သျှမ်းပြည် တောင်ကြီးခရိုင် ညောင်ရွှေမြို့နယ် အင်းလေးဒေသရှိ စစ်ကောင်စီ စစ်ဆေးရေးဂိတ်များမှ တပ်သားများ သည် အမျိုးသမီးများကို ကိုယ်ထိလက်ရောက်စစ်ဆေးမှုများ ပြုလုပ်နေကြောင်း စုံစမ်းသိရသည်။
အင်းလေးဒေသ အနောက်ဘက်ခြမ်း ဘုရားနီကျေးရွာ နှင့် သန်းတောင်ကျေးရွာကြား စစ်ကောင်စီ နှင့် ဒေသခံ ပြည်သူ့ကာကွယ်ရေး တပ်ဖွဲ့တို့၏ ထိတွေ့တိုက်ပွဲအပြီး၌ စစ်ဆေးမှုများလည်း တင်းကြပ်လာပြီး အမျိုးသမီး များကို ကိုယ်ထိလက်ရောက် စစ်ဆေးမှုများ ပြုလုပ်နေကြောင်း ဒေသခံများက ပြောသည်။
“အရင်ကလို ဘယ်ကလာတယ် ဘယ်ကိုသွားမလဲ ဆိုတာထက် ကိုယ်ခန္ဓာ ကိုင်တွယ် စစ်ဆေးတာတွေ ရှိလာ တယ်၊ ဒါက အမျိုးသားတွေအတွက် ဘာမှမဖြစ်ပေမဲ့ အမျိုးသမီးတွေကို ခါးကိုင်တာ ပခုံးကိုင်တာတွေက မဖြစ်သင့်ဘူးလေ၊ သူတို့က စစ်သား ယောကျာ်းရင့်မာကြီးတွေ၊ ပြောရင်လည်း သေနတ်နဲ့ ထုခံရမှာ ကြောက်လို့ ဘာမှ မပြောရဲဘူး” ဟု အင်းလေးဒေသမှ အမည်မဖော်လိုသူ အမျိုးသား တစ်ဦးက သျှမ်းသံတော်ဆင့်ကို ပြောသည်။
အင်းလေးဒေသ အဝင်အထွက်များကို တင်းကြပ်စွာ စစ်ဆေးနေသည့် စစ်ကောင်စီ စစ်ဆေးရေးဂိတ်သည် ပေါင်းပိုင်းဂိတ်၊ မှော်ဘီဂိတ်၊ အင်းတိန်ဂိတ်တို့ ဖြစ်ကြပြီး အမျိုးသမီးများကို လိင်ပိုင်းဆိုင်ရာ ကာယိအိန္ဒြေ ကျူးလွန်မှု မြှောက်သည့် စစ်ဆေးမှုများလည်း ပြုလုပ်နေကြောင်း ဒေသခံများက ပြောသည်။
ထို့အပြင် အဆိုပါ ဂိတ်စောင့် စစ်ဆေးရေးဂိတ်များသည် အရက်သောက် မူးနေတတ်ကြသဖြင့် ဂိတ်မှ ဖြတ်သန်း သွားလာသည့် အမျိုးသမီးများအတွက် အန္တရာယ်ကြီးမားကြောင်းလည်း အထက်ပါ အမျိုးသားက ဆက်ပြော သည်။
“အရက်မူးပြီဆိုရင် စစ်ဆေးရေးဂိတ်ဖြတ်တဲ့ သူအားလုံး အရစ်ခံရတယ်၊ ပိုက်ဆံပါရင်တော့ ပိုက်ဆံတောင်းတယ်၊ အမျိုးသမီးတွေကို ဆိုရင် စစ်သားတွေက ပုခုံးပေါ်လက်တင်ပြီး အရစ်ရှည်ပြီး ပေးမသွားတာမျိုးတွေ ရှိတယ်၊ အမျိုးသမီးတွေအတွက် အန္တရာယ်တွေ အရမ်းများတယ်၊ ဗမာစစ်သားတွမှ မဟုတ်ဘူး ၊ PNO/PNA စစ်သားတွေလည်း ပါတယ်” ဟု ၎င်းက ဆက်ပြောသည်။
ယင်းကဲ့သို့ စစ်ဆေးမှုများ တင်းကြပ်နေသည့်အတွက် ဒေသခံများက အပြင်ထွက် သွားလာရန်အတွက် စိုးရွံ့နေကြသည့် အတွက် နေထိုင်သွားလာရာတွင် ပိုပြီးအဆင်မပြေမှုများ မလုံခြုံမှုများ ခံစားနေရကြောင်း ဒေသခံများက ပြောဆိုသည်။
ပြီးခဲ့သည့် ဇန်နဝါရီလ ၂ ရက်တွင်လည်း တောင်ကြီးခရိုင် ပင်းတယမြို့ နဲ့ ရွာငံမြို့ကြားတွင် ရှိသည့် စစ်ကောင်စီ စစ်ဆေးရေးဂိတ်တစ်ခုတွင် လမ်းသွားလမ်းလာ အမျိုးသမီးများကို ဂိတ်စောင့် စစ်သားများက မဖွယ်မရာ ကိုယ်ထိ လက်ရောက် ကာယိအိန္ဒြေ ကျူးလွန်နေသည့် ဖြစ်စဥ်ဖြစ်ပွားခဲ့သည်။
စစ်အာဏာသိမ်းသည့် ၂၀၂၁ ခုနှစ် ဖေဖော်ဝါရီလမှ ယနေ့ အချိန်ထိ နိုင်ငံနှင့် တဝှမ်းလုံးရှိ စစ်ကောင်စီ တပ်သားများသည် အကြမ်းဖက် လုပ်ရပ်မှုများကြောင့် ပြည်သူများက အပြင်ထွက် သွားလာရေး နှင့် လုံခြုံရေးပိုင်းဆိုင်ရာများ အတွက် အထူးစိတ်ပူနေရကြသည်။
မိန်းကလေးတစ်ဦး၏ ကာယိအိန္ဒြေ ပျက်စီးစေရန် အကြံဖြင့် လက်ရောက်မှု သို့မဟုတ် ပြစ်မှုမကင်းသော အနိုင်အထက် ပြုမှု များသည် ရဲအရေးပိုင်သော ပြစ်မှုဖြစ်ပြီး ပြစ်ဒဏ်သည် ထောင်ဒဏ် ၂ နှစ်အထိ ထောင်ဒဏ် တစ်မျိုးဖြစ်စေ၊ ငွေဒဏ်ဖြစ်စေ သို့မဟုတ် ဒဏ်နှစ်ရပ် စလုံး ချမှတ်နိုင်ကြောင်းလည်း သိရသည်။
Leave a Comments