Sunday, February 5, 2023

နေရပ်ပြန် ကျောက်မဲ စစ်ရှောင်များ စားသောက်ရေးအတွက် ခက်ခဲနေ

Must read

သျှမ်းပြည် ကျောက်မဲခရိုင် ကျောက်မဲမြို့မှ နေရပ်ပြန်ရောက်ရှိသွားသည့် ချုံးအုပ်စုရှိ ချုံးသစ်ရွာ၊ ချုံးဟောင်းရွာ မှ စစ်ဘေးရှောင်များသည် စားသောက်ရေးအတွက် အကူအညီများ လိုအပ်နေကြောင်း သတင်းသိရသည်။

TNLA မှ ချုံးဟောင်းရွာမှာ ဂိတ်ပြုလုပ်ထားပုံ

ပြီးခဲ့သည့် ရက်ပိုင်းအတွင်းတွင် ကျောက်မဲမြို့မှ စစ်ရှောင်များ ဖြစ်ကြသည့် ချုံးသစ်ရွာခံမှ အိမ်ထောင်စု ၅ အိမ် ၊ ချုံးဟောင်းမှ အိမ်ထောင်စု ၇ အိမ်မှ ပြည်သူများသည် နေရပ်ပြန်သွားကြပြီး လက်ရှိတွင် စားသောက်ရေးပိုင်း အတွက် ခက်ခဲနေကြောင်း နီးစပ်သည့် သတင်းရင်းမြစ်ထံမှ သိရသည်။

“ကျောက်မဲမြို့ပေါ်က စစ်ရှောင်စခန်းတွေမှာ စစ်ကောင်စီက ပေးမနေတော့ စစ်ရှောင်တွေကလည်း နေရပ်ကို ပြန်သွားရတယ်၊ အခုက ချုံးသစ် ချုံးဟောင်းရွာကို ပြန်သွားတဲ့ အိမ်ထောင်စု ၁၂ အုပ်စုက စားသောက်ရေး အတွက်တော့ အကူအညီ လိုအပ်နေတယ်” ဟု သျှမ်းတော်ဆင့် သတင်းရင်းမြစ် အမျိုးသား တစ်ဦးက သျှမ်းသံတော်ဆင့်ကို ပြောသည်။

ကျောက်မဲမြို့မှ ချုံးသစ် ချုံးဟောင်းရွာသို့ စစ်ရှောင်ပြည်သူများ နေရပ်ပြန်စဥ်တွင် ကျေးရွာအဝင် စစ်ဆေးရေး ဂိတ်ထောင်ထားသည့် တအာင်း (ပလောင်)အမျိုးသား လွတ်မြောက်ရေး တပ်မတော် (TNLA) တို့က စစ်ရှောင်များ ကျောက်မဲသို့ ပြန်သွားရန် စေခိုင်းမှုရှိခဲ့ရာ ဒေသအခြေစိုက် ရှမ်းပြည်တိုးတက်ရေးပါတီ SSPP/SSA မှ ဝင်ရောက် ညှိနှိုင်းရာ စစ်ရှောင်များက ကျေးရွာ အတွင်းဝင်ရောက်နေထိုင်ခွင့် ရလိုက်ကြောင်းလည်း သိရသည်။

လက်ရှိ ချုံးသစ် ချုံးဟောင်းရွာသို့ ရောက်ရှိလာသည့် စစ်ရှောင်ပြန် ပြည်သူများအနေဖြင့် ပါလာသည့် စားသောက်ကုန်များနှင့် SSPP မှ လာရောက်ထောက်ပံ့ပေးသည့် ရိက္ခာသာ ရှိနေကြောင်းလည်း အထက်ပါ ပုဂ္ဂိုလ်က ဆက်ပြောသည်။

“သူတို့ နေရပ်ပြန်ရောက်လာပြီ ဆိုပေမဲ့ ရှိရင်းအလုပ်တွေ ပြန်လည် လည်ပတ်နိုင်ဖို့လည်း မလွယ်ဘူးလေ၊ စစ်ရှောင်သွားရတာလည်း ၁ နှစ်ကျော်ပြီဆိုတော့ နေအိမ်ပျက်စီးတာတွေလည်း ပြုပြင်နေရသေးတယ်၊ ကာလတစ်ခုအတွက် သူတို့ ရိက္ခာအကူညီရနိုင်ရင်လည်း ကောင်းတာပေါ့” ဟု၎င်းက ဆက်ပြောသည်။

ပြီးခဲ့သည့် ၂၀၂၁ ခုနှစ် အစောပိုင်းကာလအတွင်းတွင် တိုင်းရင်းသားလက်နက်ကိုင် အချင်းချင်း ဖြစ်ပွားသည့် တိုက်ပွဲကြောင့် ချုံးအုပ်စု အပါအဝင် ကျောက်မဲခရိုင် မိုင်းငေါ့မြို့နယ်ခွဲအတွင်း စစ်ဘေးရှောင် (၇၀၀) ကျော်အထိ ရှိခဲ့သည်။

လက်ရှိတွင် စစ်ကောင်စီဘက်မှ ကျောက်မဲမြို့ပေါ်ရှိ စစ်ရှောင်များကို နေရပ်အသီးသီး ပြန်ကြရန် နှင့် စစ်ရှောင် စခန်း မရှိစေရန် ဖိအားပေး ခိုင်းစေမှုများကြောင့် ဒေသခံများက နေရပ်ပြန်ရခြင်း ဖြစ်သည်။

ချုံးအုပ်စု အတွင်းမှ နေရပ်ပြန်လည်ရောက်ရှိလာသော စစ်ရှောင်များအပြင် ကျောက်မဲမြို့နယ်အတွင်းရှိ နေရပ် မပြန်နိုင်သေးသည့် စစ်ရှောင်အသီးသီး နေရပ်ပြန်နိုင်ရေးအတွက် သက်ဆိုင်ရာ နယ်မြေခံ တိုင်းရင်းသား လက်နက်ကိုင် တပ်ဖွဲ့ အချင်းချင်းလည်း ဆွေးနွေးညှိနှိုင်းမှုများ ရှိနေကြောင်း သိရသည်။

Leave a Comments

- Advertisement -spot_img

Latest article