သျှမ်းပြည် လားရှိုးခရိုင် လားရှိုးမြို့နယ်တွင်း စစ်ကောင်စီ ဒုတိယ ပြန်ကြားရေးတာဝန်ခံ ဗိုလ်ချူပ် ဇော်မင်းထွန်း နှင့် လူမှုကယ်ဆယ်ရေး ဝန်ကြီးဌာန ဒေါ်သက်သက်ခိုင် တို့က လားရှိုးမြို့နယ်တွင်း ရောက်ရှိနေသည့် အတွက်ကြောင့် လောင်းကစားဝိုင်းများ ပိတ်သိမ်းထားကြောင်း စုံစမ်းသိရှိရသည်။

ပြီးခဲ့သည့် ဖေဖော်ဝါရီ ၁၀ ရက်မှစပြီး ဗိုလ်ချုပ် ဇော်မင်းထွန်း နှင့် လူမှုကယ်ဆယ်ရေးဝန်ကြီး ဌာန ဒေါ်သက်သက်ခိုင် တို့ လားရှိုးမြို့သို့ ရောက်ရှိလာသဖြင့် ယခုပတ်အတွင်း လောင်းကစားဝိုင်းများကို သက်ဆိုင်ရာများက ယာယီ ပိတ်သိမ်းထားရန် ညွှန်ကြားထားကြောင်း သိရသည်။

“ သူတို့ အစည်းဝေးလာတယ်လို့ ကြားတယ်။ မြောက်ပိုင်းလက်နက်ကိုင်တွေနဲ့ တွေ့ဖို့ အစည်းဝေးလာတာ၊ တရုတ် နဲ့ ရထား စီမံကိန်းအတွက်လာတာလား မသိဘူး။ မသေချာဘူး။ သူတို့တော့ ရောက်နေတယ်။ လာတာ ၅ ရက်လောက်ရှိနေပြီ။ သူတို့ လာလို့ လောင်းကစားဝိုင်းတွေကို ပိတ်ထားတယ် ” ဟု လားရှိုးမြို့အတွင်း တက်ကြွလှုပ်ရှားသူ တစ်ဦးက ပြောသည်။

ဗိုလ်ချုပ်ဇော်မင်းထွန်း နှင့် ဒေါ်သက်သက်ခိုင်တို့သည် လားရှိုးမြို့နယ်အတွင်းသို့ လျှို့ဝှက်စွာရောက်ရှိ လာခဲ့ကြောင်း ဒေသခံများ ပြောပြချက်အရ သိရသည်။

လက်ရှိ လားရှိုးမြို့နယ်အတွင်းတွင် စစ်ကောင်စီတပ်ဖွဲ့များက စစ်ဆေးရေး တင်းကြပ်နေပြီး ၂၄ နာရီ စောင့်ကြည့် စစ်ဆေးနေလျက်ရှိကြောင်း သိရသည်။

“ လုံခြုံရေးတွေကလည်း တင်းကြပ်နေတယ်။ အရင်ကထက် တင်းကြပ်တယ်။ ရပ်ကွက်တိုင်း နေရာတိုင်းမှာ စစ်သားတွေက ရှိထားတယ်။ မြို့ဝင်မြို့ထွက်တွေဆိုလည်း ပိုပြီး စောင့်ကြည့်ထားတယ်။ ၂၄ နာရီလုံးစောင့်ကြည့်နေကြတာ။ ည အသွားလာတွေဆိုရင် စစ်ဆေးမေးမြန်းနေတယ်” ဟု ဒေသခံတစ်ဦးက ပြောသည်။

အလားတူ ဒေသခံတစ်ချို့မှာလည်း လားရှိုးမြို့နယ် တိုင်းမှူးပြောင်းလဲမှု အခြေအနေကြောင့် လောင်းကစားဝိုင်းများကို တစ်ပတ် ပိတ်သိမ်းထားကြောင်း သိရသည်။

စစ်တပ်က အာဏာသိမ်း ၂ နှစ်သာ ကာလအတွင်းတွင် သျှမ်းပြည်တွင်း လောင်းကစားဝိုင်း ၊ မူးယစ်ဆေးဝါး နှင့် ခိုးယူလုယက်မှုလည်း များပြားလာခဲ့သည်။

ထိုအပြင် လားရှိုးမြို့နယ်သည် တအာင်းအမျိုးသားလွတ်မြောက်ရေးတပ်မတော် TNLA၊ ရှမ်းပြည်တိုးတက်ရေးပါတီ SSPP/SSA တို့ သွားလာလှုပ်ရှားသည့် နေမြေဒေသတစ်ခုလည်း ဖြစ်သည်။