သျှမ်းပြည်တောင်ပိုင်း ဆီဆိုင်မြို့နယ် တဘက်ကျေးရွာအုပ်စုမှ လယ်ထွန်စက် ရှိသည့် နေအိမ်များကို ပအိုဝ်းပြည်သူ့စစ်တပ်ဖွဲ့ PNO/PNA များက ပိုက်ဆံ အဆမတန်ကောက်ခံနေကြောင်း စုံစမ်းသိရှိရသည်။
ယမန်နေ့( ဒီဇင်ဘာလ ၂၃) ရက် နံနက်ပိုင်း ၁၀ နာရီတွင် ဆီဆိုင်မြို့နယ် တဘက်ကျေးရွာအုပ်စု နောင်မိုကျေးရွာကို ပအိုဝ်းပြည်သူ့စစ် PNO/PNA တပ်သား ၄ ဦးက ရိက္ခာ ထောက်ပံ့ကြေးအနေဖြင့် လယ်ထွန်စက်ရှိသည့် အိမ်ကို တစ်စီးလျှင် (၅) သောင်း ကောက်ခံနေကြောင်း နောင်မိုဒေသခံ တစ်ဦးက သျှမ်းသံတော်ဆင့်ကို ပြောသည်။
“ သူတို့ထောက်ပံ့ကြေးဆိုပြီး လယ်ထွန်စက်ရှိတဲ့အိမ်ကို တစ်စီးကို ၅သောင်း ကျပ်ဆိုပြီး ကောက်သွားတယ်။ သူတို့ကို PNO/PNA တပ်သားလို့လည်း ပြောတယ် “ ဟု ၎င်းဒေသခံတစ်ဦးက ပြောသည်။
ယခင် စစ်အာဏာမသိမ်းခင်က ပအိုဝ်းပြည်သူ့စစ်တပ်ဖွဲ့ PNO/PNA သည် ဒေသခံများကို တစ်ကြိမ်တစ်ခါမျှ ပိုက်ဆံကောက်ခံခြင်းမရှိခဲ့ကြောင်း စစ်အာဏာသိမ်းပြီးနောက်ပိုင်းမှ ကောက်ခံလာနေကြောင်း ဆီဆိုင်မြို့နယ်ဒေသခံများက ပြောသည်။
လက်ရှိ ကုန်စျေးနှုန်းမြင့်တက်နေသည့်အချိန် ဒေသခံပြည်သူများထံ ပိုက်ဆံအဆမတန် ကောက်ခံခြင်း သည် ပြည်သူများကို ပိုပြီးအခက်အခဲဖြစ်နေစေကြောင်း ၎င်းကထပ်လောင်းပြောသည်။
“ အခုကာလက ကုန်ဈေးနှုန်းတွေ ဈေးကြီးတယ်။ နိုင်ငံရေးကမကောင်းတာနဲ့ အလုပ်ကလည်း အဆင်မပြေဘူး။ သူတို့လာကောက်တာ မပေးရင်လည်း ကြောက်ရတယ်။ သူတို့ စားဖို့သောက်ဖို့လည်း ခဏခဏ သွားပို့ဖူးပြီးပြီ။ အခုလည်း ပိုက်ဆံထပ်ပေးရတော့ အဆင်မပြေတော့ဘူး “ ဟု ၎င်းကထပ်လောင်း ပြောသည်။
ထို့အပြင် ပအိုဝ်းပြည်သူ့စစ်တပ်ဖွဲ့ PNO/PNA လှုပ်ရှားနယ်မြေ ဆီဆိုင်မြို့နယ် တဘက်ကျေးရွာအုပ်စုအပြင် ပုံးအင်း၊ ဟိုပုံး၊ ပင်လောင်းမြို့နယ်အတွင်း ကျေရွာများကို ကောက်ခံနေကြောင်း သိရသည်။
Leave a Comments