သျှမ်းပြည် ကျိုင်းတုံခရိုင် ကျိုင်းတုံမြို့နယ်တွင်းရှိ ပန်းပုရုပ်ထု လုပ်ငန်းသည်များ ကိုဗစ် -၁၉ ကြောင့် ၃ နှစ်ခန့် ရပ်ဆိုင်းခဲ့ရပြီး ဝင်ငွေထိခိုက်ခဲ့ကြောင်း စုံစမ်း သိရှိရသည်။

ကျိုင်းတုံမြို့နယ်တွင်းရှိ ပန်းပုရုပ်ထု လုပ်ကိုင်သူများသည် ယခင်က ပန်းပုရုပ်ထုများကို တရုတ်နိုင်ငံတွင်းထိ သွားရောက်လုပ်ကိုင်ရသည့်အထိ ရှိခဲ့ရာမှ ကိုဗစ် – ၁၉ ကြောင့် ရပ်ဆိုင်းခဲ့ရကြောင်း သိရသည်။

“ ၃ နှစ်လောက်တော့ ရပ်ဆိုင်းခဲ့လိုက်ရတယ်။ ကိုဗစ်ကြောင့် ထိခိုက်ခဲ့တာပေါ့။ အရင်တွေကဆိုရင် တရုတ်နိုင်ငံထဲထိ သွားလုပ်ပေးရတာရှိတယ်။ ကိုဗစ်ကြောင့်ကော နိုင်ငံရေးကြောင့်ကော လုပ်တဲ့သူတွေလည်း ရုပ်ထုလုပ်ခိုင်းတဲ့ သူတွေမရှိတော့ဘူး” ဟု ကျိုင်းတုံမြို့ ပန်းပုရုပ်ထု ပြုလုပ်သူ က ပြောသည်။

လက်ရှိတွင် ကိုဗစ် – ၁၉ အနည်းငယ် လျော့ကျလာသည့်အတွက်ကြောင့် ယခုနှစ်မှစပြီး ပန်းပုရုပ်ထုကို ပြန်လည် လုပ်ကိုင်နေရကြောင်း သိရသည်။

အဆိုပါ ပန်းပုရုပ်ထု ပြုလုပ်ရာတွင်လည်း ယခုနောက်ပိုင်း မြေစေး နှင့် အသုံးပြုသူ နည်းပါးလာပြီး ဘိလပ်မြေစေးကို အသုံးပြုမှုများလာခဲ့ကြောင်း ပန်းပုဆရာ စိုင်းထွန်းလှိုင်းက ပြောသည်။

“ကျနော်တို့က ဘောင်ကို အရင်လုပ်တာ။ အထဲကနေ သံကြိုးနဲ့ အကွက်လေးဖြစ်အောင် ချည်လိုက်မယ်။ အဆင့်အဆင့် ချည်ပြီးမှ ရုပ်လုံးပေါ်အောင် မြေစေးနဲ့ထုလိုက်မယ်။ ပြီးမှ အချောသပ်မယ်။ တချို့နေရာဆိုရင် ပွတ်ယူတာရှိသလို တချို့နေရာမှာလဲ အကွက်ဖော်ဖို့ ထွင်းရတာလဲရှိတယ်။ အခုနောက်ပိုင်း မြေစေးအစား ဘိလပ်မြေစေးနဲ့ လုပ်လာကြတယ်” ဟု ၎င်းက ပြောသည်။

ထိုအပြင် ရုပ်ထုကိုလည်း လှပရန် နေဒဏ်မိုးဒဏ် ခံနိုင်အောင်လည်း ဆေးရောင်ကို ရွေးချယ်ပြီးသုတ်ရကြောင်း၊ ပန်းပုရုပ် ကောင်းမွန်စွာ ရရှိရန် အတွက် အသေးစိတ်လုပ်ရကာ စိတ်ရှည်ထားရကြောင်း သိရသည်။

ပန်းပု ရုပ်ထုကိုလည်း ယုံကြည်ကိုးကွယ်ရာ အနေဖြင့် ပန်းပုဆရာတွေက အများစု ထုလုပ်ကြကြောင်းသိရသည်။

“ရုပ်ထုလှအောင်ထုဖို့က စစထုကတည်းက အာရုံစိုက်ဖို့လိုပါတယ်။ ရုပ်ထုရလာပြီဆိုရင် ကော်ပတ်နဲ့တိုက်မယ်။ ရေဆွတ်ပေးရတယ်။ ပြီးမှ အောက်ခံဆေးရည်သုတ်တယ်။ လိုချင်တဲ့ အရောင်ရအောင် အထပ်ထပ်ဆေးရောင် ခြယ်ပါတယ်။ ယုံကြည်ကိုးကွယ်ရာ ရုပ်ထုဆိုတော့ ရုပ်ထုမလှရင် ထုဖျက်ပစ်ဖို့ကလဲ မကောင်းတတ်ဘူးလေ။ ဒါကြောင့် ပန်းပုဆရာက စိတ်ရှည်လက်ရှည်နဲ့ အသေးစိတ် တဆင့်ချင်းစီ လုပ်ဆောင်သွားရမယ်ဆိုတော့ အချိန်ပေးရပါမယ်” ဟု စိုင်းထွန်းလှိုင်း က ထပ်လောင်းပြောသည်။

ကိုဗစ် – ၁၉ နှင့် နိုင်ငံရေး အခြေနေကြောင့် သျှမ်းပြည်တွင်း ရိုးရာမုန့်လုပ်ရောင်းသူများ၊ အခြေခံ ရှာဖွေ စားသောက်သူများ၊ အိမ်ဆိုင်ဖွင့်သူများသည် စားဝတ်နေရေးအတွက် ရပ်တည်ရန် ခက်ခဲလာခဲ့သည်။