သျှမ်းပြည် ကျောက်မဲခရိုင် ကျောက်မဲမြို့နယ်ရှိ စစ်ဘေးရှောင်များသည် နောင်တစ်ချိန်မှာ လက်ဖက်နု ကောင်းကောင်း ရရှိရန်အတွက် နေရပ်ကိုပြန်ပြီး လက်ဖက်ခြံ ရှင်းနိုင်ရန် မျှော်လင့်နေကြောင်း စုံစမ်းသိရှိရသည်။

ကျောက်မဲမြို့တွင်ရှိသည့် စစ်ဘေးရှောင်များသည် တိုင်းရင်းသား လက်နက်ကိုင်တပ်ဖွဲ့များ တားမြစ်ချက်ကြောင့် နေရပ်ကို မပြန်နိုင်သေးဘဲ မြို့ထဲတွင် နေအိမ်လိုက်လံ ငှားရမ်းပြီး နေထိုင်နေရကြောင်း သိရသည်။

“ ဘာလို့လဲဆိုရင် အခုက လက်ဖက်ခြံတွေ ရှင်းတဲ့ချိန်ဖြစ်တယ်လေ။ ၄ လပိုင်း ၅ လပိုင်းကျရင် ရွှေပြည်လက်ဖက်တွေ ခူးနိုင်ဖို့အတွက်ဆိုရင် အခုက ခြံတွေ ၊ အညှောင့်တွေ သွားရှင်းထားရမယ်။ အဲ့ဒါမှ လက်ဖက်ကောင်းကောင်းတွေရမှာ” ဟု ကျောက်မဲမြို့တွင်းထဲရောက် စစ်ဘေးရှောင် အမျိုးသမီးတစ်ဦးက ပြောသည်။

အဆိုပါ ကျောက်မဲမြို့ရောက် စစ်ဘေးရှောင်များသည် နေရပ်မှ ထွက်ခွာလာရာတွင် ၂ နှစ်ရှိပြီဖြစ်သောကြောင့် နေရပ်ကို ပြန်ပြီး လက်ဖက်ခြံကို ပြန်လည်ပြုပြင်ချင်ကြောင်း စစ်ဘေးရှောင်များထံမှ သိရသည်။

“ လက်ဖက်ခြံကလည်း ပြုစုရတာ ခက်တယ်လေ။ တစ်နှစ် ၂ ကြိမ်လောက်က မြက်တွေကို ရှင်းပေးရတယ်။ မြက်တွေကို ပုံမှန်မရှင်းရင်လည်း မြက်က ထူနေပြီ။ ကြာကြာမှ တစ်ခါ မြက်လာရှင်းရင်လည်း မြက်က အရမ်းထူတယ်။ ကျမတို့ကလည်း ၁ နှစ်ကျော်လောက်ရှိပြီ မြက်တွေ မရှင်းပေးရတာဆိုတော့ အခုဆို တော်တော်လေး မြက်က ထူနေပြီထင်တယ်” ဟု အထက်ပါ အမျိုးသမီးက ပြောသည်။

ပုံမှန်လျှင် လက်ဖက်ခြံများကို တစ်နှစ်လည်း ၃ ကြိမ်ထက် အထိ မြက်ရှင်းပေးရကြောင်း သိရသည်။

လက်ရှိ ကျောက်မဲမြို့ထဲတွင် ရောက်ရှိနေသည့် စစ်ဘေးရှောင်များသည် ပြီးခဲ့သည့် ၂၀၂၁ ခုနှစ်က တိုင်းရင်းသားလက်နက်ကိုင် အချင်းချင်းတိုက်ပွဲကြောင့် ထွက်ပြေးတိမ်းရှောင်လာခဲ့ရသည့် ဟူးဆွန်ကျေးရွာ ဒေသခံများဖြစ်ကြောင်း သိရသည်။