သျှမ်းပြည် တောင်ကြီးခရိုင် ဆီဆိုင်မြို့နယ် ဆီဆိုင်မြို့တွင် လာမည့် ၂၀၂၃ ခုနှစ် ရွေးကောက်ပွဲ မဲပေးရန်အတွက် စစ်ကောင်စီက သန်းခေါင်စာရင်း လူဦးရေ ကောက်နေကြောင်း စုံစမ်းသိရှိရသည်။
လာမည့် ၂၀၂၃ ခုနှစ် ရွှေးကောက်ပွဲတွင် စစ်ကောင်စီကို မဲပေးရန်အတွက် ကျေးလက်၊ ရပ်ရွာသူကြီးများ နှင့် စေတနာ့ ဝန်ထမ်းများကို သင်တန်းပေးပြီး သန်းခေါင်စာရင်း ကောက်ခံခိုင်းသည့်အပြင် နေရပ်စွန့်ခွာလာသူ (စစ်ရှောင်) သန်းခေါင်စာရင်းကိုလည်း လိုက်လံကောက်ယူရန် ညွှန်ကြားခဲ့ကြောင်း ဒေသခံများထံမှ သိရသည်။
ထိုသို့ ညွှန်ကြားခဲ့ပြီးနောက်ပိုင်း ယနေ့ (ဇန်နဝါရီ ၆) ရက် ဆီဆိုင်မြို့ပေါ်တွင် သက်ဆိုင်ရာ ရပ်ကွက်အုပ်ချုပ်ရေးမှူးက အိမ်ထောင်စု စာရင်းကို လိုက်လံကောက်ခံနေကြောင်း ဆီဆိုင်မြို့ဒေသခံ အသက် ၃၀ ကျော် အမျိုးသားတစ်ဦးက သျှမ်းသံတော်ဆင့်ကို ပြောသည်။
“အခု လောလောဆယ်တော့ မြို့ပေါ်က တချို့ရပ်ကွက်တွေမှာ ရပ်ကွက်အုပ်ချုပ်ရေးမှူးက လိုက်ပြီး စာရင်း ကောက်နေပြီဗျ။ ရွာတွေဖက်မှာတော့ ရွာသူကြီးတွေက လူဦးရေ စာရင်းပေးဖို့အတွက် ဆွေးနွေးနေတယ် “ ဟု ၎င်း အမျိုးသားတစ်ဦးက ပြောသည်။
စစ်ကောင်စီမှ စစ်ရှောင်များ၏ လူဦးရေ စာရင်း ပြုစုခိုင်းရာမှာ ကူညီထောက်ပံ့ဖို့ အတွက်မဟုတ်ကြောင်း၊ ၂၀၂၃ ခုနှစ် ရွေးကောက်ပွဲတွင် စစ်ကောင်စီကို မဲပေးရန်အတွက် လိုက်လံပြုစုခိုင်းကြောင်း သိရသည်။
“ စစ်ရှောင်ကို ထောက်ပံ့ပေးဖို့အတွက် စာရင်းကောက်တာတော့ မဟုတ်ဘူးဗျာ။ ၂၀၂၃ ခုနှစ် ရွေးကောက်ပွဲ အတွက် စစ်ကောင်စီက စာရင်းကောက်နေတယ်ဆိုတာ သေချာပါတယ်။ စစ်ရှောင်ကို နေရပ်စွန့်လာတယ်ဆိုတဲ့ ခေါင်းစဉ်အောက်နဲ့ ကောက်တာဗျာ။ စစ်ရှောင်တွေကို သူတို့မေးချင်မှ မေးမယ်။ စစ်ရှောင်ကော်မတီဆီက စာရင်းကိုတော့ သူတို့ အတိတကျ အကုန်ကောက်တယ်။ ပြီးမှ ၁၈ နှစ်အထက် စားရင်း ပြန်ခွဲတယ်“ ဟု ကျေးလက်ဒေသခံ ရပ်ရွာသူကြီး တစ်ဦးက ပြောသည်။
လက်ရှိ ဆီဆိုင်မြို့နယ်အတွင်းသို့ ရောက်ရှိနေသော စစ်ရှောင် ဦးရေမှာ (၃,၅၀၀) ဝန်းကျင် ရှိကြောင်း သိရသည်။
ထို့အပြင် စစ်ကောင်စီသည် ဆီဆိုင်မြို့အတွင်းသို့ လာရောက်ခိုလှုံသူများကို လက်မခံရန်နှင့် နေရပ်ပြန်ရန် အတွက် တစ်ချိန်က ဖိအားပေးခဲ့ပြီး ယခုတွင် ရွေးကောက်ပွဲ အတွက်ဆိုပြီး စစ်ရှောင်များ၏ သန်းခေါင်စာရင်းကို လိုက်လံကောက်ခိုင်းရာတွင် မျှတမှု မရှိကြောင်း၊ နိုင်ငံရေးကို သက်သက်သာသာ အသုံးချနေတယ်လို့ မြင်သည်ဟု သျှမ်းတောင် စစ်ရှောင်ကူညီသူ တစ်ဦးက ပြောသည်။
“ ဒါကလည်း သိတဲ့အတိုင်းပဲ သူတို့က လူဦးရေ များများရဖို့အတွက် ကောက်တယ်။ နိုင်ငံရေးကို သက်သက်သာသာ အသုံးချနေတာ မြင်တယ် “ ဟု သျှမ်းတောင် စစ်ရှောင်ကူညီသူ တစ်ဦးက ပြောသည်။
စစ်ကောင်စီ ပြုလုပ်မည့် ၂၀၂၃ ခုနှစ် ရွေးကောက်ပွဲသည် သီပေါမြို့နယ် ပြည်သူ့လွှတ်တော်အမတ်ဟောင်း ဦးရဲထွန်း VOA သတင်းဌာနမှ ပြောချက်အရ ပြီးခဲ့သည့် ၂၀၂၀ ရွေးကောက်ပွဲတွင် မဲစာရင်း ဖောင်းပွမှုကြောင့် ရွှေးကောက်ပွဲ ကော်မရှင်မှ မဖြေရှင်းနိုင်ရာ အာဏာသိမ်းလိုက်ခဲ့ပြီး ၂၀၂၃ ခုနှစ် စစ်ကောင်စီက ကျင်းပမည့် ရွေးကောက်ပွဲလည်း မဲစာရင်းဖောင်းပွမှု ရှိနိုင်သည်ဟု သိရသည်။
Leave a Comments