သျှမ်းပြည်မြောက်ပိုင်း လားရှိုးခရိုင် မိုင်းယော်တိုက်နယ်၊ ဂျာယန်ကျေးရွာ အနီးရှိ ဂျာယန်ပြည်သူ့စစ် တပ်သားသစ်ထဲတွင် အသက်မပြည့်သေးသည့် ကလေးလူငယ်များ ပါဝင်နေကြောင်း သတင်းရရှိသည်။

ဂျာယန်ပြည်သူ့စစ်တပ်စခန်းအတွင်းသို့ စစ်သားလုပ်ရန် ခေါ်ဆောင်သွားခြင်း ခံရသူများအနက် အသက် (၁၈) နှစ် မပြည့်သေးသည့် ကလေးသူငယ် (၂၀) ဦးပါဝင်ခဲ့ကြောင်း တအာင်း (ပလောင်) အမျိုးသား လွတ်မြောက်ရေး တပ်မတော် TNLA ၏ ပြောရေးဆိုခွင့် ရှိသူ ဒု – ဗိုလ်မှူးကြီး တားအိုက်ကျော်က သျှမ်းသံဆင့်ကို ပြောသည်။

“ကျနော်တို့ တအာင်း လူမျိုးတွေကို အဲ့ဒီ ဂျာယန်ပြည်သူ့စစ် စခန်းထဲကို စစ်သားလုပ်ဖို့အတွက် ခြိမ်းခြောက်မှု နည်းလမ်းတွေ နဲ့ အတင်းအဓမ္မ ခေါ်ဆောင်သွားခံရတယ် ဆိုပြီး ရွာသားတွေ တိုင်ကြားလာလို့ ကျနော်တို့ စစ်အင်အားနဲ့ ပြန်ခေါ်ထုတ်ခဲ့တယ်၊ အဲ့မှာအသက်မပြည့်သေးတဲ့ ကလေးတွေ (၂၀) ဦးလောက်ပါတယ်” ဟု TNLA ၏ ပြောရေးဆိုခွင့် ရှိသူ ဒု – ဗိုလ်မှူးကြီး တားအိုက်ကျော်က ပြောသည်။

ပြီးခဲ့သည့် ဖေဖော်ဝါရီလ ၄ ရက် နံနက် ၄ နာရီတွင် ပြန်ခေါ်ထုတ်ခဲ့ခြင်းဖြစ်ပြီး TNLA တပ်ဖွဲ့မှ ဂျာယန် ပြည်သူ့စစ် တပ်စခန်းအတွင်းရောက်နေသည့် တအာင်း (ပလောင်) လူမျိုးများကို ပြန်လည် ကယ်ထုတ် လာချိန်၌ စစ်ကောင်စီတပ်ဖွဲ့မှ လေကြောင်းဖြင့် ဗုံးကြဲတိုက်ခိုက်မှု ပြုလုပ်ခဲ့ကြောင်း သိရသည်။

“ကျနော်တို့ လူကို ခေါ်ထုတ်လာတဲ့အချိန်မှာ စစ်ကောင်စီဘက်ကနေ လေယာဥ်နဲ့ ဗုံးကြဲတိုက်ခိုက်တာ ရှိခဲ့တယ်။ သေနတ်နဲ့လည်း လေယာဥ်ပေါ်ကနေ လှမ်းပစ်တယ်၊ ကျနော်တို့ဘက် ထိခိုက်ကျဆုံးမှုတော့ မရှိဘူး၊ ဂျာယန် ပြည်သူ့စစ်နဲ့လည်း ထိခိုက်ပစ်ခိုက်မှု မရှိဘူး” ဟု တားအိုက်ကျော်က ပြောသည်။

အဆိုပါ ကယ်ထုတ်လာသူများတွင် ကျား (၁၁၂) ဦး၊ မ (၁၅) ဦး စုစုပေါင်း ၁၂၇ ဦးတို့ကို ကယ်ထုတ်နိုင်ခဲ့ခြင်း ဖြစ်ပြီး အသက် ၁၈ နှစ်မပြည့်သေးသည့် လူငယ် (၂၀) ဦး ပါဝင်ကြောင်း သိရသည်။

ယင်းကဲ့သို့ TNLA မှ တအာင်းလူမျိုးများကို ကယ်ထုတ်ရန် စစ်ကြောင်းချီတက်သည့် အချိန်တွင် ဒေသခံများကို ဓားစာခံ/လူသားဒိုင်းကာအဖြစ် ဖမ်းဆီးခေါ်ဆောင်သွားမှုလည်း ရှိကြောင်း သတင်းထွက်ပေါ်လာသော်လည်း မဟုတ်မမှန်ကြောင်းသာ ဒု – ဗိုလ်မှူးကြီး တားအိုက်ကျော်က က ပြောသည်။

“ကျနော်တို့ သွားတဲ့အချိန်မှာ ကျနော်တို့လူပဲရှိတယ်၊ တခြားသူတွေ မပါပါဘူး၊ ရွာသားတွေကို ခေါ်သွားတာမျိုးလည်း မရှိဘူး” ဟု တားအိုက်ကျော်က ပြောသည်။

ဂျာယန်ပြည်သူ့စစ် တပ်စခန်းသည် ကွတ်ခိုင်မြို့နယ် ကောင်းခါးအခြေစိုက် ကောင်းခါးပြည်သူ့စစ် KDA ၏ တပ်တခု ဖြစ်ပြီး KDA သည် ယခင် ကချင်လွတ်မြောက်ရေး တပ်မတော် KIA တပ်၏ သျှမ်းပြည် အခြေစိုက် တပ်မဟာ (၄) ၏ တပ်မဟာမှူးဟောင်း ဦးမထုနော် ခေါင်းဆောင်နေသည်ဟု သိရသည်။

မိုင်းယော်တိုက်နယ်ရှိ ဂျာယန်ပြည်သူ့စစ် အခြေစိုက်ရာ ဂျာယန်ကျေးရွာသည် အိမ်ခြေ ၆၀၀ ကျော်ရှိပြီး သျှမ်း၊ ကချင် နှင့် တအာင်းများ စုပေါင်း နေထိုင်သော ကျေးရွာတစ်ခုဖြစ်သည်။