သျှမ်းပြည် တောင်ကြီးခရိုင် ညောင်ရွှေမြို့နယ် အင်းလေးအနောက်ဘက်ခြမ်း ဘုရားနီကျေးရွာ နှင့် သန်းထောင်ရွာကြားတွင် စစ်ကောင်စီ နှင့် အင်းလေး IPDF တို့ တိုက်ပွဲဖြစ်ပွားခဲ့ပြီး IPDF တပ်ရင်း ၁၀၀၉ တပ်ရင်းမှူး အပါဝင် (၄) ဦး ကျဆုံးခဲ့ကာ ၃ ဦး ဖမ်းဆီးခံထားရကြောင်း သတင်းရရှိသည်။
ဇန်နဝါရီ (၃) ရက်နေ့က စစ်ကောင်စီ နှင့် အင်းလေး IPDF တို့တိုက်ပွဲကြား IPDF တပ်ရင်း ၁၀၀၉ တပ်ရင်းမှူး နှင့် တပ်ဖွဲ့ဝင် ၂ ဦးတို့က တိုက်ပွဲတွင်း သေဆုံးသွားခဲ့ပြီး ၁ ဦး ဖမ်းဆီးခံခဲ့ရကြောင်း သိရသည်။
“ တိုက်ပွဲကြားမှာက IPDF က တပ်ရင်းမှူးလည်း ကျဆုံးသွားခဲ့တယ်။ ပြီးတော့ တပ်သား ၂ ဦးလည်း ကျဆုံးသွားတယ်။ စစ်ကောင်စီဘက်က အရှင်တစ်ယောက် ဖမ်းသွားနိုင်ခဲ့တယ်။ သေဆုံးသွားတာက သေချာတယ်” ဟု PDF နှင့် နီးစပ်သူ အသက် ၃၀ ကျော်အရွယ်ရှိ အမျိုးသားတစ်ဦးက ပြောသည်။
ထိုအပြင် တိုက်ပွဲကြောင့် ယမန်နေ့ (ဇန်နဝါရီ ၄ ရက်) ညပိုင်းတွင် IPDF ဘက်မှ တပ်ဆုတ်လာချိန် စစ်ကောင်စီ နှင့် ပျူစောထီးတို့က လိုက်လံရှာဖွေရာမှ ခေါင်တိုက်ကျေးရွာအနီး လင်းကင်းကျေးရွာတွင် IPDF တို့ တပ်သား (၃) ဦးကို ထပ်မံ ဖမ်းဆီးခံရကြောင်း သိရသည်။
အဆိုပါ ထပ်မံဖမ်းဆီးခံရသည့် တပ်သား (၃) ဦးထဲတွင် ၂ ဦးကို စစ်ကောင်စီက အရှင်ဖမ်းမိပြီး ကျန်တစ်ဦးက သေဆုံးသွားကြောင်း သိရသည်။
“ တိုက်ပွဲအရှိန်ကြောင့် IPDF တပ်သားတွေ တပ်ဆုတ်လာတဲ့အချိန်မှာ လင်းကင်းကျေးရွာမှာ ထပ်ပြီး (၃) ယောက် ဖမ်းဆီးခံရတယ်။ အဲ့ ၃ ယောက်က ၂ ယောက်ကို အရှင်ဖမ်းမိပြီးတော့ ကျန်တဲ့ ၁ ယောက်က သေနေပြီတဲ့။ သူတို့ဘယ်ကို ဆက်ခေါ်သွားလဲတော့ မသိဘူး” ဟု အထက်ပါ ပုဂ္ဂိုလ် က ပြောသည်။
အဆိုပါ ဇန်နဝါရီ ၃ ရက်နေ့က တိုက်ပွဲတွင် နှစ်ဦးနှစ်ဖက် ထိခိုက်ဒဏ်ရာ ရရှိခဲ့သော်လည်း စစ်ကောင်စီဘက်မှ မည်မျှကျဆုံးသည်ကို မသိရှိရသေးပေ။
တိုက်ပွဲကြောင့် အင်းလေးဒေသတွင် စစ်ကောင်စီက စစ်ဆေးမှု တင်းကြပ်နေလျက်ရှိကြောင်း သိရသည်။
စစ်တပ်အာဏာသိမ်းပြီး ယခု ၂၀၂၃ ခုနှစ်ထဲတွင် သျှမ်းပြည် တောင်ကြီးခရိုင် အင်းလေးကန်ဒေသအတွင်း စစ်ကောင်စီ နှင့် သျှမ်းတောင် PDF တို့ ပထမဆုံး ဖြစ်သည့်တိုက်ပွဲဖြစ်သည်။
Leave a Comments