သျှမ်းပြည် လွိုင်လင်ခရိုင်၊ နမ့်စန်မြို့နယ်ရှိ စစ်ကောင်စီ၏ လေတပ်စခန်း ဌာနချုပ်တွင် တိုက်လေယာဉ် အတက်အဆင်း ပိုမိုများပြားလာပြီး နေ့၊ည အချိန်မရွေး ပျံသန်းမှု ခပ်စိပ်စိပ် ရှိနေကြောင်း စုံစမ်းသိရသည်။
လားရှိုးမြို့ အရှေ့မြောက်ပိုင်း တိုင်းစစ်ဌာနချုပ်နှင့် ကပ်ရပ်ရှိ လားရှိုးလေဆိပ်နှင့် လေတပ်စခန်းတို့ကို ကိုးကန့်တပ်ဖွဲ့ MNDAA က ဇူလိုင်လ ၃၀ ရက်တွင် သိမ်းပိုက်လိုက်သည်။
၎င်းနောက်တွင် သျှမ်းပြည်တောင်ပိုင်းဘက် တစ်ခုတည်း ကျန်ရှိသည့် စစ်ကောင်စီ၏ နမ့်စန်လေတပ်စခန်းတွင် တိုက်လေယာဉ် အပါအဝင် စစ်သုံးရဟတ်ယာဉ်များ အတက်အဆင်း ပိုမိုများပြားလာပြီး နေ့ည အချိန်မရွေး ပျံသန်းမှု ခပ်စိပ်စိပ် ရှိလာကြောင်း နမ့်စန်ဒေသခံများက ပြောသည်။
“ပုစဉ်းအသေးတွေလည်း လာဆင်းတာ အခေါက်ရေ များလာတယ်။ ဒီနောက်ပိုင်း ဂျက်ဖိုက်တာတွေ ဆင်းတာ များတယ်။ ကျနော်အထင် ဒီကတက်သွားရင် သီပေါဘက်တွေ ဗုံးသွားကြဲတာပေါ့။ မနေ့က တစ်ရက်တည်း ရဟတ်ယာဉ်ပဲကို ၇ ခေါက်လောက် ဆင်းတယ်။ စစ်သုံးလေယာဉ် ဗုံးကြဲလေယာဉ်တွေပဲ တော်တော်စိပ်လာတယ်”ဟု နမ့်စန်မြို့ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
ယခုရက်ပိုင်းအတွင်း နမ့်စန်မြို့ရှိ စစ်ကောင်စီ လေတပ်စခန်းမှ တိုက်လေယာဉ်များသည် တစ်နေ့လျှင် ပျမ်းမျှ ၅ ကြိမ်မှ ၈ ကြိမ်အထိ အတက်အဆင်း ပြုလုပ်ပျံသန်းနေကြောင်း နမ့်စန်ဒေသခံများက ပြောသည်။
“လေယာဉ်တက်ဆင်းလုပ်ရင် အမြဲတမ်း ဆူညံနေတာ။ နိမ့်နိမ့်လေး ပျံရင် လန့်တောင် လန့်တယ်။ ရောဂါအခံရှိတဲ့လူနဲ့ လူအိုတွေဆိုရင် မခံနိုင်ဘူး။ စစ်ဖြစ်နေတဲ့ ဒေသဆိုရင် လေယာဉ်နဲ့ ဗုံးကြဲမှာ သေချာတယ်လေ။ နောက်တစ်မျိုး စဉ်းစားရင် နမ့်စန်ကလည်း လေတပ်ရှိတာဆိုတော့ စစ်ရေးပစ်မှတ်လို ဖြစ်လာမှာပေါ့”ဟု ၎င်းအမျိုးသားက သျှမ်းသံတော်ဆင့်ကို ဆက်ပြောသည်။
လက်ရှိတွင် သျှမ်းပြည်အတွင်း စစ်ကောင်စီတပ်၏ တိုက်လေယာဉ်များ ဆင်းသက်နိုင်သည့် လေဆိပ်မှာ လားရှိုးလေတပ်စခန်း ကျပြီးနောက်တွင် နမ့်စန်လေတပ်စခန်း ဌာနချုပ်တွင်သာ ကျန်ရှိတော့ကြောင်း သိရသည်။
သျှမ်းပြည်မြောက်ပိုင်းသို့ လေကြောင်းတိုက်ခိုက်မှု ပြုလုပ်ရန် စစ်ကောင်စီ တိုက်လေယာဉ်များ ပျံတက်နေသည့် မန္တလေးတိုင်း တံတားဦး လေတပ်စခန်းမှာလည်း တော်လှန်ရေးတပ်ဖွဲ့များ၏ ခြိမ်းခြောက်မှုကို ခံနေရပြီး တံတားဦး လေကြောင်းရန် ကာကွယ်ရေးတပ်စခန်းကို ပြည်သူ့ကာကွယ်ရေးတပ်ဖွဲ့ PDF များက ဩဂုတ်လ ၂၂ ရက်တွင် သိမ်းပိုက်ထားသည်။
ဩဂုတ်လ တတိယပတ်မှ စတင်ပြီး တအာင်း(ပလောင်) အမျိုးသားလွတ်မြောက်ရေး တပ်မတော် TNLA ထိန်းချုပ်ထားသည့် ကျောက်မဲ၊ သီပေါနှင့် မိုးမိတ်မြို့များသို့ စစ်ကောင်စီတပ်မှ ထပ်မံ၍ လေကြောင်းဗုံးကြဲ တိုက်ခိုက်ခဲ့ရာ အရပ်သား ၆ ဦးထက်မနည်း သေဆုံးပြီး ဘုန်းကြီးကျောင်းနှင့် ပြည်သူနေအိမ် (၁၀၀) ကျော် ထိခိုက်ပျက်စီးခဲ့ကြောင်း ဒေသခံများထံမှ သိရသည်။
Leave a Comments