သျှမ်းပြည် တောင်ကြီးခရိုင် ဆီဆိုင်မြို့နယ် ဆီဆိုင် – လွိုင်ကော်ကြား ပြည်ထောင်စု ကားလမ်းမကြီးပေါ်သို့ ခရီးသွား ပြည်သူများကို ပြည်သူ့စစ် (PNO/PNA) က အခွန် (ဆက်ကြေး) ကောက်ခံနေကြောင်း စုံစမ်းသိရှိရသည်။
ယမန်နေ့ (ဇန်နဝါရီ ၃) ရက် နေ့လည်ပိုင်းတွင် ဆီဆိုင် – လွိုင်ကော်ကြား ကုန်းဆွတ်ကျေးရွာအုပ်စု ကုန်းလောရွာအနီးရှိ ပြည်သူ့စစ် (PNO/PNA) စစ်ဆေးရေးဂိတ်တွင် ပြည်သူ့စစ် တပ်သားများက ခရီးသွားလာပြည်သူကို “အထက်အမိန့်က တောင်းခိုင်းသည်” ဟုဆိုပြီး တစ်ဦးလျှင် ကျပ်ငွေ ၅,၀၀၀ ဆက်ကြေးကောက်ခံနေကြောင်း ကြုံတွေ့ရသူ ဒေသခံတစ်ဦးက သျှမ်းသံတော်ဆင့် ကိုပြောသည်။
“ အရင်တခါက သူတို့ အဲ့လောက်မတောင်းဘူးဗျ။ လက်ဖက်ရည်ဖိုး၊ ဆေးလိပ်ဖိုးကို ကျပ်ငွေ (၅၀၀)၊ (၁,၀၀၀) လောက်ဘဲ တောင်းတယ်။ အခုက အထက် တောင်းခိုင်းတယ်ဆိုပြီး တစ်ယောက်ကို ကျပ်ငွေ ၅,၀၀၀ တောင်းသွားတယ်။ ပြီးတော့ သူတို့ ကဒ်တစ်ခုပေးလာပြီး အဲ့ကဒ်ရှိရင် အခွန်မကောက်တော့ဘူးလို့ပြောတယ်“ ဟု ၎င်း ဒေသခံတစ်ဦးက ပြောသည်။
ဆီဆိုင် – လွိုင်ကော်ကြား ပြည်ထောင်စု ကားလမ်းမပေါ် တလျောက်တွင် ပြည်သူ့စစ် (PNO/PNA) စစ်ဆေးရေးဂိတ် ၂ ဂိတ် ရှိသလို စစ်ကောင်စီ စစ်ဆေးရေးဂိတ် စုစုပေါင်း (၃) ဂိတ်ရှိရာ ခရီးသွားပြည်သူများသည် အမြဲအခွန် ဆောင်နေရကြောင်း သိရသည်။
ထို့အပြင် ခရီးသွားလာ ပြည်သူများသည် စစ်ဆေးရေးဂိတ်တွင် ဆက်ကြေး အမြဲဆောင်နေရပြီးနောက်ပိုင်း အရေးတကြီး ခရီးသွားလိုလျှင် မသွားနိုင်ဘဲ စစ်ဆေးရေးဂိတ်မှာ အချိန်ပိုကုန်၊ ကြာမြင့်လာသလို စားဝတ်နေရေး ကြပ်တည်းသည့် ယခုလို ကာလမှာလည်း ပြည်သူများ ပိုခက်ခဲစေလာကြောင်း ၎င်းဒေသခံအမျိုးသားက ဆက်ပြောသည်။
“ တဖက်က နိုင်ငံရေးလည်း မကောင်းဘူး။ လက်နက်ကိုင်တွေက စစ်ဆေးရေး ဂိတ်ဖွင့်ပြီး ပြည်သူတွေကို အခွန်ကောက်ခံလာတာ ကြာလာရင် ကျနော်တို့ဘဲ ပိုခက်ခဲလာတယ်။ အရင်လို သွားလာလို့ အဆင်မပြေ တော့ဘူး၊ စစ်ဆေးရေးဂိတ်မှာ သူတို့ ရစ်သမျှခံပြီး အချိန်ကုန်တယ်။ နောက်ပိုင်း ကျနော်တို့ စီးပွားရေးလည်း ထိခိုက်လာတယ်“ ဟု ၎င်းဒေသခံ အမျိုးသားက ထပ်လောင်းပြောသည်။
စစ်အာဏာသိမ်းပြီးနောက်ပိုင်း သျှမ်းပြည်အတွင်းရှိ စစ်ဆေးရေးဂိတ်မှာ ယခင်ထက် ဂိတ်များပိုမို ဖွင့်လှစ်လာနိုင်သဖြင့် ပြည်သူများကို မှတ်ပုံတင်၊ အိမ်ထောင်စု ဇယားကိုလည်း အမြဲစစ်ဆေးမေးမြန်း လေ့ရှိကြောင်း သိရသည်။
Leave a Comments