သျှမ်းပြည်မြောက်ပိုင်း လားရှိုးခရိုင် လားရှိုးမြို့နယ်အတွင်းတွင် အာဏာသိမ်း စစ်ကောင်စီ နှင့် မြန်မာအမျိုးသား ဒီမိုကရက်တစ် မဟာမိတ်တပ်မတော် (MNDAA) တို့ ထိတွေ့ တိုက်ပွဲဖြစ်ပွားခဲ့ပြီး ဒေသခံ တချို့က စစ်ရှောင် ထွက်ပြေး နေရကြောင်း သတင်းသိရသည်။

ပြီးခဲ့သည့် ဇန်နဝါရီလ ၂၇ ရက်မှ စတင်ပြီး ယနေ့အထိ လားရှိုးမြို့နယ်အတွင်းတွင် MNDAA တပ်စခန်း နေရာသို့ စစ်ကောင်စီ တပ်ဖွဲ့မှ ဝင်ရောက်တိုက်ခိုက်ခဲ့ပြီး တိုက်ပွဲများ ဖြစ်ပွားခဲ့ကြောင်း နီးစပ်သည့် အမျိုးသား တစ်ဦးက သျှမ်းသံတော်ဆင့်ကို ပြောသည်။

“တိုက်ပွဲက ၂၇ ရက်နေ့ကတည်းက ဖြစ်တာ၊ ဒီကနေ့လည်း တိုက်ပွဲသံတွေ ကြားနေရတုန်းပဲ၊ စစ်ရှောင်ထွက်ပြေး နေရတဲ့ ဒေသခံတွေ ရှိတယ်၊ ရွာတွေထဲမှာ ပိတ်မိနေတဲ့ ဒေသခံတွေလည်း ရှိနေတယ်လို့ သိရတယ်၊ ဒါပေမယ့် စစ်သားတွေက ရွာနားမှာ ရှိနေတုန်းပဲ” ဟု နီးစပ်သည့် အမျိုးသား တစ်ဦးက သျှမ်းသံတော်ဆင့်ကို ပြောသည်။

အဆိုပါ တိုက်ပွဲဖြစ်ပွားသည့်နေရာသည် လားရှိုးမြို့နယ်ရှိ မန်ပန်ရွာ၊ မန်ဟစ်ရွာ နှင့် လွယ်ဆာတို့အနီးတွင် ဖြစ်ပွား နေသည်ဟု သိရပြီး စစ်ရှောင်ထွက်ပြေးရသူများ နှင့် ထိခိုက်ပျက်စီးမှုများကို သျှမ်းသံတော်ဆင့်မှ သီးခြား အတည်ပြုနိုင်ခြင်း မရှိသေးပေ။

အဆိုပါ တိုက်ပွဲဖြစ်ပွားမှုနှင့် ပတ်သက်ပြီး MNDAA ၏ ပြောရေးဆိုခွင့်များကို ကြိုးစားဆက်သွယ်ခဲ့သော်လည်း အဆက်အသွယ် မရခဲ့ပေ။

ပြီးခဲ့သည့် ဇန်နဝါရီ ၂၉ ရက် မွန်းလွဲပိုင်း ၁ နာရီခွဲ ဝန်းကျင်မှာလည်း စစ်ကောင်စီတပ်သည် လားရှိုးမြို့နယ်ရှိ TNLA တပ်ရင်း (၅၉၅) နေရာကို လက်နက်ကြီးဖြင့် တဖက်သတ် ပစ်ခတ်ခဲ့ပြီးနောက် စစ်ကြောင်းဖြင့် ထပ်မံ ထိုးစစ်ဆင် တိုက်ခိုက်ခဲ့သဖြင့် တိုက်ပွဲဖြစ်ပွား ခဲ့သည်။

အာဏာသိမ်း စစ်ကောင်စီ တပ်ဖွဲ့သည် ၂၀၂၃ ခုနှစ် ဇန်နဝါရီလ ၁ ရက်နေ့မှ စပြီး ဒီဇင်ဘာ (၃၁) ရက်နေ့ထိ တစ်နှစ်ကြာ အပစ်ရပ် ကြေညာထားသော်လည်း တကယ်တမ်း စစ်မြေပြင်တွင် တိုက်ပွဲများ ဆက်လက်ဖြစ်ပွားနေဆဲ ဟု သိရသည်။

ယနေ့အထိ စစ်ကောင်စီ နှင့် ထိတွေ့တိုက်ပွဲ ဖြစ်ပွားနေသည့် MNDAA တပ်ဖွဲ့သည် တစ်နိုင်ငံလုံး အပစ်အခတ် ရပ်စဲရေးစာချုပ် (NCA) လက်မှတ် ထိုးထားခြင်း မရှိသလို စစ်ကောင်စီ ဖိတ်ခေါ်သည့် ငြိမ်းချမ်းရေးဆွေးနွေးပွဲကိုလည်း တက်ရောက်ခြင်းမရှိပေ။