သျှမ်းပြည်မြောက်ပိုင်း မူဆယ်မြို့ စွမ်စော်ရပ်ကွက်အတွင်း လောင်းကစားဝိုင်းများကို ၂၄ နာရီ ပိတ်ရက်မရှိ ပေါ်တင် ပြုလုပ်နေပြီး သက်ဆိုင်ရာမှ အရေးယူမှုမရှိကြောင်း စုံစမ်းသိရသည်။
စစ်အာဏာသိမ်းပြီးနောက်ပိုင်းတွင် မူဆယ်မြို့ စွမ်စော်ရပ်ကွက်ရှိ လမ်းဆိုင်းဘုတ်များတွင် တရုတ်စာများ ရေးသားခြင်း၊ လောင်းကစား( ကြက်တိုက်) ခြင်းများကိုလည်း တရုတ်စာများဖြင့် လမ်းထိပ်တွင် ရေးသားကြေငြာ ထားမှုများလည်းရှိကြောင်း မူဆယ်မြို့ ဒေသခံများ ပြောပြချက်အရ သိရသည်။
“ စွမ်စော်ရပ်ကွက်မှာဆိုရင် လောင်းကစားတွေက ပေါ်တင်ပဲ။ လမ်းထိပ်ဆိုင်းဘုတ်တောင် ကြက်တိုက်တယ် ဆိုတာ တရုတ်လိုရေးသားပြီးပေါ်တင်ကြေငြာတယ်။ ဘယ်သူက အရေးမယူဘူး” ဟု မူဆယ်မြို့ အသက် ၅၅ နှစ်အရွယ်ရှိ အမျိုးသမီးတစ်ဦးက သျှမ်းသံတော်ဆင့်ကိုပြောသည်။
အဆိုပါ လောင်းကစားဝိုင်းများသည် ၂၄ နာရီ ပိတ်ရက်မရှိ ဖွင့်လှစ်ပြီး မီးပျက်လျှင်လည်း မီးစက်နှိုးပြီး ဖွင့်လှစ်သည့်အတွက် ဒေသခံများက သက်ဆိုင်ရာကို တိုင်ကြားချင်သော်လည်း ထိုလောင်းကစားဖွင့်လှစ်သူများသည် အခွန်ပေးပြီး ဖွင့်လှစ်ထားသဖြင့် တိုင်ကြားရန် ခက်ခဲနေကြောင်းလည်း ၎င်းအမျိုးသမီးက ဆိုသည်။
“ ည လူအိပ်ချိန်လည်း မီးစက်နှိုးပြီး ဖွင့်တော့ ညဆိုအိပ်လို့မရဘူး။ သူတို့က ရဲတွေကို ပိုက်ဆံပေးထားတော့ ကျမတို့က ဘယ်သူကိုတိုင်လို့တိုင်ရမှန်းမသိဘူး။ ကြက်တိုက်ရော ကာစီနိုတွေရော အများကြီးပဲ။ ဒီနှစ်မှာ ပိုများလာတယ်” ဟု အမည်မဖော်လိုသည့် အသက် ၂၅ နှစ်အရွယ်ရှိ ဒေသခံအမျိုးသားတစ်ဦးက သျှမ်းသံတော်ဆင့်ကိုပြောသည်။
ထိုလောင်းကစားရုံများသည် အဓိကအားဖြင့် ပြည်သူ့စစ်နှင့် စစ်ကောင်စီများ ပူးပေါင်းပြီးဖွင့်လှစ်ထားသည့်အတွက် ပြည်သူများက တိုင်ကြားချင်သော်လည်း တိုင်ကြားရန် ခက်ခဲနေကြောင်းလည်း ၎င်းအမျိုးသားက ဆိုသည်။
မူဆယ်မြို့ စွမ်စော်ရပ်ကွက်တွင် တရုတ်လူမျိုးများစွာနေထိုင်သည့်အတွက် လမ်းထိပ်တိုင်းတွင် မြန်မာစာကိုမတွေ့ရတော့ဘဲ လမ်းဆိုင်းဘုတ်က အစ တရုတ်စာများဖြင့်သာ ရေးသားနေကြောင်းသိရသည်။
“အခုက ကျနော်တို့ လမ်းတွေမှာတောင် တရုတ်စာတွေပဲတွေ့လို့ တရုတ်ပြည်လားလို့ထင်ရတယ်။ မူဆယ်မြို့ပေါ်မှာတော့ သိပ်မတွေ့ရဘူး စွမ်စော်ဘက်ပဲ လမ်းတိုင်းက တရုတ်ပဲ”လို့ အထက်ပါ လူငယ်အမျိုးသားက ဆိုသည်။
မူဆယ်မြို့ စွမ်စော်ရပ်ကွက်တွင် စစ်အာဏာသိမ်းပြီးနောက် မကြာခဏ ပစ်ခတ်မှု ဖြစ်ပွားသည့် နေရာဖြစ်သည်။
မူဆယ်မြို့နယ်သည် စစ်ကောင်စီ တပ်ဖွဲ့အပြင် ၎င်းတို့၏ လက်အောက်ခံ တရုတ်လူမျိုးများ ပါဝင်နေသည့် ပြည်သူ့စစ်တပ်ဖွဲ့၊ တိုင်းရင်းသား လက်နက်ကိုင်တပ်ဖွဲ့တို့မှ သွားလာလှုပ်ရှားနေသည့်နေရာဖြစ်သည်။
ယခုနှစ် ဇူလိုင် ၃၁ ရက် ညပိုင်းတွင်လည်း မင်္ဂလာမူဆယ်မြို့သစ်ရှိ ကိုးထပ်တိုက် အဆောက်အအုံတွင် ဖွင့်လှစ်ထားသည့် တရုတ်လူမျိုးကို ပစ်မှတ်ထားပြီး အွန်လိုင်းမှငွေလိမ်သည့် လုပ်ငန်း စီးနင်းခံရပြီး၊ ထိုလောင်းကစားလုပ်ငန်းတွင် စစ်ကောင်စီတပ်ဖွဲ့ဝင်များ၊ ပြည်သူ့စစ်အဖွဲ့များ ပါဝင်ပတ်သက်နေသည်ဟုလည်း မူဆယ်ဒေသခံများ ပြောပြချက်အရ သိရသည်။
