သျှမ်းပြည် တောင်ကြီးခရိုင် ဖယ်ခုံမြို့နယ် မိုးဗြဲမြို့ထဲတွင် စစ်ကောင်စီက တစ်ဖက်သတ် လက်နက်ကြီး ပစ်ခတ်မှုကြောင့် အမျိုးသားတစ်ဦး သေဆုံးခဲ့ကြောင်း စုံစမ်းသိရှိရသည်။
မိုးဗြဲမြို့တွင် ယမန်နေ့ (ဇန်နဝါရီ ၈) ရက် ည ၉ နာရီ ဝန်းကျင်၌ တိုက်ပွဲဖြစ်ပွားမှုမရှိဘဲ စစ်ကောင်စီမှတဖက်သတ် လက်နက်ကြီး ပစ်ခတ်ခဲ့ပြီး ရပ်ကွက် (၁) ထဲ လက်နက်ကြီး ကျရောက်ကာ အသက် (၆၆) အရွယ်ရှိ အမျိုးသားတစ်ဦး သေဆုံးသွားခဲ့ကြောင်း သိရသည်။
“ ရပ်ကွက် ၁ ထဲက နေအိမ်တစ်လုံးပေါ်ကို လက်နက်ကြီး ကျခဲ့တာ။ တစ်ယောက်ထိပြီး သေသွားတယ်။ တိုက်ပွဲဖြစ်တာလည်း မရှိဘူး။ သူတို့ဘက်က တစ်ဖက်သတ် ပစ်ခတ်ခဲ့တာ။ ဘာကြောင့် ပစ်တာလဲတော့ အသေချာ မသိဘူး” ဟု မိုးဗြဲမြို့ PDF တာဝန်ရှိသူ တစ်ဦးက ပြောသည်။
မိုးဗြဲမြို့တွင် တိုက်ပွဲမဖြစ်ပွားတာကြာပြီး လက်နက်ကြီးကိုလည်း ယခု ဇန်နဝါရီလထဲတွင် ပြန်လည် ပစ်ခတ်လာခဲ့ကြောင်း သိရသည်။
ပြီးခဲ့သည့် ဇန်နဝါရီ ၅ ရက်နေ့ကစပြီး စစ်ကောင်စီက မိုးဗြဲမြို့ ဝါရီဆူးပလိုင်ကျေးရွာထဲတွင် လက်နက်ကြီး ပစ်ခတ်ခဲ့သောကြောင့် နေအိမ်များ ပျက်စီးခဲ့ကြောင်း သိရသည်။
“တိုက်ပွဲ မဖြစ်တာလည်း ကြာပြီ။ သူတို့ လက်နက်ကြီးတွေ မပစ်တာလည်း ၂ လ လောက်ရှိပြီ။ ဒီလထဲမှာမှ ပြန်ပြီး ပစ်လာတာ။ ၅ ရက်နေ့တုန်းကလည်း ရွာတွေဘက်မှာပစ်တာ ပြည်သူနေအိမ်တွေ ပျက်စီးသွားခဲ့တာရှိတယ်။ သူတို့က ဖယ်ခုံ၊ လွိုင်ကော်ကနေ ပစ်လာတာ” ဟု အထက်ပါ PDF တပ်ဖွဲ့ဝင်တစ်ဦးက ပြောသည်။
မိုးဗြဲမြို့ထဲတွင် စစ်ကောင်စီ လက်နက်ကြီး ပစ်ခတ်မှုသည် ပြည်သူများကို ခြိမ်းခြောက်နေသည်ဟု PDF တပ်ဖွဲ့များက ထပ်လောင်းပြောကြသည်။
ထိုအပြင် မိုးဗြဲမြို့ထဲတွင် လုံခြုံရေးမရှိလာနိုင်တော့ကြောင်း မိုးဗြဲမြို့ PDF က ထုတ်ပြန်ထားသည်။
Leave a Comments