Saturday, July 13, 2024

သီပေါမြို့တွင်း ဈေးဝယ်အဖြစ် ဟန်ဆောင်ပြီး ပစ္စည်းခိုးယူမှုများလာ

Must read

သျှမ်းပြည် ကျောက်မဲခရိုင် သီပေါမြို့တွင် စျေးဆိုင်များထံ စျေးဝယ်သူအဖြစ် ဟန်ဆောင်ပြီး ပစ္စည်းခိုးယူသူများလာကြောင်း စုံစမ်းသိရသည်။

ဆိုင်ထဲဝင်ခိုးသည့် အမျိုးသား

ယမန်နေ့ (ဖေဖော်ဝါရီ ၉) ရက် ညနေပိုင်း ၄ နာရီဝန်းကျင်တွင် သီပေါမြို့နယ် (ရွှေသီပေါ လျှပ်စစ်ဆိုင်) ထဲ၌ လင်မယား နှစ်ဦး ဈေးဝယ်အဖြစ် ဟန်ဆောင်ပြီး ဇနီးဖြစ်သူက မီးသီးဝယ်ရင်း ဟန်ပြပြီး လိုက်လံမေးမြန်းနေချိန်တွင် ၎င်း၏အမျိုးသားက ကောင်တာအံဆွဲထဲရှိ ( I phone 11 ) ကာဗာခဲရောင်ကို ခိုးနှိုက်ယူသွားကြောင်း ပိုင်ရှင်ဖြစ်သူ အမျိုးသားတစ်ဦးက ပြောသည်။

“ဟိုတနေ့ကလည်း ဆိုင်ကိုလာပြီး ဆံပင်မုတ်စက်မေးပြီး မဝယ်ဘူး ပြန်သွားတယ်။ အခုလည်း အဲ့လိုပဲ လင်မယား နှစ်ဦး မိန်းမက မီးသီးဝယ်ဖို့ ဘာညာမေးနေချိန်မှာ သူ့ယောင်္ကျားက အနောက်ကောင်တာ အံဆွဲထဲက ဖုန်းကို လူမမြင်တဲ့ အချိန်မှာ ခိုးနှိုက်သွားတာဗျ။ ပြီးလည်းပြီးရော ဘာမှမဝယ်ဘဲ ဆိုင်ပြင်ပြန်ထွက်သွားတယ် “ ဟု ၎င်းက ပြောသည်။

အဆိုပါ ခိုးခံရသည့် ( I phone 11) သည် လက်ရှိ ကာလပေါက်ဈေးမှာ ကျပ်ငွေ (၁၃) သိန်းတန်ကြောင်း သူခိုး၊ ဓားပြ များသည် ဒေသခံများထံ ပုံစံအမျိုးမျိုးဖြင့် ပစ္စည်းခိုး လုယက်မှုများ ပြုလုပ်နေကြောင်း သိရသည်။

ဆိုင်ထဲဝင်ခိုးသည့် အမျိုးသား

အလားတူ ပြီးခဲ့သည့် ဇန်နဝါရီလ နောက်ဆုံးအပတ် မှ ယနေ့ (ဖေဖော်ဝါရီ ၁၀) ရက်ထိ သီပေါမြို့တွင် ဒေသခံများ၏ ဆိုင်ကယ် စုစုပေါင်း (၅) စီးထက်မနည်း ခိုးခံနေရပြီ ဖြစ်ကြောင်း သိရသည်။

“ ကျနော့် ဆိုင်ကယ်တစ်စီး အိမ်ဝန်းထဲမှာ ရှိတောင်မှလေ သူခိုးတွေက မနက်အစောကြီး ကျနော့် အိမ်ခြံဝန်းထဲထိကို ခိုးဝင်ပြီး ဆိုင်ကယ်ကို ခိုးသွားတာ “ ဟု ဆိုင်ကယ်ခိုးခံရသည့် အမျိုးသားတစ်ဦးက ပြောသည်။

အဆိုပါ အခိုးခံရမှု နှင့် ပတ်သက်ပြီး ဒေသခံများက သက်ဆိုင်ရာ သီပေါမြို့နယ် ရဲတပ်ဖွဲ့ကို အကြိမ်ကြိမ် တိုင်ကြားထားသော်လည်း ပြစ်မှုကျူးလွန်သူကို ဖမ်းဆီးအရေးယူ ဆောင်ရွက်ခြင်း တစ်ကြိမ်မျှ မရှိခဲ့ပေ။

“ပစ္စည်း ခိုးခံရပြီး ရဲကို သွားတိုင်ပြီဆိုရင် ရဲကတော့ အိမ်ထိကိုလာပြီး ဘာဖြစ်တယ်၊ ညာဖြစ်တယ် အကျိုးအကြောင်းလေးတွေ စာအုပ်နဲ့မှတ်ပြီး ပြန်သွားတယ်။ သူခိုးတွေကို ဘာမှ အရေးယူဆောင်ရွက် ပေးတာမရှိဘူး။ သူခိုးတွေကိုလည်း တစ်ခါမှ မဖမ်းမိဘူး “ ဟု သီပေါမြို့နယ်ဒေသခံ အမျိုးသမီးတစ်ဦးက ပြောသည်။

စစ်တပ်က အာဏာသိမ်းပြီးနောက်ပိုင်း သီပေါမြို့အပြင် သျှမ်းပြည် တဝှမ်းလုံးတွင် သူခိုး၊ ဓားပြများ ပေါများလာနေပြီး ဒေသခံများသည် စိတ်ပိုင်းဆိုင်ရာ၊ ရုပ်ပိုင်းဆိုင်ရာ လုံခြုံရေး စိုးရိမ်မှုများ ကြီးထွားနေကြောင်း သိရသည်။

Leave a Comments

- Advertisement -spot_img

Latest article