နာရီခွဲတွင် ရီရှင်းရွှေဆိုင် ပိုင်ရှင်မိသားစု (၃) ဦး ရွှေဧည့်သည်ဟိုတယ်အပြန် ဟိုတယ်အရောက်တွင် အမျိုးသား ၄ ဦး ဆိုင်ကယ်နှစ်စီးဖြင့် စီးလာကာ သေနတ်ပါကိုင်ဆောင်လာပြီး သေနတ်ဖြင့် ခြိမ်းခြောက် ဓားပြတိုက်သွားကြောင်း သီပေါမြို့ ဒေသခံ တစ်ဦးက သျှမ်းသံတော်ဆင့်ကို ပြောသည်။
လက်ရှိ ရန်ကုန်တိုင်း ရွှေလုပ်ငန်းရှင်များ အသင်းရုံး (YGEA) ဈေးတွင် အခေါက်ရွှေ ၁ ကျပ်သား (၂,၁၇၂,၄၀၀) ကျပ်ရှိပြီး၊ စစ်ကောင်စီ၏ သတ်မှတ်ထားသော ရွှေဈေးမှာ ၁ ကျပ်သားလျှင် (၂,၅၃၀,၀၀၀) ကျပ် ရှိကြောင်း ယမန်နေ့ ဖေဖော်ဝါရီ ၂၁ ရက်စွဲ၏ ရွှေဈေးနှုန်းအရ သိရသည်။
“ ဆိုင်သိမ်းပြီး သူတို့ ဟိုတယ်ကို ပြန်ရောက်တဲ့အချိန်မှာ အမျိုးသား ၃ ယောက် ဆိုင်ကယ် တစ်စီး နဲ့ နောက်ထပ် အမျိုးသားက ဆိုင်ကယ် ၁ စီးနဲ့လာတယ်။ ရွှေပိုင်ရှင် လင်မယားနှစ်ဦး ကားပေါ်က ဆင်းတဲ့အချိန်မှာ အဲ့ဒီ ဓားပြတိုက်အဖွဲ့က သေနတ်နဲ့ချိန်ပြီး ကားထဲက ရွှေအိတ် ၆ ပိသာကျော်လောက် ယူသွားတယ်။ လူကတော့ ဘာမှမဖြစ်ဘူး “ ဟု ၎င်းက ပြောသည်။
အဆိုပါ ဓားပြတိုက်ခံရသည့် ရီရှင်းရွှေဆိုင်ပိုင်ရှင်သည် ရွှေဧည့်သည် ဟိုတယ်ပိုင်ရှင်လည်း ဖြစ်ကြောင်း သိရသည်။
ရီရှင်းရွှေဆိုင်သည် လွန်ခဲ့သည့် ၂၀၂၁ ခုနှစ် ဖေဖော်ဝါရီ ၂၁ ရက်တွင်လည်း ဓားပြတိုက်မှု တကြိမ် ကြုံခဲ့ရပြီး ရွှေ ၁ ပိသာခန့် ပါသွားကြောင်း၊ ယခု ဒုတိယ အကြိမ်မြောက် ဓားပြတိုက်ခံရခြင်း ဖြစ်ကြောင်း သီပေါမြို့ဒေသခံ တစ်ဦးက ဆက်ပြောသည်။
“ တိုက်တိုက်ဆိုင်ဆိုင် သူတို့ ရွှေဆိုင် ဓားပြတိုက်ခံရတာ ၂ နှစ်ပြည့်တဲ့နေ့မှာ နှစ်ကြိမ်မြောက် ဓားပြတိုက်ခံရတာ။ ဆန်းတော့ ဆန်းတယ်ဗျ၊ ကျနော်တို့တောင် ဒီနေ့ရက် သူတို့ ဓားပြတိုက်ခံရဖူးတာ မသိဘူး။ အခုက တိုက်တိုက်ဆိုင်ဆိုင် ဓားပြတိုက်ခံရတာ ၂ နှစ်ပြည့် ကာလမှာ ထပ်ပြီး ဓားပြတိုက်ခံရတာ အံ့သြစရာဘဲ “ ဟု ၎င်းက ထပ်လောင်းပြောသည်။
ထို့အပြင် ဓားပြတိုက်ခံရမှု နှင့် ပတ်သက်ပြီး သျှမ်းပြည်တိုးတက်ရေးပါတီ၊ သျှမ်းပြည်တပ်မတော် (SSPP/SSA)၊ တအာင်း (ပလောင်) အမျိုးသားလွတ်မြောက်ရေးတပ်မတော် (TNLA) နှင့် စစ်ကောင်စီ၏ လက်အောက်ခံ ရဲတပ်ဖွဲ့ကို ဓားပြတိုက်သည့် အမျိုးသား ၄ ဦးကို ဖမ်းဆီးအရေးယူ ဆောင်ရွက်ပေးရန် တိုင်ကြားထားကြောင်း သိရသည်။
Leave a Comments