ကျိုင်းတုံလေဆိပ်ကို လာအို၊ တရုတ် နှင့် ထိုင်း နိုင်ငံများမှ လေယာဉ် တိုက်ရိုက်ဆင်းသက်နိုင်ရန် အဆင့်မြှင့်တင်မည်ဟု စစ်ခေါင်းဆောင်ပြော

သျှမ်းပြည် ကျိုင်းတုံလေယာဉ်ပြေးလမ်း အဆင့်မြှင့်တင်နိုင်ရန် အတွက် အာဏာသိမ်း စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင် ပြောဆိုခဲ့သည်။

ယမန်နေ့ (မေလ ၁၁) ရက် ညနေပိုင်းအချိန်၌ ကျိုင်းတုံမြို့သို့ ရောက်ရှိခဲ့ပြီး ကျိုင်းတုံလေဆိပ်ကို ပြည်တွင်းတွင် အသုံးပြုနေသည့် လေယာဉ်ကြီးများ ဆင်းသက်နိုင်သည်အထိ အဆင့်မြှင့်တင် ဆောင်ရွက်သွားမည်ဟု နစကဉက္ကဌ မှ ပြောကြားခဲ့သည်။

ထို့နောက် အိမ်နီးနားချင်းနိုင်ငံများနှင့် ချိတ်ဆက်ဆောင်ရွက်ရာတွင်လည်း လာအိုနိုင်ငံ၊ တရုတ်နိုင်ငံ နှင့် ထိုင်းနိုင်ငံများမှ ကျိုးတုံလေဆိပ်တို့ တိုက်ရိုက် ပျံသန်းဆင်းသက်နိုင်ရေး အဆင့်မြှင့်တင် ဆောင်ရွက်မည်ဖြစ်ကြောင်း ၎င်းက ထပ်လောင်းပြောသည်။

“ ကျနော်တို့ ကျိုင်းတုံက ထိုင်းနဲ့လည်း နီးသလို တရုတ်နဲ့လည်း နီးတယ်လေ။ အစိုးရတွေကသာ တကယ်လုပ်နိုင် တော့ ဒီနေရာမှာ လေယာဉ်တွေ ဆင်းနိုင်ပါတယ်။ ဆက်သွယ်လို့ရတယ်။ သူတို့က ဟန်ပြလုပ်နေတာပါ။ သတင်းမီဒီယာ တွေမှာတော့ မြေသားကို ညီညာအောင် လုပ်နေတာတော့ ဓာတ်ပုံတွေ တွေ့တယ် “ ဟု ကျိုင်းတုံမြို့ဒေသခံ တစ်ဦးက ပြောသည်။

လက်ရှိ ကျိုင်းတုံလေဆိပ်ကို လေယာဉ်ကြီးများ ဆင်းသက်နိုင်သည်အထိ အဆင့်မြှင့်တင် ဆောင်ရွက်သွားမည့် အပေါ် စစ်ကောင်စီသည် ဟန်ပြသာလုပ်ပြနိုင်ခြင်း ဖြစ်ပြီး တကယ်လက်တွေ့ ၌ ဆောင်ရွက်နိုင်ဖို့အတွက် အားနည်းနေသေးကြောင်း ဒေသခံများက ဝေဖန်ပြောဆိုနေသည်။

အလားတူ ဒေသခံတစ်ဦးက “ ကျိုင်းတုံလေဆိပ်မှာ လေယာဉ်ကြီးတွေ ဆင်းသက်နိုင်တော့ ကောင်းတာပေါ့။ တကယ်လို့ ကျနော်တို့ ကျိုင်းတုံက ပြည်သူတွေ ချင်းမိုင်သွားချင်ရင် လွယ်လွယ်နဲ့ သွားလို့ရမယ်လေ။ ရန်ကုန်၊ မန္တလေးတောင် သွားစရာ မလိုတော့ဘူး။ ခရီးသွားတဲ့နေရာမှာ ပိုပြီး အဆင်ပြေသွားမှာပေါ့ “ ဟု ၎င်းက ထပ်လောင်းပြောသည်။

ထို့အပြင် တာချီလိတ်လေဆိပ်ကိုလည်း လေယာဉ်ကြီးများ ဆင်းသက်နိုင်သည်အထိ အဆင့်မြှင့် တိုးချဲ့သွားရန် နစက ဉက္ကဌက ပြီးခဲ့သည့် ဧပြီလတွင် အသိပေး ပြောဆိုထားခဲ့သည်။

ပြီးခဲ့သည့် ၁၉၅၀ ခုနှစ်ကတည်းမှစ၍ နိုင်ငံတော်အစိုးရမှ ကျိုင်းတုံလေဆိပ်ကို စတင်ဆောင်ရွက်လာခဲ့ပြီး ယနေ့ထက်ထိ ကျိုင်းတုံလေဆိပ်ကို လေယာဉ်ကြီးများ ဆင်းသက်နိုင်သည်အထိ အဆင့်မြှင့်တင် ဆောင်ရွက်သွားမည်ဖြစ်ကြောင်း သိရသည်။