သျှမ်းပြည်တွင်း ငြိမ်းချမ်းရေးတွင် သာမက တစ်နိုင်ငံလုံး ငြိမ်းချမ်းရေးအတွက်ဟု ဆိုကာ စစ်ကောင်စီ နှင့် သျှမ်းပြည်ပြန်လည်ထူထောင်ရေးကောင်စီ ၊ သျှမ်းပြည်တပ်မတော် (RCSS/SSA) တို့ ယနေ့ ဇန်နဝါရီ ၂၄ မနက် ၁၀ နာရီမှ မွန်းလွဲ ၃ နာရီထိ ဆွေးနွေးခဲ့ကြောင်း သိရှိရသည်။

အဆိုပါ ယနေ့ (ဇန်နဝါရီ ၂၄) ရက်တွင် စစ်ကောင်စီဘက်မှ အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်ရေး ဒု – ဗိုလ်ချုပ်ကြီး ရာပြည့် ဦးဆောင်သည့်အဖွဲ့ နှင့် (RCSS/SSA) ဥက္ကဌ ဗိုလ်ချုပ်ကြီး ယွက်စစ်တို့သည် ခေါင်းစဉ် ၃ ခုဖြင့် ဆွေးနွေးခဲ့ကြောင်း သိရသည်။

“ကျနော်တို့ ဒီနေ့တော့ ခေါင်းစဉ် ၃ ခုနဲ့ ဆွေးနွေးခဲ့တယ်။ ပထမတစ်ချက်ကတော့ သျှမ်းပြည်တွင်းငြိမ်းချမ်းရေး သာမကပဲ တစ်နိုင်ငံလုံး ငြိမ်းချမ်းရေးအတွက် ဆွေးနွေးခဲ့တယ်။ ပြီးတော့ ဖယ်ဒရယ်အရေးပေါ့။ ကိုယ်ပိုင်ပြဌာန်းခွင့်တွေ အတွက်လည်းဆွေးနွေးခဲ့တယ်။ နောက်ဆုံးတစ်ခုကတော့ နယ်မြေဒေသ ဖွံ့ဖြို့တိုးတက်ဖို့အတွက်တွေ ဆွေးနွေးခဲ့တယ်” ဟု ဒု – ဗိုလ်မှူးကြီး အုမ်ခေး က သျှမ်းသံတော်ဆင့်ကို ပြောသည်။

ထိုအပြင် လက်ရှိ ဆွေးနွေးရသည့်အကြောင်းရင်းသည် သျှမ်းပြည်တွင်း ပြည်သူများတိုက်ပွဲအတွင်း ငြိမ်းချမ်းစေရန်အတွက် အဓိက အားထားပြီး လာရောက်ဆွေးနွေးခဲ့ကြောင်း ဒု- ဗိုလ်မှူးကြီးက ထပ်လောင်းပြောသည်။

“ ပထမတော့ ကျနော်တို့ သျှမ်းပြည်တွင်း အဖက်ဖက်က တိုက်ပွဲတွေ ငြိမ်းချမ်းဖို့ ဖြစ်ပါတယ်။ အထင်မြင်မှားတာတွေလည်း ရှင်းလင်းသွားအောင်ပေါ့။ ပြီးတော့ အစိုးရကြားမှာကော လက်နက်ကိုင်အချင်းချင်းကြားမှာကော နားလည်မှု လွဲတာတွေလည်း ရှင်းလင်းအောင်လို့ ဆွေးနွေးခဲ့တာ ဖြစ်ပါတယ်။ ဘာလို့လဲဆိုတော့ ကျနော်တို့ ပြည်သူတွေကလည်း တိုက်ပွဲဒဏ်တွေ ခံစားနေရတာများနေပြီလေ” ၎င်းက ပြောသည်။

စစ်ကောင်စီ နှင့် (RCSS/SSA) ဆွေးနွေးပွဲကို ၃ ရက် ဆွေးနွေးသွားမည်ဖြစ်ကြောင်း သိရသည်။

ယနေ့ ဆွေးနွေးမှုသည် ဗိုလ်ချုပ်ကြီး ယွက်စစ် နှင့်အတူ RCSS ကိုယ်စားလှယ်အဖွဲ့များအဖြစ် ဗဟိုအလုပ်အမှုဆောင် ကော်မတီဝင်များ ဖြစ်သည့် ဗိုလ်မှူးကြီး ဆောင်းဟန်၊ ဒု – ဗိုလ်မှူးကြီး အုမ်ခေး၊ ဗဟိုဦးဆောင်ကော်မတီဝင်များ ဖြစ်သည့် ဗိုလ်မှူး နန်းမိုးမိုးစော၊ ဗိုလ်မှူး နန်းစံဖောင်း တို့နှင့် အထောက်အကူပြုများ ပါဝင်ကြောင်း သိရသည်။