ထိုင်းနိုင်ငံ ချင်းမိုင်မြို့တွင် ထိုင်းနိုင်ငံရောက် သျှမ်းလူထုများက မဟာဒေဝီ စဝ်ဆုစန္နီ ကွယ်လွန်အနိစ္စ ဝမ်းနည်းအောက်မေ့ဖွယ် ဆွမ်းကပ် အလှူပြုလုပ်ခဲ့ကြသည်။

ယနေ့ (ဖေဖော်ဝါရီ ၁၁ ရက်) ရက် နံနက်ပိုင်း ၉ နာရီမှစပြီး နေ့လည် ၁၂ နာရီအထိ သျှမ်းလူထုများအပါအဝင် ဆွေမျိုးများနှင့် နီးစပ်သူများအားလုံး လူဦးရေ ၁၀၀ ကျော်သည် မဟာဒေဝီ စဝ်ဆုစန္နီ ကွယ်လွန်အနိစ္စ ဝမ်းနည်း အောက်မေ့ဖွယ်ကြောင်းကို ဆွမ်းကပ် လှူဒါန်းမှု ပြုလုပ်ခဲ့သည်။

“ စဝ်မေ (မဟာဒေဝီ) က ကျမတို့ သျှမ်းပြည်တိုင်းရင်းသား အပါအဝင် သျှမ်းလူမျိုးများအတွက် ကိုယ်ကျိုးစွန့်ပြီး လှုပ်ရှား ကူညီထောက်ပံ့ပေးတာ အံ့မခန်းပါ။ ဒါတွေကို ကျနော်၊ ကျမ တို့က ကြိုးစား လက်ဆင့်ကမ်း တာဝန်ထမ်းယူပြီး ရှေ့ဆက် သျှမ်းပြည် ဖွံ့ဖြိုးတိုးတက်ရေးအတွက် လုပ်ဆောင်သွားမယ် “ ဟု ပွဲစီစဉ်သူ နန်းစံတောင်းက ပြောသည်။

ဒီနေ့ ပြုလုပ်ခဲ့သည့် အထိမ်းမှတ်ဟာ အဓိက မဟာဒေဝီအတွက် ရည်စူးပြီး အလှူအတန်းများ ပြုလုပ်ပေးခဲ့ပြီး မဟာဒေဝီ ရဲ့ ဘဝ သမိုင်းအကြောင်းတွေကို ဓာတ်ပုံနှင့် တကွ လာရောက်လေ့လာနိုင်အောင် ပြုလုပ်ခဲ့ခြင်း ဖြစ်ကြောင်း ပွဲစီစဉ်ထဲပါဝင်သူ တစ်ဦးဖြစ်သည့် နန်းမွေလျန်းက ထပ်လောင်းပြောသည်။

“အဓိကတော့ ပြီးခဲ့တဲ့ ၆ ရက်က ကံကုန်သွားတဲ့ စဝ်မယ် ဆုစန္ဒီကို ရည်စူးပြီးတော့ ကောင်းမှုကုသိုလ်တွေ၊ ဆွမ်းကပ်တာတွေ လုပ်တယ်။ ဗုဒ္ဓဘာသာ ထုံးစံအရ ကောင်းမှုကုသိုလ်တွေ ပြုလုပ်တယ်။ စဝ်မယ် အထိမ်းမှတ်အနေနဲ့ ဓာတ်ပုံတွေ ပြသတာတွေ ပြုလုပ်တယ်။ အဓိကတော့ စဝ်မယ်ရဲ့ အထိမ်းမှတ်အနေနဲ့ ကောင်းမှုကုသိုလ်တွေ ပြုလုပ်ခဲ့တယ်” ဟု နန်းမွေလျန်းက ဆိုပြန်သည်။

အသက် ၉၁ နှစ်အရွယ်ရှိ သီပေါစော်ဘွား စဝ်ကြာဆိုင်၏ မဟာဒေဝီ စဝ်ဆုစန္ဒီဟာ ဖေဖော်ဝါရီ ၆ ရက် နံနက်ပိုင်းတွင် အမေရိကန်ရှိ နေအိမ်တွင် သက်ကြီးရောဂါဖြင့် ကွယ်လွန် အနိစ္စ ရောက်ခဲ့သည်။