မြန်မာ – ထိုင်း နယ်စပ်ဒေသဖြစ်သည့် သျှမ်းပြည် တာချီလိတ်မြို့တွင် စည်းကမ်းမဲ့ ယာဥ်မောင်းမှုကြောင့် ယာဉ်တိုက်မှု မကြာခဏ ဖြစ်ပွားနေကြောင်း စုံစမ်းသိရှိရသည်။

တာချီလိတ်မြို့တွင် ပျော်ပါး မူးယစ်သောက်စားသူ၊ ဆိုင်ကယ် ဦးထုပ် မစောင်းဘဲ စည်းကမ်းမဲ့ ယာဥ်မောင်းမှုကြောင့် ၂၀၂၃ ခုနှစ် ဇန်နဝါရီ ၁ ရက်မှစပြီး ဖေဖော်ဝါရီ ၁၄ ရက်ထိ လူ (၉) ဦး သေဆုံးပြီး ပျှမ်းမျှ လူ (၅) ဦးတွင် ထိခိုက်ဒဏ်ရာ ရရှိခဲ့ကြောင်း တာချီလိတ်ခရိုင် ယာဉ်ထိန်းရဲ တစ်ဦးက ပြောသည်။

“ အဓိကတော့ ဒီမှာက အေးချမ်းတယ်လေ။ များသောအားဖြင့် နယ်က လူတွေ ဒီကိုလာပြီး အလုပ်လုပ် ချင်ကြတယ်။ အခြေခံ လူတန်းစားက အမျိုးမျိုးပေါ့နော်။ ညနေအလုပ်က ပြန်လာရင်လည်း စိတ်ညစ်စရာတွေ ရှိသလို အားလပ်ရက်တွေလည်းရှိတော့ နည်းနည်းပါးပါး အရက်သောက်ပြီး မူးတဲ့ချိန်မှာ ဖြစ်သွားကြတာပေါ့ ” ဟု တာချီလိတ်ခရိုင် ယာဉ်ထိန်းရဲ ဝန်ထမ်းတစ်ဦးက ပြောသည်။

တာချီလိတ်မြို့မှာ အလုပ်လုပ်ကိုင်ချင်ကြသူတွေ၊ အခြေခံ လူတန်းစားတွေ ပိုမိုလာရောက်နေထိုင်လာသည်နှင့်အမျှ ၎င်းတို့သည် ယာဉ်စည်းကမ်း၊ လမ်းစည်းကမ်း ကို နားမလည်ကြရာ ဖြစ်သလိုမောင်းနှင်နေသည့်အတွက် ယာဉ်တိုက်မှုမှာလည်း ယခင်နှစ်ထက် မြှင့်တက်လာခြင်းဖြစ်ကြောင်း သိရသည်။

အလားတူ ယမန်နေ့ ဖေဖော်ဝါရီ ၂၀ ရက်တွင် တာချီလိတ်မြို့မှာ ယာဉ်တိုက်မှု နှစ်ကြိမ် ဖြစ်ပွားခဲ့ပြီး အမျိုးသား ၃ ဦး ထိခိုက်ဒဏ်ရာ ရရှိခဲ့ကြောင်း တာချီလိတ် ဦးလှမိုး ပရဟိတအသင်းမှ တာဝန်ခံတစ်ဦးက သျှမ်းသံတော်ဆင့်ကို ပြောသည်။

“ ယာဉ် အချင်းချင်းတိုက်တာက ပါလျှံ ၃ မီးပွိုင့်မှာ ဖြစ်တာဗျ။ အန်စာတုံး ကားက မိန်းလမ်းကနေ အရှိန်နဲ့ မောင်းလာတဲ့အချိန် ဖိုးဝီးကားက လက်ဖက်ရည်ဆိုင်လမ်းကြားကနေ ထွက်လာတာ။ အရှိန်က များတဲ့အတွက် တိုက်ကြတာ။ ယာဉ်မောင်း နှစ်ဦး ပွန်းနာ ထိခိုက်ဒဏ်ရာ ရသွားတယ်။ ဒီမနက်အစောပိုင်းက ပျံကျနေထိုင်သူ အမျိုးသားတစ်ဦးကို ဆိုင်ကယ်က တိုက်ပြီးထွက်ပြေးသွားတယ် “ ဟု ၎င်း တာဝန်ခံတစ်ဦးက ပြောသည်။

ထို့အပြင် ယာဉ်တိုက်မှု နှင့် ပတ်သက်ပြီး လျှော့နည်းဖို့ရန် ဟောပြောပွဲ၊ လက်ကမ်းစာစောင်၊ ဆိုင်ကယ် ဦးထုပ် ဝေခြင်း နှင့် စသည့် အသိပညာပေး တို့ကို အားဖြည့်ဆောင်ရွက်သွားမည် ဖြစ်ကြောင်းလည်း ယာဉ်ထိန်းရဲ တစ်ဦးက ပြောသည်။

“ ကျနော်တို့ အနေနဲ့ ပြောချင်တာက ဆိုင်ကယ်မောင်းရင် ဦးထုပ်စောင်းပြီး မေးတိုင်းကြိုး တပ်ပါဗျ။ ကျနော် အနေနဲ့လည်း ယာဉ်စည်းကမ်း၊ လမ်းစည်းကမ်းနဲ့ ပတ်သက်ပြီး လက်ကမ်းစာစောင်၊ အသိပညာပေး၊ ဟောပြောပွဲတွေကို ဒီထက် အားစိုက်ပြီး ပြုလုပ်သွားမယ် “ ဟု ၎င်းက ပြောသည်။

စစ်တပ်က အာဏာသိမ်းပြီး ၂ နှစ်ပြည့်ကာလအတွင်းမှာ သျှမ်းပြည်တွင် တရားဉပဒေ စိုးမိုမှု မရှိတော့သလို စီးပွားရေးမှာလည်း ကျဆင်းလာသည့်အတွက် အေးချမ်းသည့် တာချီလိတ်ကို အလုပ်လုပ်ကိုင်ချင်သူ အခြေခံ လူတန်းများလည်း လာရောက်နေထိုင်ကြသည်။

ထို့ကြောင့် လူနေထူထပ် များပြားလာသည်နှင့်အမျှ ယာဉ်တိုက်မှုမှာလည်း ယခင်နှစ်ထက် မြင့်တက်လာခြင်း ဖြစ်ကြောင်း သိရသည်။