သျှမ်းပြည် ကျိုင်းတုံခရိုင် ကျိုင်းတုံမြို့နယ် ကျိုင်းတုံမြို့ဒေသခံများထံ စစ်ကောင်စီ လက်အောက်ခံ စစ်ဖက်ရေးရာ လုံခြုံရေး တပ်ဖွဲ့ (စရဖ) ဟုဆိုပြီး ဖုန်းမှတဆင့် ခြိမ်းခြောက်ငွေတောင်းခံမှုများ ရှိနေကြောင်း စုံစမ်းသိရှိရသည်။
ပြီးခဲ့သည့် ဒီဇင်ဘာလ ပထမပတ်ကစပြီး ယနေ့ အချိန်ထိ ကျိုင်းတုံမြို့တွင် အမည်မသိ အဖွဲ့အစည်းတစ်ခုက ဒေသခံပြည်သူများထံ တိုက်ရိုက်ဖုန်းခေါ်ဆိုလာပြီး ကျပ်သိန်း ၅၀ တောင်းခံကာ မပေးနိုင်လျှင် အိမ်ထိလာရောက် ဖမ်းဆီး ခေါ်ဆောင်မည်ဟု ခြိမ်းခြောက်နေကြောင်း ကြုံတွေ့ခဲ့သူ ဆရာတော်တစ်ပါးက သျှမ်းသံတော်ဆင့်ကို မိန့်ကြားသည်။
“ဆရာတော်ကို PDF နဲ့ ပတ်သက်တယ်ဆိုပြီး ဖုန်းဆက်ငွေတောင်းလာတယ်။ သူတို့ကို (စ.ရ.ဖ) ကဆိုပြီး ပြောတယ်။ PDF နဲ့ ပတ်သက်ထားတယ်၊ အဖမ်းမခံရချင်ရင် ကျပ်ငွေ သိန်း (၅၀) လွှဲလာပေးလို့ ပြောတယ်။ ဆရာတော်ကတော့ မယုံလို့ မလွှဲပေးဘူး“ ဟု ဆရာတော် တစ်ပါးက မိန့်ကြားသည်။
အဆိုပါ ဖုန်းမှတစ်ဆင့် ခြိမ်းခြောက်ငွေတောင်းလာမှုနှင့် ပတ်သက်ပြီး ကျိုင်းတုံမြို့ စစ်ကောင်စီ တပ်ရင်း (၅၂၉) ကို အကြောင်းကြားထားသည်ဟု သိရသည်။
အလားတူ ကျိုင်းတုံမြို့ မြို့မဈေးထဲတွင် ငွေလဲလှယ် အလုပ်ကို လုပ်ကိုင်နေသည့် အမျိုးသား တစ်ဦးကလည်း ပြီးခဲ့သည့် ရက်ပိုင်းတွင် ဖုန်းမှတစ်ဆင့် ခြိမ်းခြောက် ငွေတောင်းခံရကြောင်း သျှမ်းသံတော်ဆင့် ကိုပြောသည်။
“ ကျနော်ကို နိုင်ငံရေးနဲ့ ပတ်သက်တယ်ဆိုပြီး ဖုန်းဆက်ငွေတောင်းလာတာဗျာ။ နိုင်ငံရေး ပတ်သက်တဲ့သူကို ဖမ်းမယ်။ ဖမ်းခံရရင် တရားလွှတ်တော်ကို ရင်ဆိုင်ရမယ်၊ ပိုက်ဆံအများကြီးကုန်မယ်ဆိုပြီး အဖမ်းမခံချင်ရင် ကျပ်သိန်း ၇၀ လွှဲလာပေး၊ မလွှဲရင် လာဖမ်းမယ်ဆိုပြီး ခြိမ်းခြောက်လာဗျာ။ သူတို့ကို ဗိုလ်မှူးရုံးကလို့ ပြောတယ် “ ဟု ကြုံတွေ့ခဲ့ရသူ ၎င်းအမျိုးသားတစ်ဦးက ပြောသည်။
လက်ရှိ ခြိမ်းခြောက်ငွေတောင်း ခံနေရသူသည် ဆရာတော် အပါအဝင် ၅ ဦးထက်မနည်း ရှိနေပြီဖြစ်ကြောင်း သိရသည်။
ပြီးခဲ့သည့် အောက်တိုဘာလတွင် ပင်လုံမြို့ ပြည်သူ့ကာကွယ်ရေးတပ်ဖွဲ့ နာမည်ဖြင့် ဒေသခံပြည်သူများထံ ခြိမ်းခြောက်ငွေတောင်းခံမှု ဖြစ်စဉ်ရှိခဲ့ကြောင်း သိရသည်။
Leave a Comments