သျှမ်းပြည် ကျောက်မဲခရိုင် ကျောက်မဲမြို့ သျှမ်းစာပေ နှင့် ယဉ်ကျေးမှုကျောင်းတွင်ရှိနေသည့် စစ်ဘေးရှောင်များသည် မြို့ထဲပြောင်းရွှ့နေထိုင်ကြရကြောင်း စုံစမ်း သိရှိရသည်။

စစ်ကောင်စီသည် စစ်ရှောင်များကို နေရပ်ပြန်ရန်အတွက် ဖိအားပေးမှုကြောင့် ယခု ဇန်နဝါရီ ပထမပတ်မှ စပြီး ကျောက်မဲမြို့အတွင်း စစ်ဘေးရှောင်များသည် နေအိမ် လိုက်လံငှားရမ်းပြီး နေထိုင်ကြရသည်။

“ အကုန်ပြောင်းရွှေ့သွားပြီ။ စာရင်းကိုင်တွေပဲ ကျန်တော့တယ်။ စစ်ရှောင်တွေကတော့ တစ်ယောက်မှ မကျန်တော့ဘူး။ ကျနော်တို့ကို ကူညီပေးနေတဲ့ လူတစ်ချို့ပဲ ကျန်တော့တယ်။ ဒီလက စပြီးတော့ ပြောင်းရွှေ့သွားကြရတာ” ဟု ကျောက်မဲမြို့ သျှမ်းစာပေ နှင့် ယဉ်ကျေးမှုက တာဝန်ရှိသူ အမျိုးသားတစ်ဦးက ပြောသည်။

အဆိုပါ စစ်ဘေးရှောင်များသည် နေရပ်သို့ မပြန်နိုင်သေးဘဲ တချို့ပြည်သူများသည် မြို့ထဲ နှင့် ဆွေမျိုးအိမ်များတွင် ပြောင်းရွှေ့နေထိုင်ကြကြောင်း သိရသည်။

“ သူတို့တော့ နေအိမ်ငှားရမ်းဖို့ ခက်ခဲတာပေါ့။ တစ်ချို့ကလည်း မြို့ထဲမှာ အိမ်တွေ သွားငှားပြီး နေကြတယ်။ တစ်ချို့လည်း ရွာမှာ သွားပြီး ဆွေမျိုးတွေနဲ့ သွားနေကြတယ်။ သူတို့ နေရပ်ကို မပြန်နိုင်သေးဘူး။ သူတို့ ရွာကို ပြန်ကြည့်သေးတယ်တဲ့။ လက်နက်ကိုင်တွေက မပေးပြန်ဘူး” ဟု အထက်ပါ အမျိုးသားက ပြောသည်။

ထိုအပြင် လက်ရှိ အလုပ်အကိုင် ရှားပါးသည့်အတွက်ကြောင့် စစ်ဘေးရှောင်များအတွက်လည်း ဝင်ငွေ ရရှိရန် ခက်ခဲနေကြောင်း သိရသည်။ ထိုထဲတွင် အသက်ကြီး ရွယ်အိုများက သား၊ သမီးများ နှင့် အတူ မရှိသောကြောင့် ပြောင်းရွှေ့ပြီး နေထိုင်ရာတွင် ပိုပြီးခက်ခဲနေကြောင်း ကျောက်မဲမြို့ ဒေသခံတစ်ဦးက ပြောသည်။

“ အခုကလည်း ကုန်ဈေးနှုန်းတက်တယ်။ အလုပ်ကလည်း အသေချာ မရှိဘူးလေ။ ဝင်ငွေတွေကလည်း ပုံမှန် မရှိကြဘူး။ အသက်ကြီးတဲ့ သူတွေဆိုရင် သူတို့က ပိုပြီး အဆင်မပြေတာတွေများတယ်။ သူတို့ သားသမီးတွေက အဝေးမှာနေပြီး ပိုက်ဆံပဲ ပို့ပေးတာလေ။ အဲ့ကြောင့် တစ်ယောက်ထဲနေရင် ပိုပြီး ခက်ခဲကြတယ်” ဟု ၎င်းက ပြောသည်။

အဆိုပါ စစ်ဘေးရှောင်များသည် ကျောက်မဲမြို့နယ် ဟူးဆွန်ကျေးရွာ ဒေသခံများဖြစ်ပြီး ပြီးခဲ့သည့် ၂၀၂၁ ခုနှစ် တိုင်းရင်းသား လက်နက်ကိုင်အချင်းချင်း တိုက်ပွဲကြောင့် ၁ နှစ်ကျော်ကြာ ထွက်ပြေးတိမ်းရှောင်လာခဲ့ရသည်။