ထိုင်းနိုင်ငံရောက် မြန်မာရွှေ့ပြောင်းအလုပ်သမား လူငယ်တစ်ဦး ဓားထိုးသတ်ခံရ

ထိုင်းနိုင်ငံ ဘန်ကောက်မြို့တွင်းတွင် အလုပ်လုပ်ကိုင်နေသည့် မြန်မာရွှေ့ပြောင်းအလုပ်သမား လူငယ်တစ်ဦး ပျောက်ဆုံးသွားရာမှ ဓားဒဏ်ရာဒဏ်ချက်ဖြင့် သေဆုံးနေသည့် အလောင်းကို ပြန်လည် ရှာတွေ့ခဲ့ကြောင်း သိရှိရသည်။

ပြီးခဲ့သည့် ဇန်နဝါရီ ၁၅ ရက် ညနေပိုင်း ၅ နာရီတွင် စတင်ပျောက်ဆုံးခဲ့တာဖြစ်ပြီး ၎င်း၏ ဆွေမျိုးအသိုင်းအဝိုင်း နှင့် သူငယ်ချင်းများက လိုက်လံရှာဖွေရာ မတွေ့ရှိခဲ့သောကြောင့် ထိုင်းနိုင်ငံရောက် နိုင်ရာလူမှုကူညီရေးအသင်းမှ တစ်ဆင့် သက်ဆိုင်ရာ ထိုင်းရဲတပ်ဖွဲ့ကို လူပျောက်ကြေငြာတိုင်ကြားပြီး ရှာဖွေခဲ့ရာမှ ဓားဒဏ်ရာဒဏ်ချက်ဖြင့် သေဆုံးနေသည့် အလောင်းကို ပြန်လည်ရှာတွေ့ခဲ့ကြောင်း သိရသည်။

ဓားဒဏ်ရာဒဏ်ချက်ဖြင့် သေဆုံးသွားသူသည် အသက် ၃၁ နှစ်အရွယ်ရှိ ခွန်သူရိန်စိုး ဖြစ်ပြီး သျှမ်းပြည် တောင်ကြီးမြို့နယ် အေးသာယာမြို့ နောင်အင်ရွာတွင် နေထိုင်ပြီး ပအိုဝ်းတိုင်းရင်းသား လူငယ်တစ်ဦး ဖြစ်ကြောင်းလည်း သိရသည်။

“ ဒီထိုင်းမှာ ရွှေ့ပြောင်းအလုပ်သမား လူငယ်တွေ သတ်ခံရတဲ့ ဖြစ်စဉ်တွေဟာ မနည်းတော့ဘူးဗျာ။ သူဌေးက သေနတ်နဲ့ ပစ်သတ်ခံရတဲ့သူတွေ၊ လူငယ်တွေ အချင်းချင်း ရန်ဖြစ်ပြီး အပြန်အလှန် သတ်ဖြတ်ကြတာတွေ၊ ဒါတွေဟာ ကျနော်တို့ ခဏခဏ ကြုံရနေဖူး၊ ကူညီခဲ့ရဖူးတယ်။ အဓိကတော့ ကျနော်တို့ လူငယ်တွေ တစ်ယောက်နဲ့ တစ်ယောက် အပေါ်မှာ မာန၊ အတ္တစိတ် နဲ့ သောကစိတ် ထားကြလို့ဘဲ ဖြစ်တယ် “ ဟု ထိုင်းနိုင်ငံရောက် ရွှေ့ပြောင်း အလုပ်သမားကို ကူညီပေးသည့် စိုင်းလိန်ခမ်းက ပြောပါသည်။

လက်ရှိ သေဆုံးသူ နှင့် ပတ်သက်ပြီး သက်ဆိုင်ရာ ရဲတပ်ဖွဲ့နှင့် ထိုင်းနိုင်ငံရောက် နိုင်ရာလူမှုကူညီရေးအသင်းများ က လက်တွဲပြီး ပြစ်မှုကြူးလွန်သူကို စုံစမ်းနေဆဲကြောင်း သိရသည်။

ထို့အပြင် ထိုင်းနိုင်ငံ အတွင်းသို့ ရောက်ရှိနေသည့် မြန်မာရွှေ့ပြောင်းအလုပ်သမား လူငယ်များ အချင်းချင်း အပြန်အလှန် ရိုင်းပင်း ကူညီစေတတ်ရန် နှင့် တစ်ဦးနှင့် တစ်ဦးအပေါ် မေတ္တာတရားထားကြရန် ၎င်းက တိုက်တွန်းထားပါသည်။

“သူများနိုင်ငံမှာ အရေးတကြီး တခုခုဖြစ်လာရင် မိတ်ဆွေ အပေါင်းအသင်း၊ ဆွေမျိုးတွေ အကူညီ တောင်းပါ။ သူများနိုင်ငံမှာ ဉပဒေတွေနဲ့အတူ နေရတယ်၊ တချို့တွေက အယုံအကြည်မရှိဘူး သေပြီးရင် ဘာမှမထူးလာဘူး ဆိုတာကြီးပဲ၊ လူတစ်ယောက်မှာ တန်ဖိုးဆိုတာ အရမ်းရှိပါတယ် “ ဟု ရွှေ့ပြောင်းအလုပ်သမားကို ကူညီပေးနေသည့် စိုင်းလိန် ကဆိုသည်။

စစ်တပ်က အာဏာသိမ်းပြီးနောက်ပိုင်း ပြည်တွင်းတွင် စစ်ရေးပဋိပက္ခ နှင့် ပျက်ပြားသည့် စီးပွားရေးအခြေနေများကြောင့် ပြည်သူများက အိမ်နီးချင်းနိုင်ငံ ထိုင်းနိုင်ငံကို အလုံးအရင်း နှင့် ထွက်ပြေး တိမ်းရှောင်လာခဲ့သည်။