သျှမ်းပြည် လွိုင်လင်ခရိုင် နမ့်စန်မြို့ အမှတ် (၁) အထက်တန်းကျောင်းသား အချင်းချင်း ခိုက်ရန် ဖြစ်ပွားရာမှ သေဆုံး သွားရသည့် ကျောင်းသားအမှုကို ကြေအေးပေးရန် စစ်ကောင်စီ အသိုင်းအဝိုင်းက ဖိအားပေးနေကြောင်း စုံစမ်းသိရှိရသည်။
ပြီးခဲ့သည့် ၂၀၂၂ ခုနှစ် နိုဝင်ဘာလ ၂ ရက်တွင် နမ့်စန် အမှတ် (၁) အထက်တန်းကျောင်းမှ ကျောင်းသား အချင်းချင်း ခိုက်ရန် ဖြစ်ပွားပြီး မောင်အောင်မော်ဟိန်း သည် ရရှိသည့် ဒဏ်ရာဖြင့် နိုဝင်ဘာလ ၅ ရက်တွင် သေဆုံးသွားခဲ့ရသည်။
ထို သေဆုံးမှုကြောင့် မောင်အောင်မော်ဟိန်း၏ မိဘများက ကျူးလွန်သူကို အမှုဖွင့်ထားခဲ့သည်။
ထိုအမှုကို ပိတ်သိမ်း ကြေအေးပေးရန် စစ်ကောင်စီ အသိုင်းအဝိုင်း၏ ဖိအားပေးခံရခြင်း ဖြစ်ကြောင်း မောင်အောင်မော်ဟိန်း မိသားစုနှင့် နီးစပ်သူ အမျိုးသား တစ်ဦးက သျှမ်းသံတော်ဆင့်ကို ပြောသည်။
“ကလေး (မောင်အောင်မော်ဟိန်း) ရဲ့ နာရေးပြီးခါစမှာ ကျူးလွန်တဲ့ ကျောင်းသားမိဘက အမှုကို ပိတ်ပေးလို့ ရမလားဆိုပြီးတော့ ပိုက်ဆံ သိန်း ၂၀ ပေးတယ်၊ ဒါပေမဲ့ ကလေးရဲ့ မိဘတွေက လက်မခံ ပါဘူး၊ ကလေးက မသေသင့်ပဲ သေခဲ့ရလို့ ကျူးလွန်သူကို ဥပဒေအတိုင်းပဲ သွားမယ်လို့ ပြန်ပြောခဲ့တယ်” ဟု မောင်အောင်မော်ဟိန်း ၏ မိဘနှင့် နီးစပ်သူ အသက် ၅၀ ကျော် အမျိုးသားတစ်ဦးက သျှမ်းသံတော်ဆင့်ကို ပြောသည်။
ထို့အပြင် အမှုဖွင့်ပြီး စွဲချက်တင်သည့် ၂၀၂၂ ခုနှစ် ဒီဇင်ဘာလ ၅ ရက်တွင်လည်း နမ့်စန်မြို့ရှိ ရဲစခန်းမှ အမှုကို ကြေအေးပေးသင့်ကြောင်း နှင့် တစ်ဖက်ကလေး၏ တက်လမ်းကို ငဲ့ညှာသင့်ကြောင်း မောင်အောင်မော်ဟိန်း၏ မိဘကို ပြောဆိုခဲ့ကြောင်း သိရသည်။
“သေတဲ့ ကလေးကသေသွားပြီ၊ ကျူးလွန်သူဘက်ကလည်း ပိုက်ဆံရှိတာ မဟုတ်ဘူး၊ သိန်း ၂၀ ဖြစ် ၃၀ ဖြစ်ဖြစ် ယူပြီး ကြေအေးပေးလိုက်ပေါ့၊ သူများကလေး တက်လမ်းရှိသေးတာကို စဥ်းစားပြီး ငဲ့ညှာပေးသင့်တယ် ဆိုပြီးတော့ ပြောလာတယ်” ဟု အထက်ပါ အမျိုးသားက ဆက်ပြောသည်။
လက်ရှိတွင် မောင်အောင်မော်ဟိန်း၏ မိဘများ အနေဖြင့် ကျူးလွန်သူ ကျောင်းသားကို ဥပဒေအတိုင်း အရေးယူ ဆောင်ရွက်စေလိုကြောင်း နှင့် တစ်ဖက်တွင်လည်း လုံခြုံရေးအတွက် စိုးရိမ်ကြောက်လန့်မှုများ ရှိနေကြောင်း သိရသည်။
“တစ်ဖက်က စစ်ကောင်စီ အသိုင်းအဝိုင်း လက်နက်ကိုင်ကြတဲ့ သူတွေဆိုတော့လည်း ကြောက်ရတာပေါ့၊ သွားရေး လာရေးကအစ စိုးရိမ်နေရတာမျိုးရှိတယ်၊ သေတဲ့ ကလေးက သေသွားပြီဆိုပေမဲ့ ကျူးလွန်သူကိုသာ ဒီအတိုင်းလွတ်လိုက်ရင်လည်း စစ်ကောင်စီ အသိုင်းအဝိုင်းက ဒီလိုလုပ်လို့ရလားဆိုပြီး ပြောစရာတွေ ဖြစ်မှာကို မလိုလားဘူး၊ ဒါကြောင့် ကြောက်တဲ့ကြားကနေ မိဘတွေကတော့ အမှုကို ဆက်ဖွင့်ထားတာ” ဟု မောင်အောင်မော်ဟိန်း မိဘနှင့် နီးစပ်သည့် အမျိုးသမီးတစ်ဦးက ပြောပြသည်။
ထို့အပြင် မောင်အောင်မော်ဟိန်း၏ ဖခင်ဖြစ်သူလည်း သားဆုံးရှုံးလိုက်ရသည့် စိတ်ကြောင့် ကျန်းမာရေးများ ထိခိုက်ပြီး ဆေးသွင်းနေရကြောင်း နီးစပ်သူ အမျိုးသမီးတစ်ဦးက သျှမ်းသံတော်ဆင့်ကိုဆက်ပြောသည်။
သေဆုံးသွားသည့် မောင်အောင်မော်ဟိန်း၏ မိဘများသည် နမ့်စန်မြို့ ဒေသခံ နေ့စားအလုပ်သမားများသာဖြစ်ပြီး၊ ၎င်းနှင့် ရန်ဖြစ်သည့် ကျောင်းသားသည် နမ့်စန်လေတပ်၏ အသိုင်းအဝိုင်းမှ ဖြစ်ကြောင်းသိရသည်။
