သျှမ်းပြည် မူဆယ်ခရိုင် ကွတ်ခိုင်မြို့နယ် နှင့် သီန္နီမြို့နယ်ထဲရှိ စစ်ဆေးရေးဂိတ်များတွင် ကားသမားများထံ ပိုက်ဆံပိုပြီး ကောက်ခံနေလျက်ရှိကြောင်း စုံစမ်းသိရှိရသည်။
ယခု ၂၀၂၃ ခုနှစ် ဇန်နဝါရီ ပထမပတ် ကစပြီး စစ်ဆေးရေးဂိတ်များတွင် စစ်ကောင်စီဂိတ်အပြင် ကချင်လွတ်မြောက်ရေးတပ်မတော် KIA , PDF တို့ကလည်း လမ်းသွားလာပြည်သူများကို ယခင်နှစ်ထက် ငွေပိုပြီး ကောက်ခံနေလျက်ရှိကြောင်း သိရသည်။
“ကျနော်တို့ ကွတ်ခိုင်ကနေ သီန္နီကို သွားတာ စစ်ကောင်စီ ဂိတ်ကောရှိတယ်။ တအာင်းတွေလည်း စစ်ဆေးနေတာရှိတယ်။ ပြီးတော့ KIA , PDF တွေလည်း စစ်ဆေးနေတာရှိတယ်။ သူတို့တွေက ပုံမှန်စောင့်ပြီး စစ်ဆေးနေကြတာတော့ မဟုတ်ဘူး။ တစ်ခါတစ်လေ စောင့် စစ်ဆေးနေပြီး ငွေကောက်ခံနေတာ ဖြစ်တယ်” ဟု ကွတ်ခိုင် – သီန္နီလမ်းကို ပုံမှန်သွားလာနေသည့် အမျိုးသားတစ်ဦးက ပြောသည်။
အဆိုပါ စစ်ဆေးရေးဂိတ်များသည် ကားတစ်စီးလျှင် ၅,၀၀၀ ကျပ်မှ ၁ သောင်း အထိ ကောက်ခံနေလျက်ရှိ ကြောင်း သိရသည်။
လက်ရှိ နိုင်ငံရေး အခြေအနေ မကောင်းသော်လည်း ဝမ်းရေးအတွက် ပြည်သူများက ခရီးသွားလာနေရပြီး တစ်ဖက်မှာလည်း စီးပွားရေး မကောင်း ချိန်ဖြစ်သည့်အတွက် ငွေပိုကောက်သည့် အပေါ် အဆင်မပြေမှု ဖြစ်နေကြောင်း ဒေသခံများက ပြောသည်။
” အခုကလည်း ခရီးပြန်သွားလာနေတဲ့ အချိန်ဖြစ်တယ်လေ။ သူတို့ ပိုက်ဆံတွေ ကောက်နေတော့ ကျနော်တို့ အမြတ်တွေ သိပ်မကျန်ဘူးပေါ့။ ပိုက်ဆံပဲ ကောက်တာပါ။ ဘာမှတော့ လုပ်တာမရှိဘူး။ ကားကြီးတော့ ဘယ်လောက်ကောက်လဲ မသိဘူး။ ကားသေးလောက်ပဲဆိုရင် ၁ သောင်းလောက်ထိ ကောက်တယ်။ အရင်တုန်းကဆိုရင် ၅ ထောင်လောက်ပဲ ပေးရတာ။ အခုက ပိုပြီးပေးရတာပေါ့” ဟု ကားသမားတစ်ဦးက ပြောသည်။
စစ်တပ်က အာဏာသိမ်းပြီးနောက်ပိုင်းတွင် သျှမ်းပြည်အတွင်း စစ်ကောင်စီ အပြင် တိုင်းရင်းသားလက်နက်ကိုင် တပ်ဖွဲ့များလည်း ခရီးသွားလာပြည်သူများကို အခွန်ပိုကောက်ယူနေလျက်ရှိကြောင်း သိရသည်။
ထို့အပြင် သီန္နီမြို့ နှင့် ကွတ်ခိုင် လမ်းသွားလာနေရသည့် ပြည်သူများသည်လည်း လုံခြုံမှု မရှိကြောင်း ဒေသခံများက ပြောသည်။
Leave a Comments