သျှမ်းပြည် မူဆယ်ခရိုင် ကွတ်ခိုင်မြို့နယ် နမ့်ဖက်ကာတွင် စစ်ကောင်စီတပ်မှ လက်နက်ကြီးဖြင့် နှစ်ရက် ဆက်တိုက် ပစ်ခတ်နေကြောင်း သတင်းသိရသည်။
ယနေ့ ဖေဖော်ဝါရီလ ၁၄ ရက်နေ့ နံနက်ပိုင်း ၉ နာရီ ဝန်းကျင်မှ စတင်ကာ နမ့်ဖက်ကာ အမှတ် (၂) ရပ်ကွက်ရှိ စစ်ကောင်စီ ခြေလျင်တပ်ရင်း တပ်အမှတ် (ခလရ – ၁၂၃) မှ လက်နက်ကြီးများဖြင့် ပစ်ခတ်နေကြောင်း နမ့်ဖတ်ကာ ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
“ဒီနေ့ ၉ နာရီကျော်ကတည်းက စပြီးတော့ ခလရ ၁၂၃ တပ်ကနေ လက်နက်ကြီးတွေ ပစ်နေတယ်၊ အသံကလည်း အကျယ်ကြီးပဲ၊ အိမ်ထဲမှာပဲနေပြီး နားစွင့်နေတယ်၊ အပြင်တော့ မထွက်ရဲဘူး၊ ၆ လုံးလောက်ရှိနေပြီ၊ သေနတ်သံတွေတော့ မကြားရဘူး” ဟု နမ့်ဖက်ကာနေ အသက် ၃၀ ကျော် အမျိုးသမီးတစ်ဦးက သျှမ်းသံတော်ဆင့်ကို ပြောသည်။
အလားတူပင် ယမန်နေ့ ဖေဖော်ဝါရီလ ၁၃ ရက် ည ၆ နာရီကျော်တွင် အဆိုပါ ခလရ ၁၂၃ တပ် မှ လက်နက်ကြီးဖြင့် ၅ လုံး ထက်မနည်း ပစ်ခတ်မှုရှိခဲ့ကြောင်း အထက်ပါ အမျိုးသမီးက ဆက်ပြောသည်။
“မနေ့ ည (ဖေဖော်ဝါရီလ ၁၃)နေ့ ည ကလည်း ခလရ ၁၂၃ တပ်ကနေ နမ့်ဖက်ကာ အရှေ့ဘက်ကို လက်နက်ကြီးတွေ နဲ့ လှမ်းပစ်တယ်၊ ဘာကို ဦးတည်ပြီး ပစ်မှန်းတော့ မသိဘူး၊ ပြန်ပစ်လိုက်တဲ့ အသံလည်း ကြားရတယ်၊ ဘယ်အဖွဲ့တော့ မသေချာဘူး” ဟု ၎င်းက ဆိုသည်။
နမ့်ဖက်ကာ အရှေ့ဘက်တွင် ကချင်လွတ်မြောက်ရေး တပ်မတော် KIA တပ်စခန်း တစ်ခုရှိနေကြောင်းလည်း ဒေသခံများထံမှ သိရသည်။
ဖေဖော်ဝါရီလ ၁၃ ရက် ညက စစ်ကောင်စီမှ ပစ်လိုက်သည့် လက်နက်ကြီး တစ်လုံးသည် နမ့်ဖက်ကာ အရှေ့ဘက် ပန်ဂျရော့ကျေးရွာအတွင်းသို့ ကျရောက်ပေါက်ကွဲပြီး လူနေအိမ် ထိခိုက် ပျက်စီးမှု ရှိခဲ့ကြောင်း သတင်းများ ထွက်ပေါ်လာသော်လည်း သျှမ်းသံတော်ဆင့်မှ သီးခြား အတည်ပြုနိုင်ခြင်း မရှိသေးပေ။
ထို့အပြင် ယမန်နေ့ ဖေဖော်ဝါရီ ၁၃ ရက်နေ့ ည ၇ နာရီဝန်းကျင်တွင် မူဆယ်မြို့နယ် နမ့်အုမ်ရွာ အထက်၌ ပစ်ခတ်သံများ ထွက်ပေါ်လာပြီး ထိတွေ့တိုက်ပွဲဖြစ်မည်ဟု ယူဆကြောင်း ဒေသခံများက သျှမ်းသံတော်ဆင့်ကို ပြောသည်။
“နမ့်အုမ်အထက်မှာ တိုက်ပွဲဖြစ်သံတွေ ကြားရတယ်၊ ကျနော်တို့နဲ့ အသံလာတဲ့နေရာ နည်းနည်းဝေးတယ်၊ ဘာမှန်းတော့ မသိရသေးဘူး၊ တိုက်ပွဲဖြစ်လောက်တယ်” ဟု မူဆယ်ဒေသခံအမျိုးသား တစ်ဦးက ပြောသည်။
မူဆယ်ခရိုင်အတွင်းသည် စစ်ကောင်စီ တပ်အပြင် တိုင်းရင်းသား လက်နက်ကိုင်တပ်ဖွဲ့များ ဖြစ်ကြသည့် SSPP/SSA တပ်ဖွဲ့၊ TNLA တပ်ဖွဲ့၊ KIA တပ်ဖွဲ့၊ MNDAA တပ်ဖွဲ့ နှင့် ဌာနေပြည်သူ့စစ် တပ်ဖွဲ့များ သွားလာ လှုပ်ရှား နေကြသည်။
အာဏာသိမ်း စစ်ကောင်စီ တပ်ဖွဲ့သည် ၂၀၂၃ ခုနှစ် ဇန်နဝါရီလ ၁ ရက်နေ့မှ စပြီး ဒီဇင်ဘာ (၃၁) ရက်နေ့ထိ တစ်နှစ်ကြာ အပစ်ရပ် ကြေညာထားသော်လည်း တကယ်တမ်း စစ်မြေပြင်တွင် တိုက်ပွဲများ ဆက်လက် ဖြစ်ပွားနေဆဲ ဖြစ်သည်။
ထိုသို့ အပစ်ရပ်ဆိုင်းကြောင်းကို ကြေညာချက် ထုတ်ပြန်မှုရှိခဲ့သော်လည်း အာဏာမသိမ်းခင်ကတည်းက တိုင်းရင်းသား လက်နက်ကိုင် တော်လှန်ရေးတပ်ဖွဲ့များ နှင့် ပြည်နယ်များတွင် တိုက်ခိုက်မှုများ ဆက်တိုက် ဖြစ်ပွားသည့်အပြင် သျှမ်းပြည်၊ ကရင်ပြည် နှင့် ချင်းပြည် တို့ကို စစ်အင်အား တိုးချဲ့ခြင်း၊ စစ်ဆင်ရေးလုပ်ခြင်းများ ရပ်ဆိုင်းခြင်း မရှိခဲ့ပေ။
