သျှမ်းပြည် ကျောက်မဲခရိုင် သီပေါမြို့ တောင်ရပ်ကွက်ထဲတွင် ယနေ့ (ဇန်နဝါရီ ၁၆ ) နံနက် ၁၀ နာရီခွဲဝန်းကျင်တွင် ဖယောင်းတိုင်မီးမှ တစ်ဆင့် မီးလောင်မှုဖြစ်ပွားခဲ့ကြောင်း သိရှိရသည်။
အဆိုပါ မီးလောင်မှုကြောင့် အိမ်တွင်းရှိနေသည့် အမျိုးသားတစ်ဦးက သေဆုံးသွားကြောင်း သိရသည်။
“ ဖယောင်းတိုင်ကနေစပြီး လောင်တာတဲ့။ ဘုရားစင်ပေါ်မှာ မီးထွန်းထားပြီး အိပ်ပျော်သွားတာထင်တယ်။ အခုတော့ မီးငြိမ်းသွားပြီ။ အိမ်ထဲမှာရှိနေတဲ့ သူတစ်ယောက်တော့ မီးထဲပါပြီး သေသွားတယ်လို့ကြားတယ်” ဟု သီပေါမြို့ ဒေသခံ အမျိုးသမီးတစ်ဦးက ပြောသည်။
အဆိုပါ မီးထဲသေဆုံးသွားသည့်သူသည် စိုင်းလိတ်ခမ်း (၃၆) နှစ်ရှိပြီး စိတ်ကျန်းမာရေး မကောင်း သူတစ်ဦးဖြစ်ကြောင်း သိရသည်။
ထို မီးလောင်မှုကြောင့် ဆုံးရှုံးမှု မည်မျှရှိသည်ကို အတိအကျ မသိရှိရသေးပေ။
လက်ရှိတွင်လည်း လျှပ်စစ်မီး ပုံမှန်မရရှိသေးသည့်အတွက်ကြောင့် ပြည်သူများကလည်း ဖယောင်းတိုင်မီးကို အားကိုးပြီး အသုံးပြုနေကြရသည်။
ထိုကြောင့် ပြည်သူများအနေဖြင့် မီးလောင်မှု ထပ်မံမဖြစ်ပွားစေရန် ဖယောင်းတိုင်မီးကို သတိထားအသုံးပြုကြပါရန် ပရဟိတ အဖွဲ့များက တိုက်တွန်းကြသည်။
“ ဖယောင်းတိုင်မီးကို သတိထားသုံးဖို့ပဲ ပြောချင်ပါတယ်။ မီးထွန်းထားတယ်ဆိုရင်လည်း ငြိမ်းဖို့မမေ့နဲ့ပေါ့။ ဖယောင်းတိုင်မီးကိုလည်း လောင်ကျွမ်းလွယ်တဲ့နေရာတွေမှာ မထွန်းနဲ့ပေါ့” ဟု သီပေါမြို့ ပရဟိတ အသင်းတစ်ခုက ပြောသည်။
စစ်တပ်က အာဏာသိမ်းပြီးနောက်ပိုင်း လျှပ်စစ်မီး ပုံမှန်မရရှိသည့်အတွက် ပြည်သူများက ဖယောင်းတိုင်မီးကို အသုံးပြုရသောကြောင့် သျှမ်းပြည်အတွင်း မကြာခဏ မီးလောင်မှုဖြစ်ပွားလေ့ရှိသည်။
