သျှမ်းပြည် လားရှိုးခရိုင် လားရှိုးမြို့တွင် အသက် ၄၀ နှစ် ဝန်းကျင် အမျိုးသားတစ်ဦးသည် ဓားခုတ်ခံရပြီး ဦးခေါင်းတွင် ထိခိုက်ဒဏ်ရာ ရထားကြောင်း သတင်းရရှိသည်။
ယမန်နေ့ (ဖေဖော်ဝါရီ ၉) ရက် နံနက်ပိုင်း ၁၀ နာရီခွဲဝန်းကျင်တွင် လားရှိုးမြို့နယ် ဆင်တောင်သစ်ခွကျောင်း အဝင်လမ်း၌ အသက် ၄၀ အရွယ်ရှိ အမျိုးသားတစ်ဦးကို လူတစ်စုက ဓားပြတိုက်ပြီး ဓားဖြင့်လိုက်လံ ခုတ်သတ်ရန် ကြိုးစားခဲ့ကြောင်း သိရသည်။
ထိုလိုက်လံ ခုတ်သတ်ခံရသည့် အသက် ၄၀ အရွယ်ရှိ အမျိုးသားသည် ထွက်ပြေးလွှတ်မြောက်လာသော်လည်း ဦးခေါင်းတွင် ဓားဒဏ်ရာ ၃ချက် ထိကာ ကြောက်စိတ်ကြောင့် အသိမှတ်ဥာဏ်မဲ့သည့်အထိ ဖြစ်သွားကြောင်း လားရှိုးရွှေလှိုင်မေတ္တာ လူမှုကူညီရေးအသင်းမှ တာဝန်ခံတစ်ဦးက ပြောသည်။
“ သူ့ကို စစတွေ့တဲ့အခါမှာ သူရဲ့ အသိအာရုံက ချို့ယွင်းနေပြီ။ သူတို့ လိုက်ရိုက်လို့၊ လိုက်ခုတ်လို့ ဆိုပြီး ထွက်ပြေးလာတာပဲ ပြောနိုင်တယ်ဗျ။ အတော်ကြီးကို ဟို့အဝေးပြေးလာခဲ့တယ်လို့ ထင်တာဘဲဗျ၊ ရောက်တဲ့နေရာမှာ လက်ညှိးနဲ့ ထိုးထိုးပြနေတာ။ သူ့ဆီမှာ ဘာတွေပါသွားလည်း မေးလို့ လုံးဝမရဘူးဗျာ။ ဦးခေါင်းမှာ ဓားခုတ်ဒဏ်ရာ ၃ ချက်၊ လက်ဖျံရိုးတစ်ဖက် ကျိုးထားတယ်။ ဝမ်းဗိုက်မှာလည်း ပြတ်ရှထားတဲ့ ဓားဒဏ်ရာဒဏ်ချက်တွေ ရထားတယ် “ ဟု ၎င်း တာဝန်ခံတစ်ဦးက ပြောသည်။
အဆိုပါ ထိခိုက်ဒဏ်ရာများစွာ နှင့် အမျိုးသားတစ်ဦးသည် ၎င်းကို ဓားပြတိုက်တစ်စုမှ တိုက်ခိုက်ထားကြောင်း ယူဆထားသည်ဟု သိရသည်။
ထို့အပြင် ဒေသခံများအနေဖြင့် အပြင်သို့သွားလာသည့် အခါတိုင်း အန္တရာယ်ဇုံထဲသို့ ရောက်ရှိနေကြောင်းကို သတိပြုပြီး အသွားအလာ ဆင်ခြင်ကြရန် ၎င်းက တိုက်တွန်းထားသည်။
“ ပြည်သူတွေ အနေနဲ့ သတိရှိအောင်၊ ဆင်ခြေနိုင်အောင် ပြောပြချင်တယ်။ ကျနော်တို့တွေ အန္တရာယ်ဇုံထဲ ရောက်ရှိနေကြောင်းကို လူတိုင်းတော့ သိထားသင့်ပါတယ်။ ဒီချိန်မှာ လုံခြုံမှုဆိုတာ ဘာမှ မရှိတော့ဘူး၊ ကိုယ်စီ သတိထားနေထိုင်ကြပါ “ ဟု ၎င်းက တိုက်ထွန်းထားသည်။
လက်ရှိ ဓားခုတ်မှုခင်းမှာ ပထမဆုံးအကြိမ်တော့ မဟုတ်ကြောင်း၊ ယခင်က ဓားခုတ်မှု မကြာခဏဖြစ်ပွား သော်လည်း သတိမှတ်ဥာဏ်မေ့သည့် အဆင့်ထိတော့ မရှိခဲ့ဖူးကြောင်း သိရသည်။
