သျှမ်းပြည် မူဆယ်ခရိုင် နမ့်ခမ်းမြို့ မြို့မဈေးအနီးတွင် အရှိန်ပြင်းထန်စွာဖြင့် မောင်းနှင်လာသော အိမ်စီးကားတစ်စီးသည် ဆိုင်ကယ်သုံးဘီး နှင့် ဝင်တိုက်မိပြီး ကားများ ပျက်စီးသွားကြောင်း သိရှိရသည်။
ယမန်နေ့ ဇန်နဝါရီ ၂၂ ရက် ညနေ ၅ နာရီခွဲတွင် နမ့်ခမ်းမြို့ မြို့မဈေးအနီးတွင် အမည်းရောင် အိမ်စီးကားတစ်စီး အရှိန်ပြင်းထန်စွာဖြင့် မောင်းနှင်လာရာ ဆိုင်ကယ်သုံးဘီး နှင့် ဝင်တိုက်မိပြီး တိမ်းမှောက်သွားကာ လမ်းမကြီးဘေး၌ ရပ်ထားသည့် ကားအဖြူရောင် တစ်စီးပေါ်သို့ ကျရောက်သွားကြောင်း နမ့်ခမ်းဒေသခံ အမျိုးသားတစ်ဦးက ပြောသည်။
“ယာဉ်မောင်း တရုတ်အမျိုးသားတစ်ဦးတော့ လက်မှာ ထိခိုက်ဒဏ်ရာ ရသွားတယ်။ ယာဉ်မောင်းသူကလွှဲပြီး ကျန်သူတွေတော့ ထိခိုက်ဒဏ်ရာမရဘူး။ အိမ်စီးကား နှစ်စီးနဲ့ သုံးဘီးကတော့ ပျက်စီးမှု များတယ်။ ဆိုင်တွေ၊ အိမ်ခန်းတွေတော့ မထိခိုက်သွားဘူး “ ဟု ၎င်းကပြောသည်။
အဆိုပါ မှုခင်းနှင့် ပတ်သက်ပြီး နမ့်ခမ်းမြို့နယ် ရဲတပ်ဖွဲ့များက စစ်ဆေးမေးမြန်းပြီး အရေးယူဆောင်ရွက်မှုများ ပြုလုပ်နေကြောင်း သိရသည်။
နမ့်ခမ်းပရဟိတ လူမှုကူညီရေးအသင်းမှ တာဝန်ခံတစ်ဦးက “လူတွေက ယာဉ်စည်းကမ်း၊ လမ်းစည်းကမ်းတွေ သိပ်နားမလည်ကြဘူး။ အဓိက ယာဉ်စည်းကမ်း နားလည်အောင် လုပ်ဖို့တော့ လိုတယ်။ ကျနော်တို့မှာက နယ်စပ်ဒေသဖြစ်တဲ့အတွက် လိုင်စင်မဲ့ ကားတွေလည်း များတော့ တချို့တွေက စည်းကမ်းမလိုက်နာဘူး။ လမ်းကို ပြောင်းပြန်မောင်းချင်သလို မောင်းကြတယ်။ သူတို့တွေက ယာဉ်စည်းကမ်း ဗဟုသုတ အားနည်းတယ် “ ဟု ၎င်းကပြောသည်။
ထို့အပြင် မြန်မာ – တရုတ်နယ်စပ်ဖြစ်သည့် မူဆယ်နှင့် နမ့်ခမ်းဒေသတွင် တစ်လလျှင် ပျှမ်းမျှ ယာဉ်တိုက်မှု ၂၀ ကြိမ်ထက်မနည်း ဖြစ်ပွားကြောင်း သိရသည်။
