သျှမ်းပြည် တောင်ကြီးခရိုင် ပင်လောင်း – အောင်ပန်းကြား စစ်ကောင်စီ စစ်ဆေးရေးဂိတ်တွင် ပြည်သူသယ်ဆောင် လာသည့် ဘီယာများကို စစ်ကောင်စီက အဓမ္မသိမ်းယူကြောင်း သတင်းရရှိသည်။
ပြီးခဲ့သည့် သီတင်းပတ်က ပင်လောင်း – အောင်ပန်းကြား နောင်တရား မြို့နယ်ခွဲ ပြည်ထောင်စု ကားလမ်းမ စစ်ကောင်စီ စစ်ဆေးရေးဂိတ်တွင် စစ်ကောင်စီ နှင့် ပြည်သူ့စစ် တပ်သားတို့က ကားသမားများ သယ်ဆောင်လာသည့် ဘီယာ ၃၅ ဖာကို အဓ္ဓမ သိမ်းယူပြီး စားသောက်ကာ ပြည်သူများကို ကြမ်းတမ်းစွာ အော်ငေါက် စစ်ဆေးမေးမြန်းခြင်း ပြုလုပ်ခဲ့ကြောင်း ယာဉ်မောင်းသူ ဒေသခံ အမျိုးသားတစ်ဦးကပြောသည်။
အဆိုပါ စစ်ကောင်စီ စစ်ဆေးရေးဂိတ်တွင် စစ်ကောင်စီ တပ်ရင်း ၅၅ နှင့် ပြည်သူ့စစ် (PNO/PNA) များက စောင့်ဆိုင်းနေကြောင်းလည်း ၎င်းကပြောသည်။
“ အောင်ပန်းက ကုန်တင်လာပြီဆိုရင် နောင်တရားဂိတ်မှာ သူတို့အရမ်း စစ်ဆေးတယ်။ ယာဉ်မောင်းကားဆရာကို ခြိမ်းခြောက်ပြီး ကားပေါ်က ဆင်းခိုင်းတယ်။ ပြည်သူ ဝယ်လာတဲ့ ဘီယာ ၃၅ ဖာကိုလည်း သူတို့အလကား ယူတယ်။ သူတို့ယူပြီး သောက်တယ် မူးလာရင် ပြည်သူကိုရစ်တယ်၊ မေးတယ်ဗျ။ ဘယ်ကားတစ်စီးကိုမှ အလွှတ်မပေးဘူး “ ဟု ၎င်းက ပြောသည်။
အဆိုပါ ဘီယာ ၃၅ ဖာကို ဒေသခံ ပြည်သူများသည် စစ်ကောင်စီ၏ ဂိတ်မှူးများထံ အကြောင်းကြားပြီးနောက် ဘီယာ ၃၄ ဖာကို ပြန်လည်ရရှိခဲ့ကြောင်း သိရသည်။
ထို့အပြင် စစ်ဆေးရေးဂိတ်တွင် တခြားနယ်မှလာသည့် ဒေသခံများနှင့် စစ်ရှောင်များကိုလည်း စစ်ကောင်စီက အတင်းအကြပ် စစ်ဆေးမေးမြန်းသည်ဟုလည်း သိရသည်။
“ကျနော်က ဗိုးဗြဲက ဒေသခံဆိုပေမယ့် ပင်လောင်းမှာ အိမ်ထောင်ပြုနေတာ နှစ်နဲ့ချီနေပြီ။ ဒါကို စစ်ဆေးရေးဂိတ်မှာ သူတို့ ရစ်တယ်ဗျ။ ဘယ်ကလာလဲ၊ ဘယ်သူလဲ၊ ဘယ်မှာနေသလဲ အမျိုးမျိုး အစုံစုံ စစ်ဆေးတယ်။ သူတို့ စစ်ဆေးရေးဂိတ်မှာ ၁ နာရီလောက်တောင် ကြာတယ် “ ဟု ကြုံတွေ့ခဲ့သူ ဒေသခံ တစ်ဦးကပြောသည်။
ပင်လောင်းမြို့နယ်အတွင်းသို့ ရောက်ရှိနေသည့် စစ်ရှောင်များမှာ မှတ်ပုံတင် နှင့် အိမ်ထောင်စု ဇယားမရှိခြင်းကြောင့် စစ်ဆေးရေးဂိတ်မှ အတင်းကြပ် စစ်ဆေးမေးမြန်း ခံနေရတယ်လို့ သိရသည်။
Leave a Comments