သျှမ်းပြည် ကျောက်မဲခရိုင် သီပေါမြို့နယ် နမ့်လန်မြို့နယ်ခွဲရှိ ရွှေဆိုင်တစ်ခုကို သေနတ်ကိုင် အမျိုးသား နှစ်ဦးမှ ဝင်ရောက် ဓားပြတိုက်သွားကြောင်း သတင်းသိရသည်။
ယမန်နေ့ (ဇန်နဝါရီ ၂၀) ရက် ညနေ ၄ နာရီဝန်းကျင်တွင် နမ့်လန်မြို့နယ်ခွဲရှိ “သစ်ဆန်း” ရွှေဆိုင်သို့ သေနတ်ကိုင်ဆောင်ထားသည့် အမျိုးသား နှစ်ဦးက ဝင်ရောက်ဓားပြတိုက်ယူသည့်အတွက် ရွှေနှင့်ငွေစုစုပေါင်း တန်ဖိုး ၃၀၀ ကျော် ဆုံးရှုံးရကြောင်း ဒေသခံအမျိုးသား တစ်ဦးက သျှမ်းသံတော်ဆင့်ကို ပြောသည်။
“ဓားပြလာတိုက်တဲ့သူက အမျိုးသားနှစ်ဦး CZI ဆိုင်ကယ်စီးပြီးရောက်လာတယ်၊ တစ်ယောက် ဆိုင်ကယ်ပေါ် စောင့်ချိန်မှာ နောက်တစ်ယောက်က ဆိုင်ထဲကို ဝင်ပြီး သေနတ်နဲ့ လူကိုချိန်ပြီး ဓါးပြတိုက်ယူသွားတာ၊ ပြီးတော့ မိုးပေါ်ထောင်ပြီး သေနတ်တချက်ပစ်သွားတယ်၊ ဓားပြတွေရသွားတာ စုစုပေါင်း ကျပ်သိန်း ၃၀၀ ကျော်လောက် ရှိတယ်” ဟု အမည်မဖော်လိုသူ ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
ဓားပြတိုက်ခံရသည့် သစ်ဆန်း ရွှေဆိုင်သည် မြောက်ရပ်ကွက်ရှိ နမ့်လန်မြို့မဈေး မြောက်ဘက်တွင် ဖွင့်လှစ်ထားပြီး ပိုင်ရှင်ဖြစ်သူက မြို့လယ်ရပ်ကွက်တွင် နေထိုင်သူ ဖြစ်ကြောင်း သိရသည်။
အဆိုပါ သစ်ဆန်း ရွှေဆိုင် ဓားပြတိုက်ခံရခြင်းနှင့် ပတ်သက်ပြီး နေ့လည်နေ့ခင်းအချိန် ဓါးပြတိုက်ခံရမှုသည် နမ့်လန်မြို့နယ်ခွဲအတွင်း၌ ပထမဆုံးအကြိမ်သာ ဖြစ်ကြောင်းလည်း အထက်ပါ ဒေသခံအမျိုးသားက ဆက်ပြောသည်။
“မနေ့က လကွယ်နေ့ (ဥပုသ်နေ့) ဖြစ်နေတော့ ဈေးကတော့ ပိတ်ထားတယ်၊ ဈေးအပြင်ဘက်က ဆိုင်ခန်းတွေ အနည်းငယ် ဖွင့်ထားတာ ရှိပေမယ့် လူသိပ်မများဘူး၊ အခုလို နေ့လည်နေ့ခင်းချိန်မှာ ဓားပြတိုက်ခံရတာက ဒါပထမဆုံး အကြိမ်ပဲ၊ ဓားပြကိုလည်း မဖမ်းမိဘူး” ဟု ၎င်းက ပြောသည်။
ပြီးခဲ့သည့် ဇန်နဝါရီလ ၁၇ ရက်နံနက်ပိုင်းတွင်လည်း သျှမ်းပြည် မူဆယ်ခရိုင် မူဆယ်မြို့ရှိ လောဝ်ခမ်း ရွှေဆိုင်ကို သက်ကြီးအမျိုးသမီးနှစ်ဦးမှ ဝင်ရောက်လုယက်သည့်အတွက် စုစုပေါင်းတန်ဖိုး ကျပ်သိန်း ၃၀၀ နီးပါး ဆုံးရှုံးသည့် ဖြစ်စဥ်ဖြစ်ပွားခဲ့သည်။
စစ်ကောင်စီမှ နိုင်ငံတော် အာဏာသိမ်းယူပြီးနောက်ပိုင်းတွင် သျှမ်းပြည်အပါဝင် နိုင်ငံတစ်ဝှမ်းလုံး၌ ခိုးဆိုးလုယက်မှု၊ ဓားပြတိုက်မှု ပေါများလာပြီး သက်ဆိုင်ရာ လုံခြုံရေးတာဝန်ရှိသူများကလည်း နှိမ်နှင်းအရေးယူမှု မရှိသဖြင့် ပြည်သူများက လုံခြုံမှု မရှိကြောင်း ပြောဆိုညဥ်းတွားနေကြသည်။
