Thursday, May 30, 2024

လားရှိုးတွင် လောင်းကစားဝိုင်း ဖွင့်လှစ်ထားသည့် နေရာ (၅) နေရာထက်မနည်းရှိ

Must read

သျှမ်းပြည် လားရှိုးခရိုင် လားရှိုးမြို့တွင် လောင်းကစားဝိုင်းများ ဖွင့်လှစ်ထားသည့် နေရာ (၅) နေရာ ထက်မနည်း ပိုမိုဖွင့်လှစ်လာကြောင်း သတင်းရရှိသည်။

လားရှိုးမြို့ရှိ လောင်းကစားရုံ တစ်နေရာ

စစ်တပ်က အာဏာသိမ်းပြီး ၂ နှစ်ပြည့် ကာလအတွင်း လားရှိုးမြို့တွင် စစ်ကောင်စီ လက်အောက်ခံ ဗိုလ်ကြီးရာထူး အဆင့်ရှိ ဗိုလ်ကြီးများ နှင့် ပြည်သူ့စစ်များ ပူးပေါင်းပြီး လောင်းကစားဝိုင်းများကို အဆမတန် ပိုမိုဖွင့်လှစ်လာရာ လက်ရှိမှာ (၅) နေရာထက် မနည်းရှိနေပြီ ဖြစ်ကြောင်း လားရှိုးမြို့ဒေသခံ အမျိုးသားတစ်ဦးက ပြောသည်။

လားရှိုးမြို့နယ် ရပ်ကွက် (၅)၊ (၆)၊ (၇) အပါအဝင် ဝမ်နား၊ မယ်ဟန်၊ ဟတ်ကာနှင့် ဟိုပိတ်ကျေးရွာတွင် ပေါ်ပေါ်ထင်ထင် လောင်းကစားဝိုင်းများ ဖွင့်လှစ်ထားကြောင်း တချို့နေရာများတွင် လျှို့ဝှက်ပြီး ဖွင့်လှစ်ထားကြောင်း သတင်းရရှိသည်။

“လောင်းကစားဝိုင်းက အရမ်းများတယ် (၅) နေရာလောက်ရှိတယ်။ စစ်ကောင်စီတပ်ဖွဲ့နဲ့ ပြည်သူ့စစ်တို့က ပူးပေါင်းပြီး လွှတ်လွှတ်လပ်လပ် ဖွင့်လှစ်ထားတာပါ။ သွားဆော့တဲ့သူက စုံပါတယ် ကလေး၊ လူကြီး၊ အမျိုးသမီး၊ တချို့က ကလေးငယ်တွေချီပြီး သွားဆော့ကြသေးတယ် “ ဟု ၎င်းက ပြောသည်။

လောင်းကစားဝိုင်းထဲတွင် လေးကောင်ဂျင်၊ ကုံးကင်း၊ တရုတ်ဖဲ စသည့်ဖြင့် လူကြိုက်များသည့် လောင်းကစားဝိုင်းများကို ထည့်သွင်းထားကြောင်း သိရသည်။

အဆိုပါ လောင်းကစားဝိုင်းများ ပေါများလာခြင်းကြောင့် ဒေသခံများသည် ခိုးဆိုးလုယက် ဒုစရိုက်များလည်း ယခင်ကထက် များစွာပေါများလာသည်။

လားရှိုးမြို့ရှိ လောင်းကစားရုံ တစ်နေရာ

“ယမန်နေ့ညက ကျောင်းဝန်းထဲမှာ ဆိုင်ကယ် ၃ စီး ထပ်မံ ခိုးခံရတယ်။ ကျောင်းဝန်းထဲကို ဝင်ခိုးသွားတာဗျ။ ပစ္စည်းတွေ ခိုးခံရတာတော့ ခဏခဏပါပဲ။ လုံခြုံစိတ်ချလည်း မရှိတော့ဘူး။ လောင်းကစားဝိုင်းလည်း ပေါတော့ သူခိုး၊ ဓားပြလည်း ပေါတယ် “ ဟု ၎င်းက ထပ်လောင်းပြောသည်။

လောင်းကစားဝိုင်းကို စစ်ကောင်စီ လက်အောက်ခံ ဗိုလ်ကြီးရာထူးအဆင့်ရှိ ဗိုလ်ကြီးနေမင်း၊ ဗိုလ်ကျသည့် ဦးမောင်ကြီး၊ စီးပွားရေး လုပ်ငန်းရှင်တချို့များ နှင့် မန့်နားပြည်သူ့စစ်တို့က ပူးပေါင်းပြီး ဖွင့်လှစ်ထားကြောင်း သိရသည်။

ထို လောင်းကစားဝိုင်းများကြောင့် ပြီးခဲ့သည့် (ဖေဖော်ဝါရီ ၉ ရက်) တွင် အသက် ၄၀ နှစ် အမျိုးသားတစ်ဦး လားရှိုးမြို့နယ် ဆင်တောင်သစ်ခွကျောင်း အဝင်လမ်းတွင် ဓားပြတိုက်ခံရပြီး ဦးခေါင်း ဓားခုတ်ဒဏ်ရာ ၃ ချက်၊ လက်ဖျံရိုးကျိုးပြီး ဝမ်းဗိုက်တွင် ဓားပြတ်ရှ ထိခိုက်ဒဏ်ရာ ရရှိခဲ့သည်။

Leave a Comments

- Advertisement -spot_img

Latest article