စစ်ကောင်စီမှ ပေးအပ်သည့် ဝဏ္ဏကျော်ထင်ဘွဲ့ ယူရန်အတွက် သျှမ်းပြည် ပြန်လည်ထူထောင်ရေးကောင်စီ၊ သျှမ်းပြည်တပ်မတော် RCSS/SSA ခေါင်းဆောင် ဗိုလ်ချုပ်ကြီး ယွက်စစ် ကိုယ်တိုင်တက်ယူမည် မဟုတ်ကြောင်း စုံစမ်းသိရသည်။

လာမည့် ဇန်နဝါရီလ ၄ ရက်တွင် နေပြည်တော်၌ ပြုလုပ်သည့် လွတ်လပ်ရေးနေ့ အခမ်းအနားနှင့်အတူ ဝဏ္ဏကျော်ထင် ဘွဲ့ရသူများကို ဘွဲ့လက်မှတ် ချီးမြှင့်ပေးအပ်မည် ဖြစ်ကြောင်း သိရသည်။

“ဝဏ္ဏကျော်ထင် ဘွဲ့ယူဖို့အတွက် ဗိုလ်ချုပ်ကြီး ယွက်စစ်ကိုယ်တိုင်တော့ တက်မှာမဟုတ်ဘူး။ ဘွဲ့ယူဖို့အတွက် သူ့ကိုယ်စား တခြား တာဝန်ရှိသူတစ်ဦးနဲ့ ကိုယ်စားလှယ်အဖွဲ့တွေကို လွတ်မယ်လို့ သိရတယ်” ဟု ခိုင်မာသည့် သတင်းရင်းမြစ် တစ်ဦးက သျှမ်းသံတော်ဆင့်ကို ပြောသည်။

ယင်းကိစ္စဖြစ်စဥ်နှင့် ပတ်သက်ပြီး အသေးစိတ် မေးမြန်းသိရှိရန်အတွက် သျှမ်းပြည် ပြန်လည်ထူထောင်ရေး ကောင်စီ (RCSS/SSA) ၏ ပြောရေးဆိုခွင့် ရှိသူများနှင့် သျှမ်းသံတော်ဆင့်မှ ဆက်သွယ်မေးမြန်းခဲ့ရာ “အခုကိစ္စနဲ့ ပတ်သက်ပြီး ကျနော်တို့ဘက်မှာ ဘာမှ ဖြေကြားဖို့ မရှိဘူး” ဟု ဆိုသည်။

လက်ရှိတွင် သျှမ်းသံတော်ဆင့်၏ ခိုင်မာသည့် သတင်းရင်းမြစ်အရ ဗိုလ်ချုပ်ကြီးယွက်စစ် အစား နေပြည်တော်သို့ ဝဏ္ဏကျော်ထင်ဘွဲ့ရယူရန်အတွက် RCSS/SSA မှ ဗိုလ်မှူးကြီး သျှောင်းဟန်ကို အစားထိုး လွတ်မည်ဟုလည်း သိရသည်။

ပြီးခဲ့သည့် ၂၀၂၂ ခုနှစ် ဒီဇင်ဘာ ၂၇ ရက်မှ ၂၉ ရက်အထိ ကျင်းပပြုလုပ်သည့် အမျိုးသား စည်းလုံးညီညွတ်ရေး နှင့် ငြိမ်းချမ်းရေးဖော်ဆောင်မှု ညှိနှိုင်းရေး ကော်မတီ (NSPNC) နှင့် NCA လက်မှတ်ထိုးထားသော EAOs တို့ ဆွေးနွေးပွဲတွင် EAOs ၅ ဖွဲ့ တက်ရောက်ခဲ့ပြီး RCSS/SSA နှင့် မွန်ပြည်သစ်ပါတီ (NMSP) တို့ တက်ရောက်ခြင်း မရှိခဲ့ပေ။

ယင်းကဲ့သို့ ဆွေးနွေးပွဲ တက်ရောက်ခြင်း မရှိသလို ဝဏ္ဏကျော်ထင်ဘွဲ့ ရယူရန်အတွက်လည်း ဗိုလ်ချုပ်ကြီး ယွက်စစ် ကိုယ်တိုင် တက်ရောက်မည် မဟုတ်ကြောင်း သတင်းလည်း ထွက်ပေါ်လာခြင်း ဖြစ်သည်။

ပြီးခဲ့သည့် ဧပြီလ ၁၇ ရက်နေ့တွင် နစက ဥက္ကဌ ဗိုလ်ချုပ်မှူးကြီး မင်းအောင်လှိုင် မှ ပေးအပ်သည့် ဝဏ္ဏကျော်ထင်ဘွဲ့ ရရှိသူများမှာ RCSS ဥက္ကဋ္ဌ ဗိုလ်ချုပ်ကြီးယွက်စစ်၊ KNU ဥက္ကဋ္ဌ ဗိုလ်ချုပ်ကြီး စောမူတူးစေးဖိုး၊ ALP မှ ဦးခိုင်စိုးနိုင်အောင်၊ NMSP ဥက္ကဋ္ဌဟောင်း ဦးနိုင်ထောမွန်၊ NMSP ဥက္ကဋ္ဌဟောင်း နိုင်ရွှေကျင်၊ PNLO ၏ ဦးဆောင်နာယက ဗိုလ်မှူးကြီးခွန်ဥက္ကာ၊ KNU/KNLA-PC ဥက္ကဋ္ဌဟောင်း ဗိုလ်ချုပ်ဌေးမောင် (ခ) စောဌေးမောင်၊ KIO(ခွဲထွက်) ဦးလဆန်အောင် ဝါအဖွဲ့မှ ခေါင်းဆောင် ဦးလဆန်အောင်ဝါ၊ KNU ဖဒိုအောင်ဆန်းအဖွဲ့မှ ဖဒိုအောင်ဆန်း၊ KNU တပ်မ ဟာ(၂) သံတောင် အထူးဒေသအဖွဲ့မှ စောဖယ်ရီမိုး၊ KNU တပ်မတော်(၆) တပ်ရင်း(၁၆)မှ ဦးစောသမူဟဲ တို့ ဖြစ်သည်။

ထို့ပြင် ကချင်ပြည်နယ် အထူးဒေသ – ၁ NDAK ဥက္ကဋ္ဌ ဦးစခုန်တိန့်ယိန်း၊ ပအိုဝ်းအမျိုးသားအဖွဲ့ချုပ်(PNO) ဥက္ကဋ္ဌ ဦးအောင်ခမ်းထီ၊ ပလောင်ပြည်နယ်လွတ်မြောက်ရေးတပ်မတော် (PSLA) ဥက္ကဋ္ဌ ဦးအိုက်မုန်း၊ ကယားပြည်နယ် အထူးဒေသ-၁ (ကယန်းအဖွဲ့ – KNG)ခေါင်းဆောင် ဦးကေဘရယ်ပျံ၊ ကယားပြည်နယ် အထူးဒေသ – ၂ (ကရင်နီလူမျိုးပေါင်းစုံပြည်သူ့ လွတ်မြောက်ရေးအဖွဲ့-ကလလတ) ခေါင်းဆောင် ဦးစန္ဒာ၊ DKBA ဆရာတော်ဟု နာမည်တွင်သော မြိုင်ကြီးငူဆရာတော် ဦးသုဇန၊ ကရင်တော်လှန်ရေးကောင်စီ ဗဟိုအာဏာပိုင်အဖွဲ့ခေါင်းဆောင် စောဟန်တာသာမွေး၊ လားဟူဒီမိုကရက်တစ် အစည်းအရုံး (LDU) ဥက္ကဋ္ဌ ကြာခွန်ဆာ တို့ဖြစ်ကြသည်။