သျှမ်းပြည် တောင်ကြီးခရိုင် အောင်ပန်းမြို့ သွေးလှူရှင်အသင်းခေါင်းဆောင် ကိုတရုတ်ကြီးကို စစ်ကောင်စီမှ ထောင်ဒဏ် ၁၀ နှစ်ချမှတ်လိုက်ကြောင်း စုံစမ်းသိရှိရသည်။
အဆိုပါ ကိုတရုတ်ကြီးကို PDF ထောက်ပံ့မှုဖြင့် အမှုစွဲပြီး စစ်ကောင်စီမှ ထောင်ဒဏ် ၁၀ နှစ်ချမှတ်လိုက်ပြီး ၎င်းနှင့်အတူဖမ်းခံရသည့် အဖွဲ့ဝင်များ ပြန်လွှတ်လာကြောင်း အောင်ပန်းမြို့ဒေသခံ အမျိုးသားတစ်ဦးက သျှမ်းသံတော်ဆင့်ကိုပြောသည်။
“ သူ့ကို ထောင်ဒဏ် ၁၀ နှစ်ချမှတ်လိုက်ပြီတဲ့။ ဟိုနေ့က ပြန်လွတ်ပေးတဲ့ထဲလည်း သူမပါလာဘူး။ သူရဲ့အဖွဲ့ဝင်တွေတော့ ပြန်လွတ်လာတယ်လို့ကြားတယ်။ ဘာအမှုနဲ့ ချမှတ်လိုက်လဲတော့ မသိရဘူး။ PDF ထောက်ပံ့မှုနဲ့ ထောင်ဒဏ်ချမှတ်လိုက်တာ” ဟု အောင်ပန်းမြို့ ဒေသခံအမျိုးသားတစ်ဦးက ပြောသည်။
ထို့အပြင် အောက်တိုဘာ ပထမပတ်အတွင်းတွင် ရပ်ကွက် (၃) ထဲနေထိုင်သည့် လူငယ်တစ်ဦးသည် လူမှုကွန်ယက်ပေါ်တွင် နိုင်ငံရေးဆိုင်ရာ သတင်းတစ်ခုအာက်တွင် ကော်မန့်ပေးရာမှ တစ်ဆင့် ဖမ်းဆီးခံရပြီး လက်ရှိမှာ ထောင်ဒဏ် ၂ နှစ်ချမှတ်ခံရကြောင်း သိရသည်။
“ ဟိုကလေး နိုင်ငံရေးသတင်းတစ်ခုမှာ ကော်မန့်ရေးလို့ ဖမ်းခံရတဲ့ကောင်ကလည်း ထောင်ဒဏ် ၂ နှစ် ချမှတ်ခံရတာ။ ပြန်မလွတ်လာပေးဘူး။ အဲ့ကောင်လေးက ကျနော်တို့ ရပ်ကွက်ထဲကလူပဲ။ အခုထိ ပြန်လွတ်လာပေးတာမတွေ့ဘူး” ဟု အောင်ပန်းမြို့ ရပ်ကွက် ၃ ထဲနေ ဒေသခံ အမျိုးသားတစ်ဦးက ပြောသည်။
ကိုတရုတ်ကြီးကို အောက်တိုဘာ ၁၀ ရက်နေ့ ည ၅ နာရီဝန်းကျင်လောက်က စစ်ကောင်စီက စစ်အင်အား ကား ၃ စီးဖြင့် လာရောက်ဖမ်းဆီးသွားခဲ့သည်။
အောင်ပန်းမြို့အဝင်ထွက်တွင် လက်ရှိ ညောင်ရွှေမြို့နယ်ထဲ တိုက်ပွဲဖြစ်ပွားပြီးနောက်ပိုင်း စစ်ဆေးမှုတွေ ပြန်လည် တင်းကြပ်လာနေလျက်ရှိကြောင်း သိရသည်။
