သျှမ်းပြည် ကျောက်မဲခရိုင် ကျောက်မဲမြို့ ရပ်ကွက် ၁ တွင် အမျိုးသမီး ၂ ဦး ဓားခုတ်ခံရပြီး ထိခိုက်ဒဏ်ရာ ရရှိသဖြင့် ကျောက်မဲ ဆေးရုံကြီးသို့ အရေးပေါ် ပို့ဆောင်လိုက်ရကြောင်း စုံစမ်း သိရှိရသည်။
ယနေ့ (ဖေဖော်ဝါရီ ၁၅) ရက် နံနက် ၈ နာရီခွဲတွင် ကျောက်မဲမြို့ ရပ်ကွက် ၁ အုတ်ကျင်းတွင် အသက် ၄၀ နှစ် ဝန်းကျင် အမျိုးသမီး ၂ ဦး ဓားခုတ်ခံရပြီး လက်ကောက်ဝတ် ပြတ်သွားရာ ကျန် ၁ ဦးသည် ဦးခေါင်းပေါ်မှ ဓားခုတ်ထားဒဏ်ရာ နှစ်ချက်ရထားကြောင်း 5 STARS-KME လူမှုကူညီရေးအသင်းမှ တာဝန်ခံတစ်ဦးက သျှမ်းသံတော်ဆင့်ကို ပြောသည်။
“ မနက်က ကျနော်တို့ ဖုန်းဆက် အကြောင်းကြားလာပြီး သွားကူညီခဲ့ရတာဗျ။ ဓားခုတ်ခံရတဲ့ အမျိုးသမီး ၂ ယောက်က အသက် ၄၀ နှစ် ဝန်းကျင်လောက်တော့ရှိတယ်။ သူတို့က ဘယ်က အပြန် ဓားခုတ်ခံရလည်းဆိုတာကော၊ ဘယ်သူက ခုတ်တာလဲဆိုတာကော မသိရဘူး “ ဟု ၎င်း တာဝန်ခံက ပြောသည်။
ဓားခုတ်ခံရမှုကြောင့် အမျိုးသမီးတစ်ဦးသည် လက်ကောက်ဝတ် တစ်ဖက်ပြတ်သွားကြောင်း ကျန်အမျိုးသမီးတစ်ဦးသည် ဦးခေါင်းပေါ်၌ ဓားခုတ်ထားသည့် ဒဏ်ရာ ၂ ချက်ဖြင့် သွေးထွက်လွန်ကာ ၎င်းတို့ကို ကျောက်မဲဆေးရုံမှ တစ်ဆင့် မန္တလေး ပြည်သူ့ဆေးရုံကြီးကို အရေးပေါ်ပို့ဆောင်ထားကြောင်း သိရသည်။
အဆိုပါ အမျိုးသမီး ၂ ဦး ဓားခုတ်ခံရမှု နှင့် ပတ်သက်ပြီး သျှမ်းသံတော်ဆင့် သတင်းဌာနမှ အသေးစိတ် စုံစမ်းနေဆဲဖြစ်သည်။
ထို့အပြင် ကျောက်မဲမြို့တွင် လောင်းကစားဝိုင်း ပေါများသောကြောင့် လောင်းကစားဝိုင်းမှ တစ်ဆင့် သူခိုး၊ ဓားပြများသည် ဒေသခံများထံ နေ့စဉ်နီးပါး ခိုးဆိုးလုယက် ပြုလုပ်နေကြောင်း သိရသည်။
ပြီးခဲ့သည့် (ဖေဖော်ဝါရီ ၉ ရက်) လားရှိုးမြို့နယ် ဆင်တောင်သစ်ခွကျောင်း အဝင်လမ်းတွင် အသက် ၄၀ နှစ် အမျိုးသားတစ်ဦး ဓားပြတိုက်ခံရပြီး ဦးခေါင်း ဓားခုတ်ထားသည့် ဒဏ်ရာ ၃ ချက်နှင့် လက်ဖျံရိုးကျိုး၊ ဝမ်းဗိုက်ဓားပြရှ ထိခိုက်ဒဏ်ရာ ရရှိခဲ့သည်။
Leave a Comments