သျှမ်းပြည် မူဆယ်ခရိုင် မူဆယ်မြို့ နှင့် နမ့်ခမ်းကြား စယ်လန့်ကျေးရွာရှိ ကုန်စုံဆိုင်များကို တအာင်းအမျိုးသား လွတ်မြောက်ရေး တပ်မတော် TNLA က စစ်ကောင်စီ ထုတ်ကုန်ရောင်းချမှု ရှိမရှိကို ဝင်ရောက် စစ်ဆေးကြောင်း သတင်းရရှိသည်။
ယနေ့ (ဖေဖော်ဝါရီ ၁၅) ရက် တွင် မူဆယ်မြို့နယ် စယ်လန့်ကျေးရွာရှိ ကုန်စုံဆိုင်များကို စစ်ကောင်ီစ ထုတ်ကုန်များကို မရောင်းချရန်အတွက် TNLA က ဝင်ရောက်စစ်ဆေးပြီး တားမြစ်ခဲ့ကြောင်း စယ်လန့် ဒေသခံ တစ်ဦးက သျှမ်းသံတော်ဆင့် ကိုပြောသည်။
“ ဆိုင်တွေထဲမှာ လာရောက် စစ်ဆေးနေတာ။ သူတို့ ဆိုင်တွေထဲမှာ စစ်ကောင်စီ ထုတ်ကုန်တွေ ရောင်းတာမျိုး ရှိလားဆိုတာ လာစစ်ဆေးတာ။ မရောင်းဖို့ လာတားမြစ်တာ” ဟု စယ်လန့် ဒေသခံတစ်ဦးက ပြောသည်။
အဆိုပါ စစ်ဆေးရာတွင် စစ်ကောင်စီ ထုတ်ကုန်များကို ရောင်းချခြင်းရှိထားသည့် ဆိုင်များကိုလည်း အရေးယူခြင်းမရှိသေးဘဲ နောက် ၃ ရက် ထပ်မံလာစစ်ဆေးမည်ဖြစ်သောကြောင့် မရောင်းချရန် တားမြစ်ထားကြောင်း သိရသည်။
ထပ်မံလာစစ်ဆေးရာမှ ရောင်းချထားသည်ကိုတွေ့ရှိပါက အရေးယူ ပြစ်ဒဏ်ပေးသွားမည် ဟု TNLA ဘက်မှ ဆိုင်ရှင်များကို ခြိမ်းခြောက်သွားကြောင်း စယ်လန့် ဒေသခံ အမျိုးသားတစ်ဦးက ပြောသည်။
“ ဒီတစ်ခေါက် လာစစ်တာ အရေးယူတာမျိုးလည်း မရှိဘူးတဲ့။ နောက် ၃ ရက်နေပြီးရင် ထပ်လာစစ်မယ်တဲ့။ အဲ့ခါမှ ထပ်တင်ရောင်းထားရင် ပြစ်ဒဏ်ပေးသွားမယ်လို့ ပြောတယ်။ စယ်လန့်ထဲမှာ ရှိတဲ့ ဆိုင်ကြီး ၊ ဆိုင်ငယ်တွေ အားလုံးကို စစ်ဆေးသွားတာပဲ” ဟု ၎င်းက ပြောသည်။
တအာင်းအမျိုးသားလွတ်မြောက်ရေးတပ်မတော် (TNLA) တပ်ဖွဲ့သည် ၎င်းတို့ သွားလာလှုပ်ရှားသည့် နယ်မြေအတွင်း စစ်ကောင်စီ ထုတ်ကုန်များကို မရောင်းချရန်အတွက် တားမြစ်ထားသည်။
