ပြည်ထောင်စု ကြံ့ခိုင်ရေး နှင့် ဖွံ့ဖြိုးရေးပါတီ USDP ပါတီ၏ ဥက္ကဌ ခေါင်းဆောင် ဦးခင်ရီ သည် ၂၀၂၃ ခုနှစ် အတွင်း ကျင်းပသည့် ရွေးကောက်ပွဲကို ဝန်းရံကြရန်အတွက် တိုင်းရင်းသားများ စာပေ၊ ယဥ်ကျေးမှု အဖွဲ့
(၈) ဖွဲ့ကို လာရောက် ဆွေးနွေးခဲ့ကြောင်း သတင်းသိရသည်။

ပြီးခဲ့သည့် ဇန်နဝါရီလ ၁၅ ရက်နေ့တွင် သျှမ်းပြည် တောင်ကြီးခရိုင် တောင်ကြီးမြို့ရှိ ပြည်ထောင်စုကြံ့ခိုင်ရေးနှင့် ဖွံ့ဖြိုးရေး ပါတီ ရုံးခန်းတွင် တိုင်းရင်းသား အဖွဲ့ (၈) ဖွဲ့ နှင့် တွေ့ဆုံခဲ့ခြင်းဖြစ်ကြောင်း သိရသည်။

အဆိုပါ USDP ဥက္ကဌ ခေါင်းဆောင် ဦးခင်ရီ နှင့် တွေ့ဆုံသည့် သျှမ်းပြည် အတွင်း နေထိုင်ကြသော တိုင်းရင်းသားများ စာပေ၊ ယဥ်ကျေးမှုများမှ ပအိုဝ်း၊ သျှမ်း ၊ ကိုးကန့်၊ အင်း၊ တောင်ရိုး၊ တအာင်း (ပလောင်) ၊ ယင်းတလဲ (ယန်းလိုင်း နှင့် မုန်းဝန်း မှ စာပေ နှင့် ယဥ်ကျေးမှုအဖွဲ့ ကိုယ်စားလှယ်များ တက်ရောက်ခဲ့ကြောင်း တောင်ကြီး မှ ရှမ်းစာပေ နှင့်ယဥ်ကျေးမှု ဥက္ကဌ လုံးစိုင်းခမ်းနွတ်က သျှမ်းသံတော်ဆင့် ကိုပြောသည်။

“ကျနော်တို့ကို ဖိတ်စာနဲ့တကွ ဖိတ်လာတော့ ကျနော်တို့လည်း တက်ဖြစ်ခဲ့တယ်၊ ၄ ယောက်တက်ဖို့ ပြောပေမဲ့ ကျနော်တို့ကတော့ နှစ်ယောက်ပဲ တက်ဖြစ်ခဲ့တယ်၊ ဒါပေမဲ့ တခြားအဖွဲ့အစည်းကတော့ ၄ ယောက်စီ တက်ဖြစ်တယ်၊ ထူးခြားတာကတော့ ပအိုဝ်းအဖွဲ့က ၈ ယောက်တက်တယ်၊ တွေ့ဆုံမှုမှာ စုစုပေါင်း လူ ၄၀ နီးပါး ရှိတယ်” ဟု လုံးစိုင်းခမ်းနွတ်က သျှမ်းသံတော်ဆင့်ကို ပြောသည်။

USDP ဥက္ကဌ ဦးခင်ရီမှ တစ်မြေတည်းနေ တစ်ရေတည်းသောက်သည့် တိုင်းရင်းသားဖြစ်သည့် အတွက် မလိုသူ တို့၏ သွေးထိုးမှုကို နားမယောင်ကြရန်၊ အချင်းချင်း သွေးစည်းညီညွတ်ကြရန် နှင့် လာမည့် ရွေးကောက်ပွဲ အောင်မြင်စွာ ကျင်းပနိုင်ဖို့ အတွက် စည်းလုံးညီညွတ်စွာ ဝိုင်းဝန်း ဆောင်ရွက်ကြရန် ပြောဆိုခဲ့ကြောင်းလည်း သိရသည်။

ယင်းတွေ့ဆုံမှု နှင့် USDP ဥက္ကဌ ဦးခင်ရီ နှင့်အတူ သျှမ်းပြည်မှ ပြည်နယ်ပါတီ ဥက္ကဌ ဦးစိုင်းလုံကျော် နှင့် ပြည်နယ် အလုပ်အမှုဆောင်များလည်း တက်ရောက်ခဲ့ပြီး ရွေးကောက်ပွဲကို ဝန်းရံကြရန် ဦးတည်ပြောဆိုခဲ့ကြောင်း တက်ရောက်ခဲ့သည့် အမည်မဖော်လိုသူ တစ်ဦးကလည်း သျှမ်းသံတော်ဆင့်ကို ပြောသည်။

“အဓိက ကတော့ ၂၀၂၃ ရွေးကောက်ပွဲကို ဝန်းရံဖို့ ပြောတာပါ၊ ဓနု အဖွဲ့ ကတော့ မတက်ဘူး။ တချို့အဖွဲ့တွေကလည်း အခြေအနေအရ Follow လိုက်နေရလို့ လာတက်တာပေါ့” ဟု USDP တွေ့ဆုံမှုတွင် ပါဝင်သူ တစ်ဦးက သျှမ်းသံတော်ဆင့်ကို ပြောသည်။

အာဏာသိမ်း စစ်ကောင်စီ တပ်ဖွဲ့သည် ၂၀၂၃ ခုနှစ်အတွင်းတွင် PR စနစ်ဖြင့် ရွေးကောက်ပွဲ ကျင်းပရန် ပြင်ဆင်နေလျက်ရှိပြီး USDP (ကြံ့ခိုင်ရေးပါတီ) အနေဖြင့်လည်း ပါတီအားကောင်းသည့် မြို့နယ်များကို သွားရောက် တွေ့ဆုံ ဆွေးနွေး မဲဆွယ်မှုများ စတင်လုပ်ဆောင်နေကြောင်းလည်း သိရသည်။

တဖက်တွင်လည်း စစ်ကောင်စီ၏ ရွေးကောက်ပွဲအတွက် စစ်ကောင်စီ လက်အောက်ခံ အုပ်စုများက သက်ဆိုင်ရာ မြို့နယ်အလိုက် တစ်အိမ်တက် တစ်အိမ်ဆင်း နှင့် အိမ်ထောင်စု နာမည်စာရင်းကို ဇန်နဝါရီ ၉ ရက်နေ့မှ စတင်ပြီး ကောက်ယူနေသည်။