သျှမ်းပြည် တောင်ကြီးခရိုင် တောင်ကြီးမြို့တွင် Power Bank (ပါဝါဘဏ်) အားသွင်းရာမှတစ်ဆင့် နေအိမ်တစ်လုံး မီးလောင်မှု ဖြစ်ပွားခဲ့ကြောင်း စုံစမ်းသိရှိရသည်။
ယမန်နေ့ (ဖေဖော်ဝါရီ ၇) ရက် ညနေပိုင်း ၄ နာရီ ၂၀ မိနစ်တွင် တောင်ကြီးမြို့ ကျောင်းကြီးစု ရပ်ကွက် နယ်မြေ (၉) သဇင်လမ်းသွယ် (၃) ရှိ နေအိမ်တစ်လုံးသည် ပါဝါဘဏ် အားသွင်းထားရာမှ တစ်ဆင့် မီးလောင်မှုဖြစ်ပွားခဲ့ပြီးနောက် နေအိမ်တစ်လုံး ပြာကျမှု ဖြစ်သွားကြောင်း တောင်ကြီးမြို့နယ် ကြက်ခြေနီ သူနာပြုတပ်ဖွဲ့မှ တာဝန်ခံတစ်ဦးက ပြောသည်။
“ အိမ်ရှင်က အဲ့မှာမနေဘူး၊ အိမ်ကို ဒီတိုင်းပစ်ထားတာဗျ။ အဲ့မှာ အမှိုက်ကောက်တဲ့ ကလေးတစ်ယောက်က နေနေတယ်။ ကျနော်တို့ သိသလောက်တော့ ပါဝါဘဏ် အားသွင်းထားရာကနေစပြီး မီးလောင်သွားတယ်လို့ ကြားတယ်ဗျ။ မီးလောင်တဲ့ အချိန်မှာက ဘယ်သူမှမရှိတော့ ထိခိုက်ဒဏ်ရာ ရသူတွေ မရှိဘူး“ ဟု ၎င်းက ပြောသည်။
အဆိုပါ မီးလောင်မှုနှင့် ပတ်သက်ပြီး မိမိတို့အနေဖြင့် အိမ်ပြင်ထွက်တိုင်း မီးမပေါ့ဆရန်၊ မီးခလုတ်များ ပိတ်၊ မပိတ် စစ်ဆေးမေးမြန်းခြင်း ပြုလုပ်စေချင်ကြောင်း ၎င်းက တိုက်တွန်းထားသည်။
“အဓိကတော့ အခုလည်း နွေလည်းရောက်ပြီ မီးလောင်မှုက အရမ်းဖြစ်တယ်ဗျ။ မီးကလည်း ပုံမှန်မလာတာကြောင့် အိမ်ပြင်ထွက်တိုင်း မီးမိန်းခလုတ်ချပြီး သွားကြပါ “ ဟု ၎င်းက တိုက်တွန်းလိုက်သည်။
စစ်တပ်က အာဏာသိမ်းပြီးနောက်ပိုင်း သျှမ်းပြည်တွင် မီးပုံမှန်လာနိုင်ခြင်း မရှိခြင်းကြောင့် လျှပ်စစ်မီးမှ တစ်ဆင့် မီးလောင်မှုမှာလည်း မကြာမခဏ ဖြစ်ပွားနေသလို ယခု ( ၂၀၂၃ ခုနှစ် ) အတွင်း တောင်ကြီးမြို့တွင် မီးလောင်မှု ၃ ကြိမ် ဖြစ်ပွားခဲ့ကြောင်း သိရသည်။
