မြန်မာ – ထိုင်း နယ်စပ်ဒေသဖြစ်သည့် တာချီလိတ် – မယ်ဆိုင် ချစ်ကြည်ရေးတံတား အမှတ် (၁) တွင် ဖွင့်လှစ်လာပြီးနောက်ပိုင်း အဝင်၊ အထွက် ပြုလုပ်သူများကြောင်း စုံစမ်းသိရှိရသည်။
ယမန်နေ့ ဖေဖော်ဝါရီ ၂၀ ရက် နံနက်အစောပိုင်းတွင် တာချီလိတ် – မယ်ဆိုင် ချစ်ကြည်ရေးတံတား အမှတ် (၁) ကို မြန်မာ နှင့် ထိုင်း နှစ်ဖက်သဘောတူညီမှု နှင့် ဖွင့်လှစ်နိုင်ခဲ့ပြီး ဖြတ်သန်းသွားလာရန်အတွက် ကိုဗစ်-၁၉ ကာကွယ်ဆေးထိုးထားကြောင်း သက်သေခံ လက်မှတ် ရှိထားရမည်ဖြစ်ကြောင်း သိရသည်။
ကိုဗစ် – ၁၉ ရောဂါကြောင့် (၃) နှစ် ဝန်းကျင် ပိတ်ထားသည့် ချစ်ကြည်ရေးတံတား အမှတ် (၁) ကို ပြန်လည်ဖွင့်လှစ် လာပြီးနောက်ပိုင်း လူဦးရေ ထောင်နှင့်ချီ အဝင်၊ အထွက် ပြုလုပ်နေကြောင်း တာချီလိတ်ဒေသခံ အသက် ၃၀ အမျိုးသားတစ်ဦးက သျှမ်းသံတော်ဆင့်ကို ပြောသည်။
“ တံတားစဖွင့်လိုက်တာနဲ့ စိတ်လှုပ်ရှားပြီး မယ်ဆိုင်ကို သွားလည်ပတ်ချင်တဲ့သူတွေ၊ မြန်မာနိုင်ငံကို ပြန်ဝင်ချင်တဲ့သူကော ကားတွေ ပြည့်ကြပ်နေတယ် “ ဟု ၎င်းအမျိုးသားတစ်ဦးက ပြောသည်။
အဆိုပါ တာချီလိတ် – မယ်ဆိုင် ချစ်ကြည်ရေး အမှတ် (၁) တံတားကို နံနက်ပိုင်း ၆ နာရီမှ ညနေ ၆ နာရီထိ ဖွင့်လှစ်ထားကြောင်း သိရသည်။
ထို့အပြင် ချစ်ကြည်ရေး အမှတ် (၁) တံတားကို ပြန်လည်ဖွင့်လှစ်လာနိုင်ခဲ့သော်လည်း ကိုဗစ်-၁၉ ရောဂါ ကူးစက်မှုကိုတော့ စိုးရိမ်ဖွယ်ရာ ရှိနေသေးကြောင်း တာချီလိတ်ဒေသခံ အမျိုးသားတစ်ဦးက ပြောသည်။
“ ကိုယ့်ကျန်းမာရေး အပေါ်မူတည်ပြီးတော့ ယုံကြည်ရတယ်။ ကိုယ်က ဘာမှမဖြစ်လည်း သူများက ဖြစ်ချင်ဖြစ်မယ်။ ဒါကြောင့် လူများလာရင်တော့ ကိုဗစ်-၁၉ ရောဂါကို သတိထားရတာပေါ့။ လူအများကြားမှာ သွားလာရင်လည်း မတ်တပ်ပြီး သွားကြပေါ့၊ အခုက မသွားရင်လည်း တံတားက ဖွင့်နေပြီလေ “ ဟု တာချီလိတ်ဒေသခံ အမျိုးသားတစ်ဦးက ပြောသည်။
မြန်မာ – ထိုင်းနယ်စပ် တာချီလိတ် – မယ်ဆိုင် တံတားအမှတ် ၁ ကို ကိုဗစ် – ၁၉ ရောဂါကူးစက်မှုကြောင့် ၃ နှစ်ကြာ ပိတ်လာခဲ့ပြီးနောက် ယမန်နေ့ ဖေဖော်ဝါရီ ၂၀ ရက် မနက်ပိုင်းတွင် ပြန်လည်ဖွင့်လှစ်ခဲ့သည်။
Leave a Comments