သျှမ်းပြည်မြောက်ပိုင်း လားရှိုးမြို့နယ် အိမ်ထောင်စု စာရင်းထဲ မရှိသူများ မြို့နယ်မှူးထံသို့ အကြောင်းကြားရမည် ဖြစ်ကြောင်း စုံစမ်း သိရှိရသည်။

ဒီဇင်ဘာလ ၂၁ ရက် ညနေပိုင်းအချိန်က လားရှိုးမြို့ ရပ်ကွက် ၅ အတွင်းတွင် နေထိုင်သည့် ဒေသခံများ အိမ်ထောင်စုစာရင်း ဝင်ထားခြင်းရှိ၊ မရှိ စစ်ဆေးပြီး၊ အိမ်ထောင်စု စာရင်းထဲ မရှိသူများကို မြို့နယ်မှူးထံသို့ အကြောင်းကြားနေရကြောင်း လားရှိုးမြို့နယ်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

“သူတို့ ဘာသတင်းရလို့လည်းတော့ မသိဘူး။ ဧည့်စာရင်းတွေ လာစစ်တယ်။ ကျနော်တို့ ရပ်ကွက်ဘဲ မဟုတ်ဘူး၊ ရပ်ကွက်တိုင်းလိုလိုတော့ သူတို့ဧည့်စာရင်း ဝင်စစ်နေတယ်။ အိမ်ထောင်စု စာရင်းထဲမှာ ပါတဲ့သူတွေ အကုန်လုံး ဓာတ်ပုံရိုက်ပြီး မြို့နယ်မှူးထံ ပို့ပေးရတယ်။ မြို့နယ်မှူးက တစ်ဆင့် ရိုက်ထားတဲ့ ဓာတ်ပုံတွေကို စာအုပ်ထဲမှာ ကပ်ပေးလိုက်တယ်။ အဲ့စာအုပ်လည်း ကိုယ့်အိမ်မှာ သိမ်းထားရတယ်“ ဟု ၎င်း အမျိုးသားတစ်ဦးက ပြောသည်။

အဆိုပါ စစ်တပ်က ဧည့်စာရင်း စစ်ဆေးမှု နှင့် ပတ်သက်ပြီး မှတ်ပုံတင်၊ အိမ်ထောင်စုဇယား၊ မည်သူမည်ဝါ နှင့် မည်သည့် ဒေသမှ လာသူများဖြစ်ကြောင်း စသည့်ဖြင့် စစ်ဆေးပြီး နယ်ခံမဟုတ်ပါက ရပ်ကွက်ထောက်ခံစာ ရှိမှသာလျှင် လက်ခံရန် ညွှန်ကြားထားသည်။

“အိမ်မှာ ဧည့်သည် လက်ခံထားရှိ၊ မရှိ သူတို့က စစ်ဆေးချင်တာ။ ဧည့်သည်က ဘယ်ကလာလဲ၊ ဘယ်သူ့ ခွင့်ပြုချက် ထောက်ခံစာကိုယူပြီး နေလဲပေါ့။ ခွင့်ပြုချက်မရှိဘဲ လာနေရင်တော့ မရဘူး၊ သူတို့က အရေးယူတယ်။ အခုက ဘာမှစိတ်မခြုံလုံပါဘူး“ ဟု ၎င်း အမျိုးသား တစ်ဦးက ပြောသည်။

ထို့အပြင် သျှမ်းပြည် လားရှိုး၊ တောင်ကြီး၊ မူဆယ်၊ နမ့်ခမ်း စသည့် မြို့များတွင် စစ်ကောင်စီတပ်မှ ဧည့်စာရင်း စစ်ဆေးမှုများ ပြုလုပ်ပြီး ရှောင်သခင် ဖမ်းဆီးမှုများလည်း ပြုလုပ်ခဲ့ကြောင်း သိရသည်။