သျှမ်းပြည် မူဆယ်ခရိုင် နမ့်ခမ်းမြို့မှ ဟင်လုံကျေးရွာရှိ စျေးထဲ ရွှေသွားရောင်းသည့် သားအမိ နှစ်ဦးဓားပြတိုက်ခံရပြီး၊ သမီးဖြစ်သူ ကျည်ထိမှန် ဒဏ်ရာ ရရှိခဲ့ကြောင်း စုံစမ်းသိရသည်။
ဓားပြတိုက်အမျိုးသားတစ်ဦးက သေနတ်ပစ်ဖောက်ကာ အမျိုးသမီးတစ်ဦး ကျည်ထိမှန် ဒဏ်ရာရရှိခဲ့ကြောင်း စုံစမ်းသိရှိရသည်။
ယမန်နေ့ ဖေဖော်ဝါရီ ၂၀ ရက် နံနက်အစောပိုင်းတွင် နမ့်ခမ်းမြို့ နှင့် ၇ မိုင်ခန့် ဝေးကွာသော ဟင်လုံကျေးရွာသို့ ရွှေသွားရောင်းရန်သွားသည့် သားအမိနှစ်ဦးသည် ဓားပြတိုက်ခံရပြီး ကျပ်ငွေသိန်း (၁၀၀) ကျော်နှင့် ရွှေအများပြား ပါသွားကြောင်း နမ့်ခမ်းဒေသခံ အသက် ၃၅ နှစ်ကျော် အမျိုးသားတစ်ဦးက ပြောသည်။
ဓားပြတိုက်သည့် အမျိုးသား တစ်ဦးဖြစ်ပြီး၊ အရပ်သားအဝတ်ဖြင့် သေနတ်ကိုင်ထားရာ ၎င်းသားအမိနှစ်ဦးတို့ကို ဓားပြတိုက်ပြီးနောက် သေနတ်ဖြင့် ထပ်မံပစ်ဖောက်ခဲ့သဖြင့် သမီးဖြစ်သူ ကျည်ထိမှန်ခဲ့သည်။
“ မန့်ဝိန်းစျေးကြီးအသွား ဆိုင်ကယ် နဲ့ ရွှေသွားရောင်းတာ။ ဟင်လုံရွာအနီးရောက်တော့ လမ်းမပေါ်မှာ ဓားပြတိုက်ခံရတာဗျ။ အိတ်ထဲက ကျပ်ငွေ သိန်း (၁၀၀) ကျော်၊ ရွှေတွေလည်း အများအပြား ပါသွားတယ်။ ပြီးလည်းပြီးရော ဓားပြတိုက်တစ်ယောက်က သေနတ်ပစ်ဖောက်လိုက်တယ်။ သူ့သမီးရဲ့ ခြေထောက်ကျည်မှန်သွားတယ်” ဟု ၎င်းက ပြောသည်။
အဆိုပါ သေနတ်ပစ်ခံရသူမှာ နန်းဖောင်နွန်း ဆိုသူဖြစ်ပြီး ခြေထောက်တွင် ကျည်ထိမှန် ဒဏ်ရာများဖြင့် နမ့်ခမ်းဆေးရုံကို ပို့ဆောင်ထားပြီး ဆေးဝါးကုသမှု ခံယူထားကြောင်း သိရသည်။
ထို့အပြင် ဓားပြတိုက်မှု နှင့် ပတ်သက်ပြီး ၅ ရက် တစ်ဈေးသွားရောင်းသည့် ဈေးသည်များအပါအဝင် ဒေသခံများမှာ အသွားအလာ ပြုလုပ်ရန် လုံခြုံရေး မရှိတော့ကြောင်း၊ စိုးရိမ်နေကြကြောင်း ၎င်းက ဆက်ပြောသည်။
“အခုချိန်မှာ ဘယ်လက်နက်ကိုင်မှ ဒေသခံတွေကို မကာကွယ်ပေးဘူး။ ခဏနေ သျှမ်းလက်နက်ကိုင်က ဝင်လာလိုက်၊ TNLA ဝင်လာလိုက်၊ ပြည်သူ့စစ်က မြို့ကိုဖြတ်သွားလိုက်၊ စစ်တပ် မြို့ကို ဖြတ်သွားလိုက်နဲ့ ဘယ်လက်နက်ကိုင်မှ ဒေသခံတွေကို လုံခြုံရေး မလုပ်ပေးဘူး “ ဟု နမ့်ခမ်းဒေသခံ အမျိုးသားက ထပ်လောင်းပြောသည်။
နမ့်ခမ်းမြို့နယ်အတွင်း တိုင်းရင်းသား လက်နက်ကိုင်ဖြစ်သည့် ရှမ်းပြည်တိုးတက်ရေးပါတီ၊ ရှမ်းပြည်တပ်မတော် (SSPP/SSA)၊ တအာင်း (ပလောင်) အမျိုးသားလွတ်မြောက်ရေးတပ်မတော် (TNLA)၊ စစ်ကောင်စီ တပ်ဖွဲ့၊ စစ်ကောင်စီ လက်အောက်ခံ ရဲတပ်ဖွဲ့ နှင့် စစ်ကောင်စီ လက်အောက်ခံ ပြည်သူ့စစ်များ လှုပ်ရှားသည့် ဒေသဖြစ်သော်လည်း ဓားပြတိုက်မှု၊ ခိုးမှုသည် နေ့စဥ်နှင့်အမျှ ရှိနေကြောင်း ဒေသခံများက ပြောဆိုလိုက်သည်။
ထို့အပြင် စစ်တပ်က အာဏာသိမ်းပြီးနောက်ပိုင်း နမ့်ခမ်းတွင် တရားဥပဒေ စိုးမိုးမှု မရှိတော့သဖြင့် ခိုးဆိုးလုယက်၊ ဓားပြတိုက်မှု များသည် ဒေသခံများထံ ဒုစရိုက် ပုံစံအမျိုးမျိုး ပြုလုပ်နေကြောင်း၊ ထိုသို့ ဒေသခံများက ဒုစရိုက် ခံစားရချိန်မှာ လမ်းသွားလမ်းလာ ဒေသခံများကို စစ်တပ်မှ ဆက်ကြေးကောက်ခံနေသေးကြောင်း သိရသည်။
Leave a Comments