ထိုင်း – မြန်မာနယ်စပ် တာချီလိတ် – မယ်ဆိုင် တံတား အမှတ် (၁) ကို ဖွင့်လှစ်ဖြစ်ပါက လူအကန့်သတ်ဖြင့် သွားလာခွင့်ပြုမှာဖြစ်ပြီး ကိုဗစ် – ၁၉ ကာကွယ်ဆေးထိုးထားသည့် လက်မှတ်ပါ စစ်ဆေးသွားမည်ဖြစ်ကြောင်း စုံစမ်းသိရှိရသည်။
ယနေ့ ဇန်နဝါရီ ၂၀ တွင် တာချီလိတ်ခရိုင် အုပ်ချုပ်ရေးမှူး ဦးမြင့်နိုင် နှင့် သျှမ်းပြည် ဝန်ကြီးချုပ် တို့တွေ့ဆုံခဲ့ပြီး တံတားဖွင့်ရန်အတွက် သျှမ်းပြည်ဝန်ကြီးချုပ်ထံ တင်ပြခဲ့ကြောင်း သိရသည်။
အဆိုပါ တင်ပြချက်ထဲတွင် လုံခြုံရေးအတွက် စစ်ဆေးရန် (Portable X Rays) ကို တပ်ဆင်ရန်အတွက် တင်ပြခဲ့ကြောင်း တာချီလိတ်မဏ္ဍိုင်မှ ရေးသားထားသည်။
” သူတို့ အဝင် အထွက်လုပ်မဲ့ သူတွေကိုလည်း အကန့်သတ်နဲ့ပဲ ဖွင့်သွားမယ်တဲ့။ ပြီးတော့ ကိုဗစ် ကာကွယ်ဆေး ထိုးထားတဲ့ စာရွက်တွေကိုလည်း ဆေးစစ်မယ်တဲ့။ ပြီးတော့ လုံခြုံရေးအတွက်ဆိုပြီး Scan စက်ကိုလည်း တောင်းထားတယ်တဲ့” ဟု တာချီလိတ်မြို့ တက်ကြွလှုပ်ရှားသူတစ်ဦးက ပြောသည်။
ထို တံတားကို အမှန်တကယ် ဖွင့်လှစ်ဖြစ်ပါက တစ်နေ့လျှင် လူဦးရေ ၄ ထောင်မှ ၅ ထောင်အထိသာ ဖြတ်သန်းသွားလာခွင့်ပြုသွားမည် ဖြစ်ကြောင်း သိရသည်။
တာချီလိတ် – မယ်ဆိုင် ချစ်ကြည်ရေး တံတားအမှတ် (၁) ကို ထိုင်းနိုင်ငံဘက်မှ ဇန်နဝါရီ ၂၂ ရက်နေ့တွင် ဖွင့်လှစ်သွားမည်ဟု ကြေညာထားသော်လည်း မြန်မာနိုင်ငံဘက်မှ ဖွင့်လှစ်မည့်ရက်ကို အတိအကျ ကြေညာ ထားခြင်း မရှိသေးပေ။
” ဘယ်နေ့ ဖွင့်မလဲတော့ အတိအကျ မသိသေးဘူး။ ကြေညာထားတာလည်းမရှိဘူး။ ဒါမဲ့ ဖွင့်တော့မယ်လို့တော့ ကြားတယ်။ နေပြည်တော်ကနေလည်း ဖွင့်ဖို့အတွက် စာပို့လာပြီဆိုတော့ ဖွင့်ဖို့တော့ များမယ်ထင်တယ်။ ဒါမဲ့လည်း ယုံလို့ မရသေးဘူး” ဟု အထက်ပါ သူကပြောသည်။
တာချီလိတ် – မယ်ဆိုင် ချစ်ကြည်ရေး တံတားအမှတ် (၁) ကို ၃ နှစ်ကြာ ပိတ်ခဲ့ပြီ ဖြစ်ပြီး ယခုနှစ်အတွင်း ဖွင့်လှစ်ရန်အတွက် ပြင်ဆင်နေကြကြောင်း သိရသည်။
အလားတူ တံတားဖွင့်လှစ်ရန်အတွက် ဇန်နဝါရီ ၁၆ ရက်တွင်လည်း သန့်ရှင်းရေး ပြုလုပ်ခဲ့ကြောင်း သိရသည်။
Leave a Comments