ထိုင်း – မြန်မာ နယ်စပ် တာချီလိတ် – မယ်ဆိုင် ချစ်ကြည်ရေး တံတားအမှတ် (၁) ကို ယနေ့ ဖေဖော်ဝါရီ ၂၀ ရက် မနက်ပိုင်းက ဖွင့်လှစ်လိုက်ပြီ ဖြစ်ကြောင်း သတင်းရရှိသည်။

အဆိုပါ တာချီလိတ် – မယ်ဆိုင် ချစ်ကြည်ရေး တံတားအမှတ် (၁) ကို ဖြတ်သန်းသွားလာရန်အတွက် ကိုဗစ် – ၁၉ ကာကွယ်ဆေး ထိုးထားကြောင်း သက်သေခံ လက်မှတ် ရှိထားရမည်ဖြစ်ကြောင်း သိရသည်။

“ သွားချင်တဲ့ သူတွေကတော့ တန်းစီနေကြတယ်။ အများကြီး တန်းစီပြီး စောင့်နေကြတယ်။ မယ်ဆိုင်ဘက်ကို သွားမဲ့သူတွေပါ။ တံတားကို ဖြတ်သွားဖို့က ကိုဗစ် ကာကွယ်ဆေးထိုးထားတဲ့ သက်သေခံ လက်မှတ်ရှိ ထားရမယ်တဲ့။ အဲ့ဒါ မရှိထားရင်တေ့ာ သူတို့ကလည်း မပေးဝင်ဘူး” ဟု တာချီလိတ်မြို့ ဒေသခံ အမျိုးသမီးက ပြောသည်။

အဆိုပါ တာချီလိတ် – မယ်ဆိုင် တံတားအမှတ် ၁ ကို မနက် ၆ နာရီမှ ညနေ ၆ နာရီ အထိ ဖွင့်လှစ်သွားမည် ဖြစ်ကြောင်း သိရသည်။

ထိုအပြင် ယခင်က တံတား မပိတ်ခင်အထိ အဝင်ထွက် ပြောင်းလဲခြင်း မရှိကြောင်း တာချီလိတ် ခရိုင်၊ ပို့ဆောင်ရေး စီမံကိန်း ဦးစီးဌာန ခရိုင်ဦးစီးမှူး ဦးတင်စိုးက သျှမ်းသံတော်ဆင့်ကို ပြောသည်။

“ကန့်သတ်မှုတွေက မရှိပါဘူး။ ဟိုအရင်က မပိတ်ခင်တုန်းက အတိုင်းပါပဲ။ ကားတွေဆိုရင်လည်း မှတ်ပုံတင်ထားတဲ့ ကားဆိုရင်တော့ သွားလာလို့ရတယ်။ ကညန နားမှာ မှတ်ပုံတင်ထားတဲ့ ကားတွေဆိုရင်တော့ ပုံမှန်သွားလာလို့ရတယ်” ဟု ဦးတင်စိုးက ပြောသည်။

မြန်မာ – ထိုင်း နယ်စပ် တာချီလိတ် – မယ်ဆိုင် တံတားအမှတ် ၁ ကို ၃ နှစ်ကြာ ပိတ်လာခဲ့ပြီးနောက် ယနေ့ မနက်တွင် ပြန်လည်ဖွင့်လှစ်ခဲ့သည်။