မြန်မာ – တရုတ်နယ်စပ် သျှမ်းပြည်မြောက်ပိုင်း မူဆယ်မြို့ နှင့် နမ့်ခမ်းမြို့တွင် ဖုန်းလိုင်း နှင့် အင်တာနက်လိုင်းများ ပိတ်ခံထားရကြောင်း စုံစမ်းသိရသည်။
ဒီဇင်ဘာ ၂၀ ရက်နေ့မှ စပြီး ယနေ့ (ဒီဇင်ဘာ ၂၆) ရက်ထိ မူဆယ်မြို့ နှင့် နမ့်ခမ်းမြို့တို့တွင် အကြောင်းမဲ့ ဖုန်းလိုင်း နှင့် အင်တာနက်လိုင်းများ ပိတ်ခံရကြောင်း သိရသည်။
ထိုသို့ အင်တာနက်လိုင်း ပိတ်ခံရခြင်းသည် စစ်ကောင်စီက တရုတ်နိုင်ငံမှ ပြန်ထွက်လာသည့် ကုန်တင်ကားကြီးများကို စစ်ဆေးရန် လိုအပ်သည့်အတွက်ကြောင့် ပိတ်လိုက်သည်ဟု ဒေသခံများက ပြောသည်။
“ သူတို့ပိတ်တာ ၁ ပတ်လောက်ရှိတော့မယ်။ အကြောင်းမဲ့ ပိတ်လိုက်တာပဲ။ ကျနော်တို့ အထင်တော့ သူတို့ စစ်ဆေးမှုတွေ ပိုပြီး တင်းကြပ်ဖို့လိုလို့ ပိတ်လိုက်တာထင်တယ်။ မြန်မာက ကုန်တင်ကားကြီးတွေ တရုတ်နိုင်ငံကနေ ပြန်ထွက်လာပြီဆိုရင် သူတို့ အစီးတိုင်းကို စစ်ဆေးတယ်” ဟု မူဆယ်မြို့ ဒေသခံ အမျိုးသမီးတစ်ဦးက ပြောသည်။
ထိုအပြင် စစ်ကောင်စီမှ ကားနံပါတ် ကို ကြည့်ပြီး စစ်ဆေးနေကာ ၎င်းတို့ မှတ်ထားသည့် ကားနံပါတ် ပါရှိပါက ချက်ချင်းဖမ်းဆီးခေါ်ဆောင်သွားကြောင်း သိရသည်။
ပြီးခဲ့သည့် ဒီဇင်ဘာ ၂၀ ရက်နေ့တွင်လည်း တရုတ်နိုင်ငံမှာ ကားကြီး အစီး ၄၀၀ ဝန်းကျင်ကို တားဆီး စစ်ဆေးလျက် ရှိကြောင်း သိရသည်။
“၂၀ ရက်နေ့တုန်းကလည်း တစ်စီးက သူတို့စာရင်းထဲပါလို့ ဖမ်းခေါ်သွားတာ။ ဘာမှ မမေးဘူး။ သူတို့ စာရင်း ရှိထားတဲ့ နံပါတ်ဆိုရင် ချက်ချင်းခေါ်သွားတာ။ အဲ့နေ့တုန်းက ကား ၄၀၀ ကျော်လောက် တရုတ်ဘက် ကနေထွက် လာတာ။ အဲ့တာစောင့်ပြီး စစ်ဆေးနေကြတာ” ဟု မူဆယ်မြို့ ဒေသခံ တစ်ဦးက ပြောသည်။
လက်ရှိ မူဆယ်မြို့ နှင့် နမ့်ခမ်းမြို့တို့တွင် MPT သည် ဖုန်းလိုင်း တစ်မျိုးသာရရှိကြပြီး Mytel သည် ဖုန်းလိုင်း နှင့် အင်တာနက်လိုင်း ရရှိတော့ကြောင်း သိရသည်။
လက်ရှိမှာ ဝိုင်ဖိုင်လိုင်းတချို့သာ အင်တာနက် ရရှိထားသော်လည်း ဝိုင်ဖိုင်လိုင်း အသစ်တပ်ရန် လက်မခံတော့ကြောင်း မူဆယ်ဒေသခံများကပြောသည်။
အင်တာနက်လိုင်းများ မရရှိသည့်အတွက်ကြောင့် ပြည်သူများက ငွေလွှဲရန် အခက်အခဲ ဖြစ်နေကြောင်းလည်း စျေးသည်တစ်ဦးက သျှမ်းသံတော်ဆင့် ကိုပြောသည်။
“ အလုပ်လုပ်ရဖို့အတွက် အခက်ခဲဖြစ်တယ်။ အခုဆိုရင် မန္တလေးဘက်ကို ငွေလွှဲပေးဖို့ လွှဲလို့မရတော့ဘူး။ ပြီးတော့ အွန်လိုင်းကနေလည်း ပြောလို့မရဘူး။ ပုံတွေလည်း ပြလို့မရဘူး။ ဖုန်းဆက်မှာရင်လည်း အဆင်မပြေ ဖြစ်တယ်လေ” ဟု ဈေးသည်တစ်ဦးက ပြောသည်။
မူဆယ်မြို့သည် မြန်မာ – တရုတ် ကုန်သွယ်ရေးဇုန် ရှိသည့်ဒေသဖြစ်သည့်အလျောက် လက်နက်ကိုင် အဖွဲ့အစည်း အများအပြား သွားလာလှုပ်ရှားသည့် ဒေသဖြစ်သည်။
Leave a Comments