သျှမ်းပြည် တောင်ကြီးခရိုင် မိုးဗြဲမြို့တွင် စစ်ကောင်စီက စစ်ဘေးရှောင်ရှိသည့်နေရာကို လက်နက်ကြီး ပစ်ခတ်ခဲ့သောကြောင့် စစ်ရှောင် အမျိုးသမီး ၁ ဦး သေဆုံးပြီး၊ အမျိုးသား ၂ ဦး ထိခိုက် ဒဏ်ရာရရှိခဲ့ကြောင်း စုံစမ်းသိရှိရသည်။
ယမန်နေ့ ဇန်နဝါရီ ၁၆ ရက် ည ၇ နာရီခွဲဝန်းကျင်တွင် စစ်ကောင်စီက လေယာဉ်ဖြင့် လက်နက်ကြီးများ ပစ်ခတ်ခဲ့သောကြောင့် ကောင်းဆောင်ကျေးရွာအတွင်းရှိ စစ်ဘေးရှောင် အမျိုးသမီး ၁ ဦး သေဆုံးသွားပြီး အမျိုးသား ၂ ဦးတို့က ပြင်းထန်စွာ ထိခိုက်ဒဏ်ရာရရှိခဲ့ကြောင်း သိရသည်။
“ သူတို့ ည အချိန်မှာ လက်နက်ကြီးတွေနဲ့ ရမ်းသမ်း ပစ်ခတ်ခဲ့တာ။ စစ်ဘေးရှောင်တွေ ရှိတဲ့နေရာတွေမှာ လက်နက်ကြီးတွေ ကျခဲ့တာ။ စစ်ဘေးရှောင်ထဲက အသက်ကြီးပိုင်း အမျိုးသမီးကတော့ လက်နက်ကြီးထိပြီး အဲ့မှာ ပွဲချင်းပြီး သေဆုံးသွားတာ။ အမျိုးသား ၂ ယောက်ကတော့ ထိခိုက်ဒဏ်ရာရခဲ့တယ်။ သူတို့ ၂ ယောက်လည်း ဒဏ်ရာပြင်းထန်ရရှိခဲ့တယ်” ဟု မိုးဗြဲမြို့ ဒေသခံ အမျိုးသား တစ်ဦးက ပြောသည်။
အဆိုပါ ထိခိုက်ဒဏ်ရာ ရရှိသူ ၂ ဦးကို ဆေးရုံသို့ ပို့ဆောင်ထားပေးကြောင်း ၊ ထိုအပြင် လက်နက်ကြီးကြောင့် အနည်းငယ် ထိခိုက်ဒဏ်ရာရရှိသူများလည်း ရှိထားကြောင်း စစ်ရှောင်များကို ကူညီပေးနေသည့်သူများထံ သိရသည်။
အလားတူ ယမန်နေ့ ဇန်နဝါရီ ၁၆ ရက် ည ၅ နာရီဝန်းကျင်တွင် စစ်ကောင်စီ နှင့် ပြည်သူ့ကာကွယ်ရေးတပ်ဖွဲ့တို့က တိုက်ပွဲဖြစ်ပွားခဲ့ကြောင်း သိရသည်။
“ ဟုတ်တယ်။ ကျနော်တို့ တိုက်ပွဲဖြစ်ပွားခဲ့တယ်။ ည ၅ နာရီလောက်မှ စပြီးဖြစ်တာ။ ဒီနေ့တော့ ငြိမ်နေပါသေးတယ်” ဟု မိုးဗြဲ PDF တပ်ဖွဲ့ဝင်တစ်ဦးက ပြောသည်။
စစ်ကောင်စီ နှင့် ပြည်သူ့ကာကွယ်ရေးတပ်ဖွဲ့များနှင့် တိုက်ပွဲဖြစ်ပွားပြီး စစ်ဘေးရှောင်များကို ရန်ပြုကာ လက်နက်ကြီးပစ်ခတ်မှုသည် စစ်ဘေးရှောင်များကို ရုပ်ပိုင်းဆိုင်ရာ နှင့် စိတ်ပိုင်းဆိုင်ရာ ထိခိုက်စေကြောင်း စစ်ဘေးရှောင်များကို ကူညီပေးနေသည့် သူများက ပြောသည်။
“ စစ်ကောင်စီရဲ့ လုပ်ရပ်ဟာ စစ်ဘေးရှောင်တွေ ပြည်သူတွေအတွက် ရုပ်ပိုင်းဆိုင်ရာကော၊ စိတ်ပိုင်းဆိုင်ရာကော အများကြီး ထိခိုက်စေပါတယ်။ စစ်နယ်ပယ် မဟုတ်တဲ့နေရာ ၊ ပြည်သူတွေရှိတဲ့ နေရာတွေမှာ လက်နက်ကြီး တည့်တည့် ပစ်ခတ်ခဲ့တဲ့ အကြိမ်ပေါင်းလည်း မနည်းတော့ဘူး။ ဒီလိုမျိုး စစ်ကောင်စီက ကျူးလွန်နေတာ မနည်းတော့ဘူး” ဟု ၎င်းက ပြောသည်။
ပြီးခဲ့သည့် ဇန်နဝါရီ ၁၀ ရက် တွင်လည်း စစ်ကောင်စီ နှင့် PDF တပ်ဖွဲ့တို့က ဖယ်ခုံမြို့နယ် အနောက်ဘက်ကမ်းတွင် တိုက်ပွဲဖြစ်ပွားခဲ့သည်။
စစ်အာဏာသိမ်းပြီးနောက်ပိုင်းမှစပြီး ယနေ့ချိန်ထိ ကရင်နီပြည် နှင့် မိုးဗြဲ၊ ဖယ်ခုံတကြောတွင် စစ်ကောင်စီနှင့် PDF တိုက်ပွဲကြား အရပ်သား ၂၀၀ ကျော် သေဆုံးမှု ဖြစ်ပွားခဲ့ကြောင်း တိုးတက်သော ကရင်နီပြည်အင်အားစု (PKPF) က ဇန်နဝါရီ ၁ ရက်တွင် ထုတ်ပြန်ခဲ့သည်။
Leave a Comments