သျှမ်းပြည် ကျောက်မဲခရိုင် သီပေါမြို့ ဘူတာ မီးရထားလမ်းဘေးရှိ အိမ်ခြေ (၄၀၀) ကျော်ကို မီးရထားသံလမ်း ဧရိယာ အကွာအဝေး နှင့် မညီမျှဟုဆိုပြီး စစ်ကောင်စီ လက်အောက်ခံ ဌာနဆိုင်ရာက ရွှေ့ပြောင်းခိုင်းနေကြောင်း စုံစမ်းသိရှိရသည်။
စစ်တပ်သည် ၎င်းတို့၏ သတ်မှတ်ထားသော မီးရထားသံလမ်း နှင့် ဧရိယာ အကွာအဝေး မညီမျှသောကြောင့် သီပေါမြို့နယ် မီးရထားလမ်းဘေးရှိ အိမ်ခြေ (၄၀၀) ကျော်ကို ယခု (ဖေဖော်ဝါရီ) လကုန် ပါက တခြားနေရာသို့ အပြီးရွှေ့ပြောင်းနေထိုင်ရမည်ဟု သတင်းထွက်ပေါ်နေကြောင်း အိမ်ရွှေ့ပြောင်းရမည့် စာရင်းထဲမှ ပါရှိသူ အမျိုးသမီးတစ်ဦးက သျှမ်းသံတော်ဆင့်ကိုပြောသည်။
“အန်တီတို့ ဒီမှာနေတာ ကြာလှပြီ နှစ်ပေါင်း ၂၀ ကျော်ရှိနေပြီ။ အရင်တုန်းကတော့ ပေ ၇၅ ပေ၊ ကိုက် ၇၅ ကိုက် ကွာပြီး နေရမယ်လို့ ပြောတာပဲ။ အခုက အဲ့လိုမဟုတ်တော့ဘူး မီးရထား သံလမ်းဘေးမှာ သူတို့ဧရိယာနဲ့ မလွှတ်သမျှ အိမ်တွေ အကုန်ရွှေ့ရမယ်လို့ ပြောတယ်။ ရွှေ့ပြောင်းရမယ်ဆိုတာ ဟိုတလောတုန်းကမှ ကြားတာ။ အခုမှ ပိုဆိုးတာပေါ့ ၂ လပိုင်းကုန်ရန် ရွှေ့ရမယ်လို့ ကြားတယ်“ ဟု ၎င်း အမျိုးသမီးက ပြောသည်။
နှစ်ပေါင်း ၂၀ ကျော် နေထိုင်ရလာပြီးမှ မင်း အမိန့်ကြောင့် ကျောထောက်နောက်ခံ ဘာမျှမရှိသည့်အခါ တစ်နေ့ရှာ တစ်နေ့စား ဘဝဖြင့် နေအိမ် မဖြစ်မနေ ရွှေ့ပြောင်းခံရလျှင် ရွှေ့ပြောင်းမည်ဟု ၎င်းက ပြတ်ပြတ်သားသားဖြင့် ထပ်လောင်းပြောသည်။
ထို့အပြင် နေအိမ် ရွှေ့ပြောင်းခံရမှုနှင့် ပတ်သက်ပြီး စစ်တပ်က တစ်စုံတစ်ရာ နယ်မြေအသစ်ရှာဖွေပေးခြင်း၊ တာဝန်ယူပေးခြင်း မရှိသောကြောင့် လက်ရှိ နေအိမ် ရွှေ့ပြောင်းခံရသူများမှာ နေရာဒေသအတွက် စိုးရိမ်နေကြောင်း သိရသည်။
“ ရွှေ့ပြောင်းခံရရင် အခက်ခဲကတော့ ကြုံရမှာပေါ့ နေစရာမှ မရှိတာ။ ရွှေ့ပြောင်းခံရတဲ့သူတွေ အများစုလည်း ဒီတိုင်းပါဘဲ မရှိလို့ ဒီလို နည်းနည်းကျဉ်းကျဉ်းဘဝနဲ့ နေရတာပေါ့။ မြို့ထဲမှာလည်း မတတ်နိုင်ဘူးလေ၊ မရှိလို့နေတဲ့ ဆင်းရဲသား ရပ်ကွက်တွေပေါ့။ ဒီမှာ အကုန်လုံး ကျောင်းတက်အများစု မူလတန်းကျောင်းကလေးတွေများတယ်။ မိဘတွေ ရွှေ့နေရမှတော့ ကလေးတွေလည်း မိဘ နောက်လိုက်ပြေးရမှာပေါ့ “ ဟု ၎င်းက ဆက်ပြောသည်။
မီးရထားလမ်းဘေးတလျောက် နေထိုင်သူများသည် အခြေခံ လူတန်းစားများဖြစ်ကြပြီး နေ့စားလုပ်ကိုင်သူများ ဖြစ်ကြသည်။
“အဲ့ သံလမ်းဘေးမှာနေတဲ့သူတွေက အခြေခံလူတန်းစားတွေ၊ နေ့စားလုပ်ပြီး ဝမ်းဝတဲ့ သူတွေပေါ့။ ကလေးတွေကလည်း အများကြီးရှိတယ်။ ဒီလိုအချိန်မှာ သူတို့အတွက်တော့ အခက်အခဲတွေ အများကြီးပဲ။ လောဆယ်ကူညီတဲ့ သူတွေလည်းမရှိဘူး” လို့ သီပေါမြို့ ဒေသခံ အသက် ၄၀ ကျော် အမျိုးသမီး တစ်ဦးက သျှမ်းသံတော်ဆင့် ကိုပြောသည်။
အဆိုပါ ရွှေ့ပြောင်းခံရမည့် အိမ်ခြေ (၄၀၀) ကျော်ထဲတွင် ကျောင်းနေအရွယ် အလယ်တန်းအဆင့်၊ အထက်တန်းအဆင့် ကျောင်းသား/ သူ ဦးရေ စုစုပေါင်း (၄၀) ဝန်းကျင်ရှိကြောင်း၊ နေအိမ် အမှန်တကယ် ရွှေ့ပြောင်း နေထိုင်ရလျှင် အခက်ခဲ အမျိုးမျိုး ကြုံတွေ့ရာမှ ကလေးငယ်ကို ကျောင်းဆက်လက် မထားနိုင်မည်ကို မိဘများက စိုးရိမ်နေကြောင်းလည်း ဒေသခံများ၏ ပြောပြချက်အရ သိရသည်။
စစ်တပ်က အာဏာသိမ်းပြီး (၂) နှစ်ပြည့် ကာလအတွင်းမှာ သျှမ်းပြည်တွင် နိုင်ငံရေး အခြေအနေကြောင့် စီးပွားရေး အဆမတန် ကျဆင်းနေကာ အခြေခံ လူတန်းစားများအတွက်လည်း စားဝတ်နေရေးအတွက် ရှာဖွေစားသောက်ရန် ခက်ခဲသည့် ကာလဖြစ်သည်။
