သျှမ်းပြည် လားရှိုးခရိုင် လားရှိူးမြို့နယ် အီနိုင်းကျေးရွာအုပ်စုရှိ ခြောက်မိုင်ကျေးရွာမှ ပြောင်းဖူးပွဲရုံတစ်ခု ဓားပြတိုက်ခံရကြောင်း စုံစမ်းသိရသည်။
ပြီးခဲ့သည့် ဇန်နဝါရီလ ၁၂ ရက် ည ၇ နာရီ အချိန်တွင် ခြောက်မိုင်ကျေးရွာရှိ ရွှေမိုင်းရင် ပြောင်းဖူးပွဲရုံထဲသို့ အိမ်စီးကား ၂ စီးနှင့် အမျိုးသား ၆ ဦးတို့သည် ပစ္စတိုသေနတ်ကိုယ်စီဖြင့် ရောက်လာကာ ဓားပြတိုက်သွားကြောင်း နီးစပ်သူ အမျိုးသား တစ်ဉီးက သျှမ်းသံတော်ဆင့်ကို ပြောသည်။
“Crown အမျိုးအစား ကားနှစ်စီး ပွဲရုံရှေ့ကို ရောက်လာတယ်၊ လူတချို့က ကားထဲမှာ နေခဲ့ပြီး အမျိုးသား ၆ ဦးက ပွဲရုံထဲကို ဝင်လာပြီး အိမ်သားတွေကို သေနတ်နဲ့ ထောက်ပြီး မွှေနှောက်တော့တာပဲ၊ မွှေနှောက်ပြီး ဖုန်းတွေ ငွေတွေ ရွှေထည် ပစ္စည်း တွေယူပြီး လားရှိုးဘက်ကို ပြန်ထွက်သွား တယ်လို့” ဓားပြတိုက်ခံရသည့် မိသားစု အသိုင်းအဝိုင်းမှ နီးစပ်သူ အမျိုးသား တစ်ဦးက သျှမ်းသံတော်ဆင့်ကို ပြောသည်။
အဆိုပါ ဓားပြတိုက်ခံရသည့် အချိန်သည် အိမ်ရှင် မိသားစုဝင် ၅ ဦးရှိနေပြီး ငွေကျပ်သိန်း ၁၀၀ ကျပ်၊ ဖုန်း ၈ လုံး နှင့် ကျပ်သိန်း ၂၀၀ ကျော် တန်ဖိုးရှိ ရွှေထည်ပစ္စည်းများ ဆုံးရှုံးလိုက်ရကြောင်းလည်း သိရသည်။
ဓားပြလာတိုက်သည့် လူတစ်စုသည် Crown အမျိုးအစား ကားအဖြူရောင် တစ်စီးနှင့် အနက်ရောင် တစ်စီးဖြင့် ရောက်လာပြီး စုစုပေါင်း ၁၀ ဦးနီးပါး ခန့်ရှိနေကြောင်း အထက်ပါ ပုဂ္ဂိုလ်က သျှမ်းသံတော်ဆင့်ကို ဆက်ပြောသည်။
“သေနတ်နဲ့ထောက်ပြီး ပစ္စည်းတွေကို ယူသွားတာ၊ အလုပ်သမားတွေကလည်း အိမ်ပြန်သွားကြပြီဆိုတော့ ဘာမှ မလုပ်နိုင်ခဲ့ဘူး၊ လူကိုတော့ အန္တရာယ် မပြုသွားဘူး၊ သူတို့ပြောတဲ့ စကားက ဗမာလိုပဲ ပြောတယ်” ဟု ၎င်းက ပြောသည်။
စစ်အာဏာသိမ်းပြီးနောက်ပိုင်း သျှမ်းပြည်တွင် တရား ဥပဒေ စိုးမိုးမှု မရှိသည့်အတွက် ဒေသခံပြည်သူများသည် မကြာခဏ ခိုးဆိုးလုယက်မှု၊ ဓားပြတိုက်မှု များကြုံတွေ့နေရသည်။
ထို့အပြင် စစ်တပ်မှ နိုင်ငံတော် အာဏာသိမ်းယူပြီးနောက်ပိုင်းတွင် သျှမ်းပြည် အပါအဝင် နိုင်ငံတဝှမ်းလုံး၌ ခိုးဆိုးလုယက်မှု များပြားလာပြီး တာဝန်ရှိသည့် ရဲ နှင့် လုံခြုံရေးပိုင်းဆိုင်ရာ ဝာာဝန်ရှိသူများက အဆိုပါ ခိုးဆိုးလုယက်ကျူးလွန်သူများကို အရေးယူဆောင်ရွက်နိုင်ခြင်း မရှိကြောင်းလည်း သိရသည်။
