သျှမ်းပြည်မြောက်ပိုင်း လားရှိုး၊ သီပေါ၊ မိုင်းရယ် နှင့် တန့်ယန်းဘက် လမ်းမကြီးပေါ်တွင် စစ်ကောင်စီမှ ရှောင်တခင် စစ်ဆေးမှု ပိုများပြားလာကြောင်း စုံစမ်းသိရှိရသည်။
ယခုနှစ် ဒီဇင်ဘာလအတွင်း စစ်ကောင်စီက PDF ဟု အကြောင်းပြပြီး ပြည်ထောင်စု လမ်းမကြီးပေါ်တွင် စစ်ဆေးရေးဂိတ်မချတော့ဘဲ ကြုံသလို စစ်ဆေးနေလျက်ရှိကြောင်း ခရီးသွားတစ်ဦး က သျှမ်းသံတော်ဆင့်ကိုပြောသည်။
“ ပြီးခဲ့တဲ့ ရက်ပိုင်းလေးက သူတို့ မိုင်းရယ်မြို့အဝင်မှာ စစ်ဆေးနေတာ။ အခုဆို စစ်ဆေးနေကျ ဂိတ်မှာ မစစ်ဆေးတော့ဘူး။ သူတို့ကြုံရာစစ်ဆေးတာ။ သူတို့ စစ်ချင်တဲ့နေရာမှာ စောင့်ပြီးတော့ စစ်ဆေးတာ။ လားရှိုး၊ သီပေါ လမ်းတွေပေါ်မှာဆို အရမ်းကို စစ်ဆေးနေတယ်။ သီပေါ တိုးဂိတ်မှာလည်း ထပ်စစ်ဆေးသေးတယ်” ဟု စစ်ဆေးခံရသည့် ခရီးသည်တစ်ဦးက ပြောသည်။
အဆိုပါ စစ်ဆေးရေးဂိတ် များပြားလာသောကြောင့် ပြည်သူများ ခရီးသွားလာရာတွင် ခက်ခဲလာကြောင်းလည်း သျှမ်းမြောက် လားရှိုးလူငယ် တစ်ဦးက ပြောသည်။
“ ခရီးသွားလာရတာတော့ ခက်ခဲတာပေါ့။ တကယ်တော့ သူတို့ လက်နက်ကိုင်တွေ၊ PDF လူငယ်တွေကို စစ်ဆေးချင်တာ။ လူငယ်တွေတော့ ပိုပြီးစစ်ခံရတာပေါ့။ အကုန်မေးခံရတယ်။ လွယ်အိတ်တွေထဲကော သူတို့ အကုန်စစ်တာ။ မသင်္ကာရင် သူတို့ ခေါ်ထားတာ” ဟု စစ်ဆေးခံရသည့် လူငယ်တစ်ဦးက ပြောသည်။
အလားတူ လက်ရှိတွင်လည်း မူဆယ်မြို့နယ် နှင့် နမ့်ခမ်းမြို့နယ်တို့တွင်လည်း စစ်ကောင်စီက အင်တာနက်လိုင်း၊ ဖုန်းလိုင်းများ ပိတ်သိမ်းထားပြီး စစ်ဆေးနေလျက်ရှိကြောင်း သိရသည်။
ထိုအပြင် တရုတ်နိုင်ငံတွင်းမှ ပြန်ထွက်လာသည့် ကုန်တင်ကားကြီးများကိုလည်း စစ်ကောင်စီက စစ်ဆေးရေးဂိတ်တိုင်းတွင် စစ်ဆေးမေးမြန်းပြီး ကားနံပါတ်ကို ကြည့်ကာ ဖမ်းဆီးနေလျက်ရှိသည်။
စစ်ကောင်စီက အာဏာသိမ်းပြီးနောက်ပိုင်း ပြည်သူများ ခရီးသွားလာရန်ခက်ခဲသည့်အပြင် ကူးသန်းရောင်းဝယ်ရေးအတွက်လည်း လုံခြုံမှုမရှိတော့ပေ။
